സാധാ പുട്ട് കഴിച്ച് മടുത്തോ? അടിപൊളി രുചിയിൽ ഉണ്ടപ്പുട്ട് തയ്യാറാക്കാം, കറിയുടെ ആവശ്യമേയില്ല

പുട്ട് ഇഷ്ടമില്ലാത്ത മലയാളികൾ കുറവായിരിക്കും. അരിപൊടി, ഗോതമ്പ് മാവ്, റവ, റാഗി, ചോളം എന്നിങ്ങനെ വിവിധ ചേരുവകൾകൊണ്ട് നമ്മൾ പുട്ട് തയ്യാറാക്കാറുണ്ട്. എന്നാൽ ദിവസേന ഒരേതരത്തിലെ ആഹാരം കഴിക്കുന്നത് മിക്കവർക്കും മടുപ്പുണ്ടാക്കും. അത്തരക്കാർക്ക് ഇടക്കിടെ ഈ വെറൈറ്റി പുട്ട് പരീക്ഷിക്കാം.

ആവശ്യമായ ചേരുവകൾ

• റവ
• തേങ്ങാപ്പാൽ
• തേങ്ങ ചിരകിയത്
• നെയ്യ്
• നേന്ത്രപ്പഴം
• പഞ്ചസാര പൊടിച്ചത്
• കശുവണ്ടി
• ഉണക്കമുന്തി
• ക്യാരറ്റ് ഗ്രേറ്റ് ചെയ്തത്
• ഉപ്പ്

തയ്യാറാക്കുന്ന വിധം

• ഒരു പാത്രത്തിൽ ആവശ്യത്തിന് റവ എടുത്ത് അതിൽ ആവശ്യത്തിന് ഉപ്പും തേങ്ങാപ്പാലും ഒഴിച്ച് കുഴച്ചെടുക്കണം.
• ഒരു പാൻ അടുപ്പിൽവച്ച് അതിലേയ്ക്ക് നെയ്യ് ഒഴിക്കണം. നെയ്യ് ചൂടായിത്തുടമ്പോൾ നേന്ത്രപ്പഴം ചെറിയ കഷ്ണങ്ങളാക്കി അരിഞ്ഞിടണം.
• പഞ്ചസാരപ്പൊടി ഇതിനുമുകളിലേയ്ക്ക് വിതറിയതിനുശേഷം പഴം ഗോൾഡൻ ബ്രൗൺ നിറമായി തുടങ്ങുമ്പോൾ കശുവണ്ടി, ഉണക്കമുന്തിരി എന്നിവ ചേർക്കണം.
• ഈ കൂട്ടും തേങ്ങ ചിരകിയതും ക്യാരറ്റ് ഗ്രേറ്റ് ചെയ്തതും ചേർത്തിളക്കണം. ഇനി എല്ലാം കൂടി നന്നായി യോജിപ്പിച്ചതിനുശേഷം ചെറിയ ഉരുളകളായി ഉരട്ടിയെടുക്കാം. ഇത് ഇഡ്ഡലി കുക്കറിൽ വച്ച് പത്ത് മിനിട്ട് ആവിയിൽ വേവിക്കണം. നല്ല രുചിയേറിയ ഉണ്ടപ്പുട്ട് തയ്യാറായി.