കെ.വി.ഇറവങ്കര കഥകളി പുരസ്കാരം സമർപ്പിച്ചു

കൊല്ലം : കെ.വി.ഇറവങ്കര സ്മാരക ട്രസ്റ്റ് ഏർപ്പെടുത്തിയ കെ.വി.ഇറവങ്കര സ്മാരക കഥകളി പുരസ്കാരം കഥകളി നടൻ കലാമണ്ഡലം കൃഷ്ണപ്രസാദിന് സമർപ്പിച്ചു. കലാശ്രേഷ്ഠ പുരസ്കാരം കഥകളി നടി കൊട്ടാരക്കര ഗംഗയ്ക്കും യുവകലാകാരനുള്ള പുരസ്കാരം തബല കലാകാരനായ അനിൽ പട്ടാഴിക്കും സമർപ്പിച്ചു. പട്ടാഴി ദേവീക്ഷേത്ര ഓഡിറ്റോറിയത്തിൽ നടന്ന ചടങ്ങിൽ കൊട്ടാരക്കര ഡിവൈ.എസ്.പി കെ.ബൈജുകുമാർ പുരസ്കാര സമർപ്പണം നടത്തി. കലാകാരനും എഴുത്തുകാരനും കഥകളി സംഘാടകനുമായിരുന്ന കെ.വി.ഇറവങ്കരയുടെ ചരമ വാർഷികവുമായി ബന്ധപ്പെട്ടാണ് പുരസ്കാരങ്ങൾ ഏർപ്പെടുത്തിയത്. 10,001 രൂപയും ഫലകവും അടങ്ങുന്നതാണ് കഥകളി പുരസ്കാരം. മറ്റ് രണ്ട് പുരസ്കാരങ്ങൾക്കും 5001 രൂപയും ഫലകവുമാണുള്ളത്. തുടർന്ന് 'നളചരിതം മൂന്നാം ദിവസം' കഥകളി അവതരണവും ഉണ്ടായിരുന്നു.