'ലോകത്തിലെ ഏറ്റവും വലിയ ആണവേതര ബോംബ് ഇറാനിലേക്ക്'; എന്താണ് അമേരിക്കയുടെ 'മദർ ഒഫ് ഓൾ ബോംബ്‌സ്'

ഇറാനെതിരെയുള്ള സൈനികനീക്കങ്ങളുടെ ഭാഗമായി അമേരിക്ക പുതിയ ആക്രമണ പദ്ധതികൾ തയ്യാറാക്കിയെന്ന റിപ്പോർട്ടുകൾക്കിടെ ചർച്ചയാവുകയാണ് 'മദർ ഒഫ് ഓൾ ബോംബ്‌സ്' എന്ന പേര്. ലോകത്തിലെ ഏറ്റവും ശക്തിയേറിയ ആണവേതര ബോംബുകളിലൊന്നായ 'മദർ ഒഫ് ഓൾ ബോംബ്‌സ്' ഇറാന്റെ ഊർജ അടിസ്ഥാന സൗകര്യങ്ങൾക്കും ആണവകേന്ദ്രങ്ങൾക്കും നേരെ പ്രയോഗിക്കുന്നത് അമേരിക്കയുടെ പദ്ധതികളിൽ ഉൾപ്പെടുന്നതായാണ് റിപ്പോർട്ടുകൾ.

അമേരിക്കൻ പ്രസി‌ഡന്റ് ഡൊണാൾഡ് ട്രംപ് ഇറാനെതിരായ സൈനിക നടപടികൾ പുനരാരംഭിക്കാൻ ഉത്തരവിട്ടാൽ ഈ ബോംബ് ഉപയോഗിക്കുമെന്നാണ് സൂചന. എന്നാൽ, ആക്രമണത്തിന് അന്തിമ അനുമതി നൽകിയിട്ടില്ലെന്നാണ് വിവരം. അതായത്, നിലവിൽ ഇത് പരിഗണനയിലുള്ള സൈനിക സാദ്ധ്യത മാത്രമാണ്. ആറുമാസത്തിലേറെയായി തുടരുന്ന സംഘർഷത്തിന് അന്ത്യം കുറിക്കാനുള്ള വഴികൾ ട്രംപ് ഭരണകൂടം തേടുന്നതിനിടെയാണ് പുതിയ റിപ്പോർട്ട് പുറത്തുവരുന്നത്. ഇറാൻ ആണവായുധം സ്വന്തമാക്കുന്നത് അനുവദിക്കില്ലെന്നാണ് ട്രംപിന്റെ നിലപാട്. അതേസമയം, യുദ്ധം അവസാനിപ്പിക്കണമെന്ന സമ്മർദവും അമേരിക്കൻ ഭരണകൂടം നേരിടുന്നുണ്ട്.

എന്താണ് 'മദർ ഒഫ് ഓൾ ബോംബ്‌സ്'?

അമേരിക്കൻ സൈന്യത്തിന്റെ ആയുധശേഖരത്തിലെ ഏറ്റവും വലിയ ആണവേതര ബോംബാണ് ജിബിയു-43/ബി മാസീവ് ഓർഡിനൻസ് എയർ ബാസ്റ്റ്. അതിന്റെ ഭീമാകാരമായ വലിപ്പവും സ്‌ഫോടനശേഷിയും കണക്കിലെടുത്താണ് 'മദർ ഒഫ് ഓൾ ബോംബ്‌സ്' (എംഒഎബി) എന്ന പേര് ലഭിച്ചത്.

ഏകദേശം 9.8 ടൺ ഭാരമുള്ള ബോംബ് വലിയൊരു ഭൂപ്രദേശത്താകെ അതിശക്തമായ സ്‌ഫോടനം സൃഷ്‌ടിക്കാനായി രൂപകൽപന ചെയ്‌തതാണ്. ഭൂമിയിൽ പതിക്കുന്നതിന് തൊട്ടുമുൻപ് പൊട്ടിത്തെറിച്ച് ചുറ്റുപാടുകളിലേക്ക് ആഘാതം വ്യാപിപ്പിക്കുന്നതാണ് ഇതിന്റെ പ്രവർത്തനരീതി. മാദ്ധ്യമ റിപ്പോർട്ടുകൾ പ്രകാരം, ഏകദേശം ഒൻപത് നഗരങ്ങളുടെ വലിപ്പമുള്ള പ്രദേശത്തെ തകർക്കാൻ ഈ ആയുധത്തിന് ശേഷിയുണ്ടെന്നാണ് വിലയിരുത്തൽ.

ഭൂമിക്കടിയിൽ ആഴത്തിൽ സ്ഥിതിചെയ്യുന്ന രഹസ്യ കേന്ദ്രങ്ങൾ തകർക്കാൻ പ്രത്യേകം രൂപകൽപന ചെയ്‌ത ബങ്കർ ബസ്റ്റർ ബോംബുകളിൽനിന്ന് എംഒഎബി വ്യത്യ‌സ്‌തമാണ്. ആഴത്തിലുള്ള പാറപ്പാളികളിൽ തുളച്ചുകയറുന്നതിന് പകരം വിശാലമായ പ്രദേശത്ത് നാശം വിതയ്‌ക്കാനാണ് ഇത് കൂടുതൽ അനുയോജ്യം. അതിനാൽ ഭൂഗർഭ ആണവ കേന്ദ്രങ്ങൾ തകർക്കാൻ ഈ ബോംബിന് എത്രത്തോളം കഴിയുമെന്നത് പ്രധാന ചോദ്യമാണ്.