വീടുകൾ വെള്ളത്തിൽ ; ബൈപാസ് ഉപരോധിച്ച് നാട്ടുകാർ

 രണ്ട് മണിക്കൂർ ദേശീയപാതയിൽ ഗതാഗതം തടസപ്പെട്ടു

ആലപ്പുഴ: ദേശീയപാതയി​ലെ അശാസ്ത്രീയ നിർമ്മാണ​ത്തെത്തുടർന്ന്​ നഗരത്തിലെ ​അഞ്ഞൂറിലധികം വീടുകളിൽ വെള്ളംകയറി. കാലവർഷം എത്തിയതോടെ ദുരിതം ഇരട്ടിച്ചതിനെത്തുടർന്ന് നാട്ടുകാർ ആലപ്പുഴ ബൈപാസ്​ ഉപരോധിച്ചു. രണ്ടുമണിക്കൂറിലേറെ നേരം നീണ്ട സമരത്തിൽ ദേശീയപാതയിലെ ആറുകിലോമീറ്റർ ദൂരം ഗതാഗതം പൂർണമായും സ്തംഭിച്ചു. രണ്ടുദിവസത്തിനകം പ്രദേശത്തെ വീടുകളിലെയും പരിസരത്തെയും വെള്ളക്കെട്ട്​ ഒഴിവാക്കാൻ താത്ക്കാലികസംവിധാനമൊരുക്കുമെന്ന്​ സ്ഥലത്തെത്തിയ എ.ഡി.തോമസ്​ എം.എൽ.എയും ജില്ല കലക്ടർ ഷാജി വി. നായരും ഉറപ്പുനൽകി​യതോടെയാണ്​​ പ്രതിഷേധക്കാർ സമരം അവസാനിപ്പിച്ചത്​. ഉറപ്പ്​ ലംഘിച്ചാൽ സമരവുമായി വീണ്ടും വരുമെന്നും നാട്ടുകാർ മുന്നറിയിപ്പുനൽകി.
ഇന്നലെ രാവിലെ 11നാണ്​ സംഭവങ്ങൾക്ക്​ തുടക്കം. ബൈപാസിന്റെ തുടക്കമായ കൊമ്മാടിഭാഗത്ത്​​ സ്​ത്രീകളടക്കമുള്ളവർ റോഡിൽ കുത്തിയിരുന്നും കിടന്നും പ്രതിഷേധിച്ചു. വെള്ളക്കെട്ട്​ പ്രശ്​നം പരിഹരിക്കാതെ പിരിഞ്ഞുപോകില്ലെന്ന്​ പ്രഖ്യാപിച്ചായിരുന്നു സമരം. ഇതിന്​ പിന്നാലെ ബൈപാസ്​ മേൽപാലത്തിൽ ആംബുലൻസ്​ അടക്കമുള്ള വാഹനങ്ങളുടെ നീണ്ടനിരയും ദൃശ്യമായി. കളർകോട്​ നിന്ന്​ എറണാകുളം ഭാഗത്തേക്കുള്ള വാഹനങ്ങൾ ഉയരപ്പാതയിൽ കുടുങ്ങി. കൊമ്മാടി, കളർകോട്​ എന്നിവിടങ്ങളിൽനിന്ന്​ വാഹനങ്ങൾ വഴിതിരിച്ചുവിട്ടാണ് പൊലീസ്​​ ഗതാഗതക്കുരുക്ക്​ പരിഹരിച്ചത്​.
സ്ഥലത്തെത്തിയ എ.ഡി.തോമസ് എം.എൽ.എയും എൽ.ഡി.എഫ്​ ജനപ്രതിനിധികളും തമ്മിൽ തർക്കമുണ്ടായി. വിഷയത്തിൽ ‘രാഷ്​ട്രീയം’ കലർത്തരുതെന്ന്​ ചുണ്ടിക്കാട്ടി നാട്ടുകാർ പ്രതിരോധമുയർത്തി. ദേശീയപാത ഉദ്യോഗസ്ഥർ ഫോൺവിളിച്ചിട്ട്​ എടുക്കുന്നില്ലെന്നായിരുന്നു പ്രധാനപരാതി. ജില്ലാകളക്​ടർ നേരിട്ടെത്തി പ്രശ്നം പരിഹരിക്കാതെ സമരത്തിൽനിന്ന്​ പിന്മാറില്ലെന്ന്​ നാട്ടുകാർ പറഞ്ഞു.

സ്ഥലത്തെത്തിയ കളക്ടർ ഷാജി.വി.നായർ പ്രതിഷേധക്കാരുമായി സംസാരിച്ചു. കെട്ടികിടക്കുന്ന വെള്ളം ഒഴുക്ക്​ സുഗമാക്കാൻ മണ്ണുമാന്ത്രിയന്ത്രം ഉ​പയോഗിച്ചുള്ള ജോലികൾ ആരംഭിച്ചുവെന്നും ഇത്​ നിരീക്ഷിക്കാൻ ആലപ്പുഴ നഗരസഭ സെക്രട്ടറിയെ ചുമലപ്പെടുത്തിയെന്നും കളക്​ടർ ഉറപ്പുനൽകി.

ദേശീയ ​പാതക്കായി നിർമ്മിച്ച കാനകൾ ഉയരത്തിലായതും വീടുകളിലേക്ക് വെള്ളംഇരച്ചുകയറുന്നതിന്​ കാരണമായി. മഴ കനത്തതോടെ പലരും ബന്ധുവീടുകളിൽ അഭയംതേടിയിരിക്കുകയാണ്.

തോടുകൾ മൂടി, ഓടകൾ അടഞ്ഞു

 ദേശീയപാത നിർമ്മണത്തിന്റെ ഭാഗമായി തോടുകൾ മൂടിയതും ഓടയും സർവിസ് റോഡും അടഞ്ഞതാണ് ​ പ്രശ്നത്തിന് കാരണം

 ആറാട്ടുവഴി, കളപ്പുര, കാഞ്ഞിരംചിറ വാർഡുകളിലെ അഞ്ഞൂറിലധികം വീടുകളിൽ ​വെള്ളംകയറിയത്​

 രണ്ടാഴ്ച മുമ്പ്​ വീടുകളിലും പരിസരത്തും നിറഞ്ഞ വെള്ളംഒഴുകിപോകാത്തതാണ്​ പ്രശ്നം

 ഇതിനൊപ്പം കാലവർഷംകൂടി എത്തിയതോടെ വീടുകളിൽ കൂടുതൽ വെളളമെത്തി

 മോട്ടോറുകളും വീട്ടുപകരങ്ങളും നശിച്ചതോടെയാണ്​ നാട്ടുകാർ പ്രതിഷേധവുമായി തെരുവിലിറങ്ങിയത്​

ആശാസ്ത്രീയമായാണ് ഓട നിർമ്മിച്ചിട്ടുള്ളത്. വീടുകൾക്കുള്ളിൽ വരെ വെള്ളമാണ്. ശാസ്ത്രീയമായി പരിശോധിച്ച് പ്രശ്നപരിഹാരം കാണണം

- ജയപാലൻ, പ്രദേശവാസി