മൂന്നടിച്ച് മിന്നി ഗോകുലം

ഗോകുലം കേരള 3- നംധാരി എഫ്.സി 1

ലുധിയാന : ഐ ലീഗ് ഫുട്ബാളിൽ ഇന്നലെ നടന്ന മത്സരത്തിൽ ഒന്നിനെതിരെ മൂന്ന് ഗോളുകൾക്ക് നംധാരി എഫ്.സിയെ തോൽപ്പിച്ച് ഗോകുലം കേരള എഫ്.സി. നംധാരിയുടെ തട്ടകത്തിൽ നടന്ന മത്സരത്തിന്റെ രണ്ടാം പകുതിയിലാണ് നാലു ഗോളുകളും പിറന്നത്. 27-ാം മിനിട്ടിൽ സുഖൻദീപ് സിംഗിനെയും 60-ാം മിനിട്ടിൽ ബ്രസീലിയൻ താരം ദേയിയേയും ചുവപ്പുകാർഡിലൂടെ നഷ്ടമായ നംധാരി 10 പേരുമായാണ് മത്സരം പൂർത്തിയാക്കിയത്.

57-ാം മിനിട്ടിൽ തബീസോ ബ്രൗണിലൂടെ ഗോകുലമാണ് ആദ്യം സ്കോർ ചെയ്തത്. 63-ാം മിനിട്ടിൽ മൻവീർ സിംഗിലൂടെ നംധാരി സമനില പിടിച്ചു. എന്നാൽ 81-ാം മിനിട്ടിൽ ആദമ നിയാനേയിലൂടെ ഗോകുലം വീണ്ടും മുന്നിലെത്തി. ഇൻജുറി ടൈമിൽ നാച്ചോ അബ്‌ലീദോയാണ് ഗോകുലത്തിന്റെ പട്ടിക പൂർത്തിയാക്കിയത്.ബ്രൗണിന്റെ അസിസ്റ്റിൽ നിന്നായിരുന്നു നാച്ചോയുടെ ഗോൾ.

ഈ വിജയത്തോടെ 19 മത്സരങ്ങളിൽ നിന്ന് 31 പോയിന്റായ ഗോകുലം പോയിന്റ് പട്ടികയിൽ നാലാം സ്ഥാനത്ത് തുടരുകയാണ്. 18 കളിയിൽ നിന്ന് 34 പോയിന്റുള്ള ചർച്ചിൽ ബ്രദേഴ്സാണ് ഒന്നാമത്. 19 മത്സരങ്ങളിൽ നിന്ന് 26 പോയിന്റുമായി നംധാരി ഏഴാമതായി.