ഫ്രാൻസ് ക്വാർട്ടറിൽ, പെനാൽറ്റിയിൽ പരാഗ്വെ കോട്ട തകർത്ത് തരിപ്പണമാക്കി

ടെക്സാസ്: പാരഗ്വായെ എതിരില്ലാത്ത ഒരു ഗോളിന് പ്രീക്വാർട്ടറിൽ കീഴടക്കി ഫ്രാൻസ് ലോകകപ്പ് ഫുട്ബോൾ ക്വാർട്ടറിൽ. കിലിയൻ എംബാപ്പെ പെനാൽ​റ്റിയിലൂടെയാണ് ഫ്രാൻസിന്റെ ഏകഗോൾ നേടിയത്. ലോകകപ്പിൽ ഇതുവരെ കളിച്ച എല്ലാ മത്സരങ്ങളും ജയിച്ചാണ് ഫ്രാൻസ് ക്വാർട്ടറിലെത്തിയത്.

കളിതുടങ്ങി ആദ്യമിനിറ്റുകളിൽ ചടുല നീക്കങ്ങൾകൊണ്ട് ഇരുടീമുകളും ഒപ്പത്തിനൊപ്പം മുന്നേറി. എന്നാൽ 28ാം മിനി​റ്റിൽ ഡീഗോ ഗോമസ് ഗോളിനടുത്തെത്തി.ആദ്യപകുതിയുടെ അവസാനം എംബാപ്പെയെ പാരഗ്വായ് താരങ്ങൾ നിരന്തരം ഫൗൾ ചെയ്തത് തർക്കത്തിന് വഴിവയ്ക്കുകയും ചെയ്തു.34ാം മിനി​റ്റിൽ എംബാപ്പെയെ ഫൗൾ ചെയ്തതിന് പിന്നാലെ ഇരുടീമുകളുടെയും താരങ്ങൾ ഏ​റ്റുമുട്ടുകയും ചെയ്തു. റഫറി ഇടപെട്ടാണ് രംഗം ശാന്തമാക്കിയത്. 38ാം മിനി​റ്റിലും എംബാപ്പെയെ പാരഗ്വായ് താരം ഫൗൾ ചെയ്തു. ഇതും തർക്കത്തിന് ഇടയാക്കി.

ആദ്യപകുതി ഗോൾരഹിതമായി അവസാനിച്ചതോടെ രണ്ടാം പകുതിയിൽ ഫ്രാൻസ് കടുത്ത ആക്രമണമാണ് നടത്തിയത്. എംബാപ്പെയും ഡെംബെലെയും കൂടുതൽ മുന്നേ​റ്റങ്ങൽ നടത്തി. പക്ഷേ പാരഗ്വായ് പ്രതിരോധത്തെ മറികടക്കാൻ ഇതിനായില്ല. എന്നാൽ പാരഗ്വായ്ക്ക് തിരിച്ചടി സമ്മാനിച്ച് 70ാം മിനി​റ്റിൽ റഫറി പെനാൽ​റ്റി വിധിച്ചു. എംബാപ്പെയെ ബോക്സിൽ വീഴ്ത്തിയതിനാണ് പെനാൽ​റ്റി നൽകിയത്. വാർ പരിശോധനയ്ക്ക് ശേഷമാണ് റഫറി പെനാൽ​റ്റിക്ക് അനുമതി നൽകിയത്. എംബാപ്പെ പെനാൽറ്റി കൃത്യമായി ലക്ഷ്യത്തിലെത്തിച്ചു. സ്‌കോർ 1-0.പിന്നീട് മത്സരം മുഴുവൻ നിയന്ത്രിച്ചത് ഫ്രാൻസായിരുന്നു.

ഈ ലോകകപ്പിലെ ഏഴാമത്തെയും ഇതുവരെയുള്ള ലോകകപ്പുകളിൽ 19ാമത്തെയും ഗോളാണ് എംബാപ്പെയുടേത്.ഗോൾഡൻ ബൂട്ട് റേസിൽ മെസിക്കൊപ്പമെത്താനും ഇതോടെ എംബാപ്പെയ്ക്കായി. രണ്ടുപേരും ഏഴുഗോളുകളാണുള്ളത്.