തി​രുവോണ ദി​വസം യുവാവിനെ വീട്ടി​ൽ കയറി​ കുത്തി​ക്കൊന്നു

പുത്തൂർ: യുവാവിനെ തിരുവോണ ദിവസം രാത്രി യുവാവി​നെ വീട്ടി​ലെത്തി​ കുത്തിക്കൊന്ന കേസി​​ൽ അയൽവാസി അറസ്റ്റിൽ. പുത്തൂർ തേവലപുറം മാറനാട് കുഴക്കാട് പേർഷ്യൻ മുക്കിൽ ചോതി നിവാസിൽ ശ്യാം സുന്ദറി​നെയാണ് (42) അയൽവാസി ധനേഷ് മന്ദിരത്തിൽ ധനേഷ് (38) കൊലപ്പെടുത്തി​യത്.

പൊലീസ് പറയുന്നത്: രാത്രി 11:30 നാണ് സംഭവം. മുൻ വൈരാഗ്യമാണ് കൊലപാതകത്തിനുള്ള കാരണം എന്നതാണ് പ്രാഥമിക നിഗമനം. ശ്യാമിന്റെ ഭാര്യ പ്രതിയായ ധനേഷിനൊപ്പം വർഷങ്ങൾക്കു മുമ്പ് ഇറങ്ങിപ്പോവുകയും പി​ന്നീട് മരണമടയുകയും ചെയ്തി​രുന്നു. ശ്യാം ഇപ്പോൾ താമസിക്കുന്ന സ്ഥലവുമായി ബന്ധപ്പെട്ട് ഇരുകൂട്ടരും തമ്മിൽ തർക്കമുണ്ട്. കഴിഞ്ഞ ദിവസങ്ങളിൽ വാക്കേറ്റവുമുണ്ടായി​. വെള്ളിയാഴ്ച രാത്രിയോടെ ശ്യാം സുന്ദറിന്റെ വീട്ടിലെത്തിയ ധനേഷ് വഴക്കുണ്ടാക്കുകയും കൈയി​ൽ കരുതിയിരുന്ന കറിക്കത്തി ഉപയോഗിച്ച് കുത്തുകയുമായിരുന്നു. തുടർന്ന് സുഹൃത്തിനെ ഫോണി​ൽ വിളിച്ച് താൻ ശ്യാം സുന്ദറി​ന് ഒരു പണികൊടുത്തിട്ടുണ്ടെന്ന് പറഞ്ഞു. വി​വരമറി​ഞ്ഞ് രാത്രിയിൽ തന്നെ പുത്തൂർ പൊലീസ് പ്രതിയെ വീടി​ന് സമീപത്തുനിന്ന് കസ്റ്റഡിയിലെടുത്തു. പ്രതി ഉപയോഗിച്ച ആയുധവും സമീപത്തു നിന്നു കണ്ടെടുത്തു. ധനേഷ് കൊട്ടാരക്കര കെ.എസ്.അർ.ടി.സി സ്വി​ഫ്റ്റ് ബസി​ലെ താത്കാലി​ക ഡ്രൈവറാണ്. കൊട്ടാരക്കര ഡിവൈ.എസ്.പി ജി.ബി​ മുകേഷിന്റെ മേൽനോട്ടത്തിൽ പുത്തൂർ സി.ഐ ബാബു കുറുപ്പ്, എസ്‌.ഐ ജയേഷ് എന്നിവരുടെ നേതൃത്വത്തിലാണ് പ്രതിയെ അറസ്റ്റ് ചെയ്തത്. കോടതിയിൽ ഹാജരാക്കി റിമാൻഡ് ചെയ്തു. ശ്യാംസുന്ദറിന്റെ മൃതദേഹം പാരിപ്പള്ളി മെഡി. ആശുപത്രിയിൽ പോസ്റ്റ്മാർട്ടത്തിന് ശേഷം വീട്ടുവളപ്പിൽ സംസ്കരിച്ചു.