12-ാം വയസിൽ സ്മാർട്ട്ഫോൺ; 14-ാം വയസിൽ ഈ ലക്ഷണങ്ങൾ കൗമാരക്കാരിൽ ഉണ്ടെങ്കിൽ ശ്രദ്ധിക്കുക, പ്രശ്നങ്ങൾ ഉണ്ടാകുമെന്ന് പഠനം

പുറത്തേക്കിറങ്ങി ചുറ്റും നോക്കിയാൽ മിക്ക കുട്ടികളുടെ കൈയിലും ഇന്ന് സ്മാർട്ട് ഫോണുകൾ കാണും. ഇപ്പോഴിതാ കുട്ടികളിലെ അമിതമായ സ്‌മാർട്ട് ഫോൺ അഡിക്ഷൻ ഭക്ഷണക്രമവുമായി ബന്ധപ്പെട്ട് എങ്ങനെ പ്രശ്നങ്ങൾ സൃഷ്‌ടിക്കുമെന്നാണ് പുതിയ പഠനം വ്യക്തമാക്കുന്നത്.12ാം വയസിൽ സ്മാർട്ട്‌ഫോൺ ഉപയോഗിച്ചിരുന്ന കൗമാരക്കാർ 14ാം വയസിൽ ഭക്ഷണക്രമവുമായി ബന്ധപ്പെട്ട ചില പ്രശ്നങ്ങളുടെ ലക്ഷണങ്ങൾ കാണിക്കാനുള്ള സാദ്ധ്യത കൂടുതലാണെന്നാണ് പഠനത്തിലെ കണ്ടെത്തൽ.

അമേരിക്കയിൽ നിന്നുള്ള ഒരു പ്രസിദ്ധീകരണത്തിൽ വന്ന പഠനത്തിലായിരുന്നു ഈ വിവരങ്ങൾ ഉൾപ്പടുത്തിയിരിക്കുന്നത്. 12ാം വയസിൽ സ്മാർട്ട്‌ഫോൺ സ്വന്തമായുണ്ടായിരുന്ന കുട്ടികളിൽ 14ാം വയസിൽ അമിതമായി ഭക്ഷണം കഴിക്കുന്ന പ്രവണത, ശരീരഭാരം കൂടുന്നത് തടയാൻ അനാരോഗ്യകരമായ മാർഗങ്ങൾ തേടുക, ശരീരഭാരവുമായി സ്വന്തം മൂല്യത്തെ നിർണയിക്കുക തുടങ്ങിയ ലക്ഷണങ്ങൾ കൂടുതലായി കണ്ടെത്തിയിരുന്നു.

12, 14 വയസിലുള്ള കൗമാരക്കാരുടെ കാര്യം എടുത്താൽ അമിതമായി ഭക്ഷണം കഴിക്കുന്നതുമായി ബന്ധപ്പെട്ട ലക്ഷണം 67 ശതമാനം കൂടുതലാണ്. 50 ശതമാനം പേരിലാണ് ശരീരഭാരം കൂടുന്നത് തടയാൻ അനാരോഗ്യകരമായ മാർഗങ്ങൾ സ്വീകരിക്കാനുള്ള സാദ്ധ്യത. സ്വന്തം മൂല്യം ശരീരഭാരവുമായി ബന്ധിപ്പിച്ച് പറയാനുള്ള സാദ്ധ്യത സ്മാർട്ട്‌ഫോൺ ഉപയോഗിച്ചിരുന്ന കുട്ടികളിൽ ഏകദേശം ഇരട്ടിയായിരുന്നു.

കുറഞ്ഞത് ഒരു ഭക്ഷണക്രമവുമായി ബന്ധപ്പെട്ട പ്രശ്നത്തിന്റെ ലക്ഷണമെങ്കിലും റിപ്പോർട്ട് ചെയ്യാനുള്ള സാദ്ധ്യത 49 ശതമാനം കൂടുതലായിരുന്നുവെന്നും പഠനം പറയുന്നു. 12ാം വയസിൽ സ്മാർട്ട്‌ഫോൺ ഉണ്ടായിരുന്നവരിൽ 24.2 ശതമാനം പേർ 14ാം വയസിൽ കുറഞ്ഞത് ഒരു ലക്ഷണമെങ്കിലും റിപ്പോർട്ട് ചെയ്തു. സ്മാർട്ട്‌ഫോൺ ഇല്ലാതിരുന്നവരിൽ ഇത് 15.5 ശതമാനമായിരുന്നു. 12നും 14നും ഇടയിൽ പ്രായമുള്ള കുട്ടികളുടെ ശാരീരികവും മാനസികവുമായ മാറ്റങ്ങളുടെ ഘട്ടമാണിത്. പ്രായപൂർത്തിയാകുന്നതിന്റെ ഭാഗമായി ശരീരത്തിൽ സ്വാഭാവികമായ മാറ്റങ്ങൾ ഉണ്ടാകുന്നതിനൊപ്പം സ്വന്തം രൂപത്തെക്കുറിച്ചും മറ്റുള്ളവർ എങ്ങനെ കാണുന്നു എന്നതിനെക്കുറിച്ചുമുള്ള ബോധവും വർദ്ധിക്കും.

സോഷ്യൽ മീഡിയയിലൂടെ ശരീരഘടന, ഭക്ഷണക്രമം, വ്യായാമം, ഭാരം കുറയ്ക്കൽ തുടങ്ങിയ വിഷയങ്ങളുമായി ബന്ധപ്പെട്ട നിരവധി ഉള്ളടക്കങ്ങളാണ് കുട്ടികളിലേക്ക് എത്തുന്നത്. ഇത്തരം ഉള്ളടക്കങ്ങൾ ശരീരത്തെക്കുറിച്ചുള്ള കുട്ടികളുടെ കാഴ്ചപ്പാടിനെ സ്വാധീനിച്ചേക്കാമെന്നാണ് ഗവേഷകർ ചൂണ്ടിക്കാട്ടുന്നത്. ശരീരഭാരം കൂടുമെന്ന ആശങ്കയും സ്മാർട്ട്‌ഫോൺ ഉപയോഗവും തമ്മിലുള്ള ബന്ധം പരിശോധിച്ചപ്പോൾ പെൺകുട്ടികളിലാണ് ശ്രദ്ധേയമായ ബന്ധം കണ്ടെത്തിയത്.

സ്മാർട്ട്‌ഫോൺ കാരണമാണെന്ന് പഠനം പറയുന്നില്ല

എന്നാൽ സ്മാർട്ട്‌ഫോൺ ഉപയോഗമാണ് ഇത്തരം പ്രശ്നങ്ങൾക്ക് നേരിട്ട് കാരണമാകുന്നതെന്ന് പഠനം തെളിയിക്കുന്നില്ലെന്ന് ഗവേഷകർ വ്യക്തമാക്കി. പഠനം നിരീക്ഷണാടിസ്ഥാനത്തിലുള്ളതായതിനാൽ കാരണ–ഫല ബന്ധം ഉറപ്പിക്കാനാകില്ല. കുടുംബ സാഹചര്യം, സോഷ്യൽ മീഡിയ ഉപയോഗത്തിന്റെ സ്വഭാവം, മാനസികാരോഗ്യം തുടങ്ങിയ മറ്റ് ഘടകങ്ങൾക്കും ഇതിൽ പങ്കുണ്ടാകാം. അതിനാൽ സ്മാർട്ട്‌ഫോൺ ഉപയോഗവും ഭക്ഷണക്രമവുമായി ബന്ധപ്പെട്ട പ്രശ്നങ്ങളും തമ്മിലുള്ള ബന്ധം കൂടുതൽ മനസിലാക്കാൻ കൂടുതൽ പഠനങ്ങൾ ആവശ്യമാണെന്നും ഗവേഷകർ പറഞ്ഞു.

കുട്ടികൾക്ക് ഫോൺ നൽകുമ്പോൾ ശ്രദ്ധിക്കേണ്ടത്

എല്ലാ കുട്ടികൾക്കും സ്മാർട്ട്‌ഫോൺ നൽകേണ്ട കൃത്യമായ പ്രായം പഠനം നിർദേശിക്കുന്നില്ല. കുട്ടിയുടെ പ്രായം, പക്വത, ഫോൺ ഉപയോഗിക്കേണ്ടതിന്റെ ആവശ്യകത, ഓൺലൈൻ ഉള്ളടക്കം കൈകാര്യം ചെയ്യാനുള്ള കഴിവ് എന്നിവ മാതാപിതാക്കൾ പരിഗണിക്കണം. ഭക്ഷണം കഴിക്കുന്ന സമയത്തും ഉറങ്ങുന്നതിന് മുമ്പും ഫോൺ ഉപയോഗിക്കുന്നത് ഒഴിവാക്കുക, രക്ഷാകർതൃ നിയന്ത്രണ സംവിധാനങ്ങൾ ഉപയോഗിക്കുക, കുട്ടികൾ ഓൺലൈനിൽ കാണുന്ന കാര്യങ്ങളെക്കുറിച്ച് അവരുമായി തുറന്ന് സംസാരിക്കുക തുടങ്ങിയവ സഹായകരമാകാം.

സോഷ്യൽ മീഡിയയിലെ ചിത്രങ്ങൾ പലപ്പോഴും തിരഞ്ഞെടുത്തതോ എഡിറ്റ് ചെയ്തതോ ആയിരിക്കാമെന്നും ഒരു പ്രത്യേക ശരീരഘടന മാത്രമല്ല ആരോഗ്യത്തിന്റെ മാനദണ്ഡമെന്നും കുട്ടികളെ ബോധ്യപ്പെടുത്തേണ്ടതുണ്ട്.ഭക്ഷണം ഒഴിവാക്കുക, ശരീരഭാരം കൂടുന്നതിനെക്കുറിച്ച് അമിതമായ ഭയം പ്രകടിപ്പിക്കുക, ഇടയ്ക്കിടെ ഡയറ്റ് ചെയ്യുക, അമിതമായി ഭക്ഷണം കഴിക്കുക, അമിതമായി വ്യായാമം ചെയ്യുക, ശരീരഘടനയെക്കുറിച്ച് അമിതമായി ആശങ്കപ്പെടുക തുടങ്ങിയ മാറ്റങ്ങൾ ശ്രദ്ധയിൽപ്പെട്ടാൽ മാതാപിതാക്കൾ ആവശ്യമായ ശ്രദ്ധ നൽകണമെന്നും പഠനം ചൂണ്ടിക്കാട്ടുന്നു.