ചിക്കൻ കഴിച്ചതിനുശേഷം ഉടനെ പാൽ കുടിക്കാമോ? ദോഷകരമെന്ന് പറയുന്നത് ശരിയോ?

ചിക്കൻ വിഭവങ്ങൾ ഇഷ്ടമില്ലാത്തവർ കുറവായിരിക്കും. ചിക്കൻ കറി, ഫ്രൈ, ചിക്കൻ ബിരിയാണി തുടങ്ങി ചിക്കൻ വിഭവങ്ങളുടെ നീണ്ട ലിസ്റ്റ് തന്നെ ഇന്ന് കടകളിലുണ്ട്. എന്നാൽ ചിക്കൻ കഴിക്കുമ്പോൾ ചില കാര്യങ്ങൾ ശ്രദ്ധിക്കേണ്ടതായുണ്ട്. പ്രത്യേകിച്ച് കഴിച്ച് കഴിയുമ്പോൾ.

ചിക്കൻ കഴിച്ച് കഴിഞ്ഞയുടൻ പാൽ കുടിക്കുന്നത് ആരോഗ്യത്തിന് മികച്ചതല്ലെന്നാണ് പല ആരോഗ്യ വിദഗ്ദ്ധരും അഭിപ്രായപ്പെടുന്നത്. ചിക്കനും പാലും പ്രോട്ടീൻ സമ്പന്നമായ വിഭവങ്ങളാണ്. ഇത് രണ്ടും ഒരുമിച്ച് കഴിക്കുന്നത് ആരോഗ്യത്തിന് ദോഷം ചെയ്യുമെന്നതിന് ശാസ്ത്രീയ തെളിവുകളില്ല. ചിക്കൻ കഴിച്ചയുടൻ പാൽ കുടിക്കുന്നത് ചിലരിൽ വയറിളക്കം, വായു പ്രശ്നങ്ങൾ, വയറുവേദന എന്നിവയ്ക്ക് കാരണമാകാം. ഇത് ദഹനപ്രശ്നങ്ങൾക്കും ഇടയാക്കിയേക്കാം. ചിക്കൻ, ബീഫ് പോലുള്ള കട്ടിയായ ഭക്ഷണങ്ങൾ കഴിച്ച് ഒന്നോ രണ്ടോ മണിക്കൂറുകൾക്കുശേഷം പാൽ കുടിക്കുന്നതാണ് ഉചിതം.

ഇതിനൊപ്പം ഒരു വെറൈറ്റി ചിക്കൻ വിഭവം കൂടി പരിചയപ്പെടാം. ഒറ്റയ്ക്ക് താമസിക്കുന്നവർക്ക് എളുപ്പത്തിൽ തയ്യാറാക്കാവുന്ന കുക്കർ ചിക്കൻ കറി അല്ലെങ്കിൽ ബാച്ചിലർ ചിക്കൻ കറിയുടെ റെസിപ്പി അറിയാം.

ആവശ്യമായ ചേരുവകൾ

• 600 മുതൽ 700 ഗ്രാം ചിക്കൻ
• 2 ടേബിൾസ്പൂൺ വെളിച്ചെണ്ണ
• 2 ഇടത്തരം ഉള്ളി അരിഞ്ഞത്
• ഉപ്പ് ആവശ്യത്തിന്
• 1 ടേബിൾസ്പൂൺ ഇഞ്ചി അരിഞ്ഞത്
• 1 ടേബിൾസ്പൂൺ വെളുത്തുള്ളി അരിഞ്ഞത്
• അര ടീസ്പൂൺ മഞ്ഞൾപ്പൊടി
• ഒന്നര ടീസ്പൂൺ കാശ്മീരി മുളകുപൊടി
• ഒന്നര ടീസ്പൂൺ മല്ലിപ്പൊടി
• ഒരു പിടി കറിവേപ്പില
• 1 വലിയ തക്കാളി അരിഞ്ഞത്
• 1 കപ്പ് ചൂടുവെള്ളം
• കാൽ ടീസ്പൂൺ ഗരം മസാല അല്ലെങ്കിൽ ചിക്കൻ മസാല
• കാൽ ടീസ്പൂൺ കുരുമുളക് പൊടി

തയ്യാറാക്കുന്ന വിധം

• പ്രഷർ കുക്കറിൽ വെളിച്ചെണ്ണ ചൂടാക്കുക. അരിഞ്ഞ ഉള്ളിയിൽ അല്പം ഉപ്പ് ചേർത്ത് തവിട്ട് നിറമാകുന്നതുവരെ വഴറ്റുക.
• അരിഞ്ഞ ഇഞ്ചി, വെളുത്തുള്ളി എന്നിവ ചേർത്ത് അല്പനേരം വഴറ്റുക. ഉള്ളി മിശ്രിതം ഒരു വശത്തേക്ക് മാറ്റുക.
• മഞ്ഞൾപ്പൊടി, കാശ്മീരി മുളകുപൊടി, മല്ലിപ്പൊടി എന്നിവ നേരിട്ട് എണ്ണയിലേക്ക് ചേർക്കുക. 30 മുതൽ 60 സെക്കൻഡ് വരെ വഴറ്റുക. തുടർന്ന് ഉള്ളിയുമായി ചേർത്തിളക്കുക.
• ചിക്കൻ, കറിവേപ്പില, തക്കാളി എന്നിവ ചെറുതായി അരിഞ്ഞത് ഇതിലേയ്ക്ക് ചേർക്കുക. എല്ലാം നന്നായി ഇളക്കുക.
• വിസിൽ ഇല്ലാതെ കുക്കർ അടച്ച് ഏകദേശം അഞ്ച് മിനിറ്റ് വേവിക്കുക. ചിക്കനിലെ ഈർപ്പം പുറത്തുവരാൻ തുടങ്ങും.
• മൂടി തുറന്ന് നന്നായി ഇളക്കുക. ഒരു കപ്പ് ചൂടുവെള്ളം ചേർക്കുക, വിസിൽ കൊണ്ട് കുക്കർ അടച്ച് ഇടത്തരം ചൂടിൽ രണ്ട് വിസിൽ വരെ വേവിക്കുക.
• പ്രഷർ സ്വാഭാവികമായി കുറഞ്ഞുകഴിഞ്ഞാൽ ഗരം മസാലയും കുരുമുളകും ചേർക്കുക. കട്ടിയുള്ള ഗ്രേവി ആണ് വേണ്ടതെങ്കിൽ കുറച്ച് മിനിറ്റ് കൂടി വേവിക്കുക.

• ചോറ്, അപ്പം, ചപ്പാത്തി, അല്ലെങ്കിൽ പൊറോട്ട എന്നിവയ്‌ക്കൊപ്പം ചൂടോടെ വിളമ്പാം.