സൗജന്യ ദന്തൽ, മെഡിക്കൽ ക്യാമ്പ്

കൊല്ലം: ലോക വനിത ദിനത്തോടനുബന്ധിച്ച് ചാത്തന്നൂർ എസ്.ബി.ഐ ബ്രാഞ്ചും നെടുങ്ങോലം ബി.ആർ ഹോസ്പിറ്റൽ ആൻഡ് റിസർച്ച് സെന്ററും സംഘടി​പ്പി​ച്ച സൗജന്യ ദന്തൽ ക്യാമ്പ് ബി.ആർ ഹോസ്പിറ്റൽ ചീഫ് പീഡിയാട്രിക് ഡെന്റിസ്റ്റ് ഡോ. വിനയ് കവിരാജ് ഉദ്ഘാടനം ചെയ്തു. എസ്.ബി.ഐ ബ്രാഞ്ച് ചീഫ് മാനേജർ ജി​.എസ്. ബിജു അദ്ധ്യക്ഷത വഹിച്ചു. ദന്തസംരക്ഷണത്തിന്റെ പ്രാധാന്യത്തെ കുറിച്ചുള്ള അവബോധം ഇല്ലായ്മയും പ്രതിരോധ മാർഗ്ഗങ്ങൾ സ്വീകരിക്കുന്നതിനുള്ള വിമുക്തതയും രോഗം നേരത്തെ കണ്ടെത്താൻ കഴിയാത്തതും ദന്തക്ഷയം കൂടുന്നതിന് കാരണമാകുന്നതായി ഡോ. വിനയ് വി​ശദീകരി​ച്ചു. സ്ത്രീ ശാക്തീകരണം, കുടുംബശ്രീകളുടെ പങ്ക്, ബാങ്കിംഗ് മേഖലയിൽ സ്ത്രീകൾ വഹിച്ച നേട്ടം എന്നിവയെക്കുറിച്ച് ജി​.എസ്. ബിജു സംസാരിച്ചു. എസ് ബി ഐ ജനറൽ ഇൻഷ്വറൻസ് ക്ലസ്റ്റർ സെയിൽസ് മാനേജർ ജി​.എൽ. സിജോ, ചിറക്കര ഗ്രാമപഞ്ചായത്ത് സി.ഡി.എസ് ചെയർപേഴ്സൺ റീജ ബാലകൃഷ്ണൻ, ചാത്തന്നൂർ ഗ്രാമപഞ്ചായത്ത് സി.ഡി.എസ് ചെയർപേഴ്സൺ ലൈല, വാർഡ് മെമ്പർ ലീലാമ്മ ചാക്കോ തുടങ്ങിയവർ സംസാരിച്ചു.