ടൂറിസം മേഖലയിൽ ആയുർവേദവുമായി ബന്ധപ്പെടുത്തിയുള്ള പദ്ധതികൾ നടപ്പാക്കും: എച്ച്.സലാം എം.എൽ.എ

ആലപ്പുഴ: ടൂറിസം മേഖലയെ ശക്തിപ്പെടുത്താൻ ആയുർവേദവുമായി ബന്ധപ്പെടുത്തി തൊഴിൽ അവസരങ്ങൾ സൃഷ്ടിക്കാൻ കഴിയുന്ന പദ്ധതികൾക്ക് കൂടുതൽ പ്രാധാന്യം നൽകി നടപ്പാക്കുമെന്ന് എച്ച്.സലാം എം.എൽ.എ പറഞ്ഞു. കേരളകൗമുദി ആലപ്പുഴ യൂണിറ്റ് സംഘടിപ്പിച്ച ആയുർവേദിക് കോൺക്ളേവിൽ പ്രഭാഷണം നടത്തുകയായിരുന്നു അദ്ദേഹം.

ടൂറിസത്തിന്റെ സാധ്യതകൾ നമുക്ക് പൂർണ്ണമായി പ്രയോജനപ്പെടുത്താൻ കഴിഞ്ഞിട്ടില്ല. വികസന സാധ്യതകൾ യാഥാർത്ഥ്യമാക്കാനുള്ള പരിശ്രമത്തിലാണ് സർക്കാർ. പരമ്പരാഗത തൊഴിൽ മേഖലയുടെ തകർച്ചയിലൂടെ നഷ്ടപ്പെടുന്ന തൊഴിലവസരങ്ങൾ സൃഷ്ടിക്കാനായി ടൂറിസത്തെ കൂടുതൽ സജ്ജമാക്കുകയാണ് സർക്കാർ ലക്ഷ്യം. സഞ്ചാരികൾക്ക് കൂടുതൽ ദിവസം ആലപ്പുഴയിൽ താമസിച്ച് കാഴ്ചകൾ കാണാനായി മുസിരിസ് വിവിധ പദ്ധതികൾ നടപ്പാക്കി വരുന്നു. കടൽപ്പാലം നവീകരണം ഉടൻ ഉണ്ടാകും. കയർ സ്ഥാപനങ്ങളുടെ നവീകരണം അന്തിമഘട്ടത്തിലായി. ജില്ലയിൽ കാർഷിക മേഖലയിൽ നിർമ്മിക്കുന്ന പാലങ്ങൾ സഞ്ചാരികളെ ആകർഷിക്കാൻ കഴിയുന്ന തരത്തിൽ രൂപകല്പന നടത്തിയതിലൂടെ ടൂറിസം മാപ്പിൽ ഇടംപിടിക്കാനായി. സംസ്ഥാനത്തെ ടൂറിസം വികസനം കൂടുതൽ കരുത്തോടെ മുന്നേറാൻ കേരളകൗമുദി എടുത്ത താല്പര്യം സാമൂഹ്യ പ്രതിബദ്ധതയുടെ തെളിവാണെന്നും എച്ച്.സലാം എം.എൽ.എ പറഞ്ഞു.