ശസ്ത്രക്രി​യയുടെ വേദന മറന്ന് അച്ഛനെത്തി

തി​രുവനന്തപുരം: ആശുപത്രി കിടക്കയിൽ നിന്ന് മകളുടെ മത്സരം കാണാനെത്തിയ പിതാവി​ന്റെ ആഗ്രഹം പോലെ കഥകളി​യി​ൽ എ ഗ്രേഡ് സ്വന്തമാക്കി പതാരം എസ്.എം.എച്ച്.എസ്‌.എസിലെ പ്ലസ്ടു വിദ്യാർത്ഥിനി അഞ്ജലി കൃഷ്‌ണ. കൊല്ലം മണ്ണൂർക്കാവ് ക്ഷേത്രത്തിലെ കഥകളി കലാകേന്ദ്രത്തിൽ പത്ത് വർഷമായി കഥകളി അഭ്യസിക്കുകയാണ് അഞ്ജലി. ഇത് മൂന്നാം തവണയാണ് സംസ്ഥാന കലോത്സവ വേദിയിലെത്തുന്നത്. എത്തിയപ്പോഴെല്ലാം എ ഗ്രേഡ് സ്വന്തമാക്കി.

മകളുടെ അവസാന സ്‌കൂൾ കലോത്സവമായതിനാലാണ്, ബി.എസ്‌.എൻ.എൽ ഉദ്യോഗസ്ഥനായ അച്ഛൻ രാധാകൃഷ്‌ണ പിള്ള ബുദ്ധി​മുട്ടുകൾ മറന്ന് എത്തിയത്. കാലിനുള്ള പ്രയാസങ്ങൾ ഉൾപ്പെടെ മാറ്റി​വച്ച് കരുനാഗപ്പള്ളിയിൽ നിന്നു തിരുവനന്തപുരത്ത് എത്തുകയായി​രുന്നു.

കലാമണ്ഡലം പ്രശാന്തി​ന്റെ കീഴിലാണ് അഞ്ജലി കഥകളി അഭ്യസിക്കുന്നത്. കഴിഞ്ഞ മൂന്ന് തവണയും രണ്ട് ഇനങ്ങളി​ൽ പങ്കെടുത്ത് എ ഗ്രേ‌ഡ് നേടി. ഇത്തവണയും വഞ്ചിപ്പാട്ടിൽ ലീഡ് പാടുന്നത് അഞ്ജലിയാണ്. ഇതുവരെ 100ലധികം വേദികളിൽ അഞ്ജലി കൃഷ്‌ണ കഥകളി അവതരിപ്പിച്ചിട്ടുണ്ട്. പിന്തുണയുമായി തഴവ എ.വി.എച്ച്‌.എസ്‌.എസ് അദ്ധ്യാപികയായ അമ്മ ഐറിനും ബി.ഫാം മൂന്നാം വർഷ വിദ്യാർത്ഥിയായ സഹോദരനുമുണ്ടാകും.