വെള്ളരിക്ക കഴിക്കുമ്പോൾ ഇനി കയ്പ്പ് തോന്നില്ല, നല്ലൊരു സൂത്രവിദ്യയുണ്ട്

ആരോഗ്യഗുണങ്ങൾ ഏറെയുള്ള ഒന്നാണ് വെള്ളരിക്ക. ഇതിൽ ധാരാളം ജലാംശം അടങ്ങിയിട്ടുണ്ട്. വിറ്റാമിൻ കെ, പൊട്ടാസ്യം, മഗ്നീഷ്യം എന്നിവയുടെ കലവറ കൂടിയാണ് വെള്ളരിക്ക. കലോറി കുറവായതിനാലും നാരുകൾ ധാരാളമായി അടങ്ങിയിട്ടുള്ളതിനാൽ ശരീരഭാരം കുറയ്ക്കാൻ വെള്ളരി സഹായിക്കുന്നു. ഇക്കാരണങ്ങളാൽ മിക്കവരും ഭക്ഷണത്തിൽ വെള്ളരി പതിവായി ഉൾപ്പെടുത്താറുണ്ട്. അതേസമയം, വെള്ളരി കഴിക്കുമ്പോൾ കയ്പ്പ് അനുഭവപ്പെടുന്നതായി പലരും പറയാറുണ്ട്. ഇതിന് വീട്ടിൽതന്നെ പരിഹാരമാർഗം പരീക്ഷിക്കാം.

വെള്ളരിക്ക മുറിക്കുമ്പോൾ അടിഭാഗം അൽപം മുറിച്ചുമാറ്റണം. ഇനി ബാക്കിയുള്ള ഭാഗം കട്ടിംഗ് ബോർഡിലോ മറ്റോ ഉരയ്ക്കണം. ഇങ്ങനെ ചെയ്യുമ്പോൾ വെളുത്ത ദ്രാവകം പുറത്തുവരും. കുക്കുർബിറ്റാസിൻ എന്ന ഈ ദ്രാവകമാണ് കയ്പ്പ് രുചിക്ക് കാരണം. മത്തങ്ങ, തണ്ണിമത്തൻ എന്നിവയിലും ഇത് അടങ്ങിയിട്ടുണ്ട്. അടിഭാഗം ഉരസുമ്പോൾ കുക്കുർബിറ്റാസിൻ പുറത്തുപോവുകയും കയ്പ്പ് രുചി മാറാൻ സഹായിക്കുുകയും ചെയ്യുന്നു.

വെള്ളരിക്ക പെട്ടെന്ന് അഴുകിപ്പോകാതിരിക്കാനുള്ള ടിപ്പുകൾ

• പേപ്പറിലോ ടിഷ്യുവിലോ ടൗവ്വലിലോ, അലുമിനിയം ഫോയിലിലോ ഓരോന്നായി പൊതിഞ്ഞ് വയ്ക്കുന്നത് അന്തരീക്ഷത്തിലെ ഈർപ്പം അധികമായി ആഗിരണം ചെയ്യുന്നത് തടയും. വെള്ളരിക്ക ഏറെനാൾ കേടുകൂടാതെയിരിക്കാനും സഹായിക്കും.
• ഉപയോഗിക്കുന്നതിന് തൊട്ടുമുൻപ് മാത്രം വെള്ളരിക്ക കഴുകുക.
• ഉണങ്ങിയ, ഈ‌ർപ്പമില്ലാത്ത, തണുപ്പുള്ള, വെയിലേൽക്കാത്ത സ്ഥലത്ത് സൂക്ഷിക്കാൻ ശ്രദ്ധിക്കുക.
• തക്കാളി, പഴം, ആപ്പിൾ എന്നിവയോടൊപ്പം വെള്ളരിക്ക സൂക്ഷിക്കരുത്. ഇവ പുറത്തുവിടുന്ന എഥിലീൻ വെള്ളരിക്ക പെട്ടെന്ന് അഴുകുന്നതിന് കാരണമാവും.
• വെള്ളരിക്ക മുറിച്ചതിനുശേഷം ബാക്കി ഭാഗത്ത് പ്ളാസ്റ്റിക്കോ ബട്ടർ പേപ്പറോ ഉപയോഗിച്ച് പൊതിഞ്ഞ് സൂക്ഷിക്കാം.
• വിനാഗിരിയിൽ മുക്കി നന്നാഴി കഴുകിയതിനുശേഷം തുടച്ച് ഉണക്കി സൂക്ഷിക്കാം. ഇത് ബാക്‌ടീരിയ, ഫംഗസ് തുടങ്ങിയവ ബാധിക്കാതിരിക്കാൻ സഹായിക്കും.
• സിമന്റ് തറയിലോ കല്ലിലോ വയ്ക്കാതെ പലകയിലോ പായയിലോ സൂക്ഷിക്കാം.