ടെസ്റ്റിൽ ഓസ്‌ട്രേലിയൻ ഇതിഹാസ താരത്തിന്റെ ലോക റെക്കാഡ് മറികടന്ന് ജോ റൂട്ട്,​ അടുത്തത് ​ സച്ചിൻ

ലണ്ടൻ: ടെസ്റ്റ് ക്രിക്കറ്റിൽ പുതിയ ഉയരങ്ങൾ കീഴടക്കി ഇംഗ്ലണ്ട് ടെസ്റ്റ് ക്യാപ്ടൻ ജോ റൂട്ട്. ലോർഡ്‌സിൽ പാകിസ്ഥാനെതിരായ രണ്ടാം ടെസ്റ്റിന്റെ രണ്ടാം ദിനത്തിലാണ് താരം പുതിയ റെക്കാഡ് കൈവരിച്ചത്. സ്വന്തം നാട്ടിൽ ഏറ്റവും കൂടുതൽ ടെസ്റ്റ് റൺസ് നേടുന്ന കളിക്കാരനെന്ന റെക്കാഡാണ് റൂട്ട് സ്വന്തമാക്കിയത്. ഓസ്‌ട്രേലിയൻ ഇതിഹാസം റിക്കി പോണ്ടിംഗിനെ മറികടന്നായിരുന്നു റൂട്ടിന്റെ ചരിത്ര നേട്ടം.

രണ്ടാം ദിനം 24 റൺസെടുത്ത റൂട്ടിനെ പാകിസ്ഥാൻ പേസർ മുഹമ്മദ് അലി എൽ.ബി.ഡബ്ല്യുവിൽ പുറത്താക്കിയിരുന്നു. കൂടുതൽ റൺസ് നേടാൻ കഴിഞ്ഞില്ലെങ്കിലും പോണ്ടിംഗിന്റെ റെക്കാഡ് മറികടക്കാൻ റൂട്ടിന് 24 റൺസ് മതിയായിരുന്നു. ഇതുവരെ ഇംഗ്ലണ്ട് ടെസ്റ്റിൽ റൂട്ട് നേടിയത് 7594 റൺസാണ്. ഓസ്‌ട്രേലിയയിൽ 7578 റൺസ് നേടിയ പോണ്ടിംഗ് രണ്ടാം സ്ഥാനത്തേക്കാണ് പിന്തള്ളപ്പെട്ടത്. ഇന്ത്യയിൽ 7216 ടെസ്റ്റ് റൺസുള്ള സച്ചിൻ ടെണ്ടുൽക്കറാണ് പട്ടികയിൽ മൂന്നാമത്.

ക്രിക്കറ്റിൽ ഏറ്റവും കൂടുതൽ റൺസ് നേടിയ താരമെന്ന സച്ചിൻ ടെണ്ടുൽക്കറുടെ റെക്കാഡിന് തൊട്ടടുത്തേക്കും റൂട്ട് എത്തിയിരിക്കുകയാണ്. സച്ചിന്റെ 15,921 റൺസെന്ന റെക്കാഡ് മറികടക്കാൻ 1713 റൺസ് കൂടി റൂട്ടിന് വേണം. 168 ടെസ്റ്റുകളിൽ നിന്ന് ഇതുവരെ താരം 14,208 റൺസ് നേടിയിട്ടുണ്ട്.

അതേസമയം,​ പാകിസ്ഥാനെതിരായ ടെസ്റ്റ് പരമ്പരയിൽ ഇംഗ്ലണ്ട് മികച്ച തിരിച്ചുവരവാണ് നടത്തുന്നത്. ഹെഡിംഗ്ലിയിൽ നടന്ന ആദ്യ ടെസ്റ്റിൽ പാകിസ്ഥാനെ ഇന്നിംഗ്സിനും 103 റൺസിനും തോൽപ്പിച്ച ഇംഗ്ലീഷ് താരങ്ങൾ മൂന്ന് ദിവസത്തിനുള്ളിൽ മത്സരം പൂർത്തിയാക്കി. ഇംഗ്ലണ്ട് ടെസ്റ്റ് ടീമിന്റെ ക്യാപ്ടൻ സ്ഥാനത്തേക്കുള്ള തിരിച്ചുവരവ് റൂട്ടിനും വിജയകരമായി. ലോർഡ്‌സിൽ നടക്കുന്ന രണ്ടാം ടെസ്റ്റിലും ഇംഗ്ലണ്ട് ശക്തമായ നിലയിലാണ്.