കലാമണ്ഡലം പ്രഭാകരൻ തുള്ളലിന്റെ തുടിപ്പ് നെഞ്ചേറ്റി എൺപതിന്റെ നിറവിൽ

കണ്ണൂർ: മെക്കാനിക്കിന്റെ യൂണിഫോമിൽ നിന്ന് കലയുടെ വേഷപകർച്ചകളിലേക്ക്. അതാണ് കലാമണ്ഡലം പ്രഭാകരന്റെ ജീവിത യാത്ര. ഇന്ന് എൺപതാം ജന്മദിനത്തിലെത്തുന്ന ഈ പ്രതിഭ, അരങ്ങിൽ തുള്ളൽ കലയുടെ പര്യായമാണ്.
തുള്ളൽ കലയുടെ നവോത്ഥാന നായകനായ മലബാർ വി. രാമൻ നായരുടെ സഹോദരപുത്രനെന്ന നിലയിൽ, കലയുടെ രക്തം കൊണ്ട് തന്നെ എഴുതപ്പെട്ടതാണ് പ്രഭാകരന്റെ ജീവിത കഥ. 1945ൽ കാസർകോട് ജില്ലയിലെ ചെറുവത്തൂരിൽ കുട്ടമത്ത് കുഞ്ഞമ്പു നായരുടെയും മാക്കമ്മയുടെയും മകനായാണ് ജനനം.
പതിനഞ്ചാം വയസ്സിൽ കേരള കലാമണ്ഡലത്തിന്റെ വാതിൽപ്പടി കടന്നത്, ഒരു സ്വപ്നത്തിന്റെ ആരംഭമായിരുന്നു. 1962ൽ കിരാതം കഥയിലൂടെ അരങ്ങിലിറങ്ങിയ കൗമാരക്കാരൻ, രണ്ട് വർഷങ്ങൾക്കുള്ളിൽ തുള്ളലിൽ ഡിപ്ലോമ നേടി വൈദഗ്ദ്ധ്യം തെളിയിച്ചു.
കലയിൽ നിന്ന് മാത്രം ഉപജീവനം സാധ്യമല്ലെന്ന് മനസ്സിലാക്കിയപ്പോൾ, മെക്കാനിക്കിന്റെ തൊഴിൽ സ്വീകരിക്കേണ്ടി വന്നു. 1972ൽ തിരുവനന്തപുരം കെ.എസ്.ആർ.ടി.സി സെൻട്രൽ വർക്ക്‌ഷോപ്പിൽ വർക്ക് അസിസ്റ്റന്റ് ആയി ചേർന്നു.
പകൽ മുഴുവൻ യന്ത്രഭാഗങ്ങളുമായി മല്ലിടുന്ന പ്രഭാകരൻ വൈകുന്നേരങ്ങളിൽ കലയുടെ മണ്ഡലത്തിൽ വിഹരിക്കും. 2000ൽ എറണാകുളം ഡിപ്പോ ചാർജുമാനായി വിരമിച്ചപ്പോഴേക്കും, അദ്ദേഹം കേവലം ഒരു ഗതാഗത വകുപ്പ് ജീവനക്കാരൻ എന്നതിലുപരി, തുള്ളൽക്കലയുടെ അഭിമാനമായി മാറി.
ലോക്ക്ഡൗൺ കാലത്തും കലയെ ജനങ്ങളിലേക്കെത്തിക്കാനുള്ള ദൗത്യത്തിൽ നിന്ന് പ്രഭാകരൻ പിന്തിരിഞ്ഞില്ല. 'കുഞ്ചൻ നർമചിന്തകൾ' എന്ന പേരിൽ പത്ത് വീഡിയോകൾ സോഷ്യൽ മീഡിയയിലൂടെ പ്രചരിപ്പിച്ചത്, സാങ്കേതികവിദ്യയും പാരമ്പര്യവും കൂട്ടിച്ചേർക്കാനുള്ള അദ്ദേഹത്തിന്റെ കഴിവിന് തെളിവായി. പിറന്നാൾ ആഘോഷത്തെപ്പറ്റിയുള്ള ചോദ്യത്തിന് കലയിൽ ജീവിക്കാനാകുന്നതാണ് ആഘോഷം എന്നായിരുന്നു മറുപടി.

എറണാകുളം എളമക്കരയിലെ സൗഗന്ധികത്തിൽ ഭാര്യ വത്സലയോടൊപ്പം താമസം. മൂത്തമകൻ വടുതല ചിന്മയ വിദ്യാലയം അദ്ധ്യാപകനായ പ്രവീൺ തുള്ളലിലും മൃദംഗത്തിലും പ്രാവീണ്യം നേടി. രണ്ടാമത്തെ മകൻ ഡോ. പ്രവാസ് (വകുപ്പ് മേധാവി, മഹാരാജാസ് കോളേജ്). മകൾ ചേർത്തല എൻ.എസ്.എസ്. കോളേജ് അസി. പ്രൊഫസർ പ്രവീണ തുള്ളലും നൃത്തവും അഭ്യസിച്ച കലാകാരിയാണ്.

അംഗീകാരങ്ങൾ
കേന്ദ്ര സംഗീത നാടക അക്കാഡമിയുടെ അമൃത് പുരസ്‌കാരം മുതൽ വിവിധ സംസ്ഥാനദേശീയ ബഹുമതികൾ വരെ തേടിയെത്തിയിട്ടുണ്ട്. പാരമ്പര്യത്തോടുള്ള ആദരവും നവീകരണത്തിനുള്ള ധൈര്യവും സമന്വയിപ്പിച്ചതാണ് പ്രഭാകരന്റെ കലാദർശനം. 2003ൽ സൂര്യ ഫെസ്റ്റിവലിൽ അരങ്ങേറിയ 'തുള്ളൽത്രയം' അതിന്റെ ഏറ്റവും മികച്ച ഉദാഹരണമാണ്. ഓട്ടൻ, പറയൻ, ശീതങ്കൻ എന്നീ മൂന്ന് തുള്ളൽ രൂപങ്ങളും ഒരൊറ്റ അവതരണത്തിൽ കൂട്ടിയിണക്കിയ ഈ സംരംഭം, കലാരൂപത്തിന്റെ സാധ്യതകളെ പുനർനിർവചിച്ചു. കുഞ്ചൻ നമ്പ്യാരുടെ മൊഴികളെ സംഗീതാത്മകമായി അണിനിരത്തി 2005ൽ അവതരിപ്പിച്ച 'കുഞ്ചൻ സംഗീത സായാഹ്നം' വേറൊരു നാഴികക്കല്ലായി. കലാമണ്ഡലം സർവകലാശാലയുടെ ഭരണസമിതി അംഗം, തുള്ളൽ വിഭാഗം വിസിറ്റിംഗ് പ്രൊഫസർ, മലയാളം സർവകലാശാലാ സെനറ്റ് അംഗം തുടങ്ങിയ സ്ഥാനങ്ങളിലൂടെ കലാവിദ്യാഭ്യാസ രംഗത്തും അദ്ദേഹം സജീവ പങ്കാളിയായി.