യുവതിയെയും ഇരട്ടക്കുട്ടികളെയും കൊലപ്പെടുത്തിയ സംഭവം: മുൻ സൈനികർ 18 വർഷത്തിന് ശേഷം പിടിയിൽ

കൊല്ലം: കൊല്ലം അഞ്ചൽ അലയമണിൽ അവിവാഹിതയായ യുവതിയെയും 17 ദിവസം മാത്രം പ്രായമുള്ള ഇരട്ട പെൺകുട്ടികളെയും കൊലപ്പെടുത്തിയ കേസിൽ കാമുകൻ ഉൾപ്പെട്ട രണ്ടു മുൻ സൈനികരെ 18 വർഷത്തിന് ശേഷം പോണ്ടിച്ചേരിയിൽ നിന്ന് സി.ബി.ഐ ചെന്നൈ യൂണിറ്റ് പി​ടി​കൂടി​. അലയമൺ രജനി വിലാസത്തിൽ രഞ്ജി​നിയേയും (23) പിഞ്ചുകു‌ഞ്ഞുങ്ങളെയും കൊലപ്പെടുത്തിയ സംഭവത്തിൽ ആർമിയുടെ പഠാൻകോട്ട് റെജിമെന്റിലെ മുൻ സൈനികരായ അഞ്ചൽ സ്വദേശി ദിബിൽ കുമാർ, കണ്ണൂർ സ്വദേശി രാജേഷ് എന്നിവരാണ് പിടിയിലായത്.

2006 ഫെബ്രുവരി 10നാണ് രഞ്ജി​നിയും കുടുംബവും വാടകയ്ക്ക് താമസിച്ചിരുന്ന അഞ്ചൽ ഏറത്തെ വാടക വീട്ടിൽ കൊലപാതകം നടന്നത്. . രഞ്ജി​നിയുടെ അമ്മ ശാന്തമ്മ രാവിലെ 10 മണിയോടെ പഞ്ചായത്ത് ഓഫീസിൽ പോയി. ഉച്ചയ്ക്ക് ഒന്നോടെ തിരികെ വന്നപ്പോൾ രഞ്ജി​നിയെ നിലത്തും കുഞ്ഞുകളെ തൊട്ടിലിലും കട്ടിലിലുമായി കഴുത്തറുത്ത് രക്തം വാർന്ന് മരിച്ച നിലയിൽ കണ്ടെത്തുകയായിരുന്നു. ഇവരുടെ വാടകവീട്ടിൽ താമസിച്ചിരുന്ന മറ്റൊരു കുടുംബം സംഭവ ദിവസം രാജേഷ് അവിടെ വന്നുപോകുന്നതായി കണ്ടിരുന്നു. അതിൽ നിന്നാണ് കൊലപാതകത്തിന് പിന്നിൽ ദിബിൽകുമാറും രാജേഷുമാണെന്ന് പൊലീസ് തിരിച്ചറിഞ്ഞത്.

ദിബിൽകുമാർ ബലാത്സംഗം ചെയ്താണ് താൻ ഗർഭിണിയായതെന്ന് രഞ്ജി​നി പൊലീസിന് പരാതി നൽകിയിരുന്നു. വിവാഹം കഴിക്കണമെന്നും ആവശ്യപ്പെട്ടു. ഗർഭം അലസി​പ്പി​ക്കണമെന്ന് ദി​ബി​ൽകുമാർ ആവശ്യപ്പെട്ടു. എന്നാൽ രഞ്ജി​നി​ അംഗീകരി​ച്ചി​ല്ല.

ഇതോടെയാണ് സഹപ്രവർത്തകനായ രാജേഷുമായി ചേർന്ന് കൊലപാതകം ആസൂത്രണം ചെയ്തത്. പ്രതികൾക്കായി പൊലീസ് രാജ്യമാകെ തിരച്ചിൽ നടത്തിയെങ്കിലും കണ്ടെത്താനായില്ല. ഇതോടെ രഞ്ജി​നിയുടെ കുടുംബം ഹൈക്കോടതിയെ സമീപിച്ചു. ഹൈക്കോടതി ഉത്തരവ് പ്രകാരം 2008ൽ, കേരളത്തിലെ കേസുകൾ അന്വേച്ചിരുന്ന സി.ബി.ഐ ചെന്നൈ യൂണിറ്റിന് കേസ് കൈമാറി​. അടുത്തിടെ ലഭിച്ച രഹസ്യവിവരത്തിന്റെ അടിസ്ഥാനത്തിലാണ് പോണ്ടിച്ചേരിയിൽ മറ്റ് പേരുകളിൽ കുടുംബസമേതം താമസിക്കുകയായിരുന്ന പ്രതികളെ സി.ബി.ഐ സംഘം പിടികൂടിയത്. പ്രതികളെ വൈകാതെ അഞ്ചലിൽ എത്തിച്ച് തെളിവെടുപ്പ് നടത്തും.

 കൊലപാതകത്തിന് പിന്നിൽ

സമീപവാസികളായ രഞ്ജി​നിയും ദിബിൽകുമാറും അടുപ്പത്തിലായിരുന്നു. ഇതിനിടെ അമ്മ ശാന്തമ്മ തിരുവനന്തപുരത്ത് ആശുപത്രിയിൽ ചികിത്സയ്ക്ക് പോയി. ചികിത്സയ്ക്കുള്ള പണം എടുക്കാൻ ഒറ്റയ്ക്ക് വീട്ടിലേക്ക് എത്തിയ രഞ്ജി​നിയെ ദിബിൽകുമാർ ബലാത്സംഗം ചെയ്ത് ഗർഭിണിയാക്കിയെന്ന് ബന്ധുക്കൾ പറയുന്നു. എന്നാൽ ഈ വിവരം അമ്മയടക്കമുള്ള കുടുംബാംഗങ്ങൾ അറിഞ്ഞിരുന്നില്ല. ആറാം മാസം ശാരീരിക അസ്വസ്ഥതകളെ തുടർന്ന് നടത്തിയ പരിശോധനയിലാണ് ഗർഭിണിയാണെന്ന വിവരം അറിഞ്ഞത്. ഇതോടെ രഞ്ജി​നി പൊലീസിലും മനുഷ്യാവകാശ കമ്മിഷനിലും പരാതി നൽകി. വിവാഹം കഴിക്കണമെന്ന ആവശ്യം ദിബിൽകുമാർ നിരസിച്ചു. രഞ്ജി​നി ഇരട്ടക്കുഞ്ഞുങ്ങൾക്ക് ജന്മം നൽകിയോടെ ഡി.എൻ.എ പരിശോധന നടത്തണമെന്ന് മനുഷ്യാവകാശ കമ്മിഷൻ ആവശ്യപ്പെട്ടു. അതിന് പിന്നാലെ സൈന്യത്തിൽ നിന്ന് ദിബിൽകുമാറും രാജേഷും അവധിയെടുത്ത് നാട്ടിലെത്തി കൃത്യം നടപ്പാക്കി സ്ഥലം വിടുകയായിരുന്നു.

 തൊട്ടരികിൽ ഉണ്ടായി​രുന്നു പ്രതി​കൾ

പ്രതികൾക്കായി പൊലീസും സി.ബി.ഐയും രാജ്യമാകെ തിരഞ്ഞപ്പോഴും കേരളത്തിന് തൊട്ടരികിൽ പോണ്ടിച്ചേരിയിൽ ഒളിവിൽ കഴിയുകയായിരുന്നു ഇവർ. ദിബിൽകുമാർ വിഷ്ണു എന്ന പേരിൽ വ്യാജ തിരിച്ചറിയൽ കാർഡും ആധാറുമെടുത്ത് ഭാര്യയ്ക്കും രണ്ട് പെൺമക്കൾക്കുമൊപ്പമാണ് പോണ്ടിച്ചേരിയിൽ താമസിച്ചിരുന്നത്. അവിടെ ഇന്റീരിയർ ഡിസൈൻ സ്ഥാപനം നടത്തുകയായിരുന്നു. രഹസ്യവവിരത്തെ തുടർന്ന് പോണ്ടിച്ചേരിയിലെത്തിയ സി.ബി.ഐ സംഘം ആദ്യം വിവരങ്ങൾ ആരാഞ്ഞപ്പോൾ ദിബിൽകുമാർ വഴങ്ങിയില്ല. പിന്നീട് ഇരുവരെയും കസ്റ്റഡിയിലെടുത്ത് നടത്തിയ ചോദ്യം ചെയ്യലിലാണ് തങ്ങൾ ദിബിൽകുമാറും രാജേഷുമാണെന്ന് വെളിപ്പെടുത്തിയത്.

............................

 അവധിയെടുത്ത് വകവരുത്തി

രഞ്ജിനിയെ വകവരുത്താൻ 2006 ജനുവരിയിലാണ് ഏപ്രിൽ വരെ അവധിയെടുത്ത് ദിബിൽകുമാറും രാജേഷും നാട്ടിലേക്ക് വന്നത്. പ്രതികൾ നോപ്പാളിലേക്കും ദുബായിലേക്കും കടന്നുവെന്ന് അഭ്യൂഹം പരന്നിരുന്നു. രാജ്യാന്തര തലത്തിൽ സി.ബി.ഐ ലുക്ക് ഔട്ട് നോട്ടീസും പുറപ്പെടുവിച്ചു. പ്രതികളെക്കുറിച്ച് വിവരം നൽകുന്നവർക്ക് രണ്ട് ലക്ഷം രൂപ ഇനം പ്രഖ്യാപിച്ചിരുന്നു. പ്രതികളെ ഒളിവിലിട്ട് സി.ബി.ഐ 2012ൽ കേസിന്റെ കുറ്റപത്രം സമർപ്പിച്ചു. വിശദമായി ചോദ്യം ചെയ്ത് കുടുതൽ തെളിവുകളും സാക്ഷികളും സഹിതം സി.ബി.ഐ വൈകാതെ അനുബന്ധ കുറ്റപത്രം നൽകും.