ട്വന്റി-20 സെഞ്ച്വറികളിൽ റെക്കാഡ്; കൊഹ്‌ലിയെ മറികടന്ന് അഭിഷേക്

വെല്ലിംഗ്ടൺ: ട്വന്റി-20 ക്രിക്കറ്റിൽ സെഞ്ച്വറികളുടെ എണ്ണത്തിൽ വിരാട് കൊഹ്‌ലിയെ മറികടന്ന് ഇന്ത്യൻ താരം അഭിഷേക് ശർമ്മ. ന്യൂസിലൻഡിനെതിരായ മൂന്നാം ട്വന്റി-20യിൽ വെറും 38 പന്തിൽ 113 റൺസ് അടിച്ചുകൂട്ടിയാണ് അഭിഷേക് ഈ നേട്ടം സ്വന്തമാക്കിയത്. ഒൻപത് ഫോറും 11 സിക്സും ഉൾപ്പെട്ട ഇന്നിംഗ്സിൽ 297.37 ആയിരുന്നു താരത്തിന്റെ സ്‌ട്രൈക്ക് റേറ്റ്. ഇതോടെ അഭിഷേകിന്റെ ആകെ ട്വന്റി-20 സെഞ്ച്വറികളുടെ എണ്ണം 11 ആയി. കൊഹ്‌ലിയുടെ പേരിലുള്ള 10 സെഞ്ച്വറികളുടെ റെക്കാഡാണ് താരം മറികടന്നത്. ട്വന്റി-20 ക്രിക്കറ്റിൽ ഏറ്റവും കൂടുതൽ സെഞ്ച്വറികൾ നേടിയ താരങ്ങളുടെ പട്ടികയിൽ വെസ്റ്റ് ഇൻഡീസ് ഇതിഹാസം ക്രിസ് ഗെയ്ൽ (22), പാകിസ്ഥാന്റെ ബാബർ അസം (13) എന്നിവർക്കു പിന്നിൽ മൂന്നാം സ്ഥാനത്താണ് അഭിഷേക്.

ട്വന്റി-20 രാജ്യാന്തര മത്സരങ്ങളിൽ അഭിഷേകിന്റെ സെഞ്ച്വറികളുടെ എണ്ണം നാലായി. ഈ നേട്ടത്തോടെ രോഹിത് ശർമ്മ, സൂര്യകുമാർ യാദവ്, ഇംഗ്ലണ്ടിന്റെ ഫിൽ സാൾട്ട് എന്നിവർക്കൊപ്പമെത്തി. ട്വന്റി-20 രാജ്യാന്തരത്തിൽ ഏറ്റവും കൂടുതൽ സെഞ്ച്വറികൾ നേടിയ റെക്കാഡ് ഓസ്‌ട്രേലിയൻ ഓൾറൗണ്ടർ ഗ്ലെൻ മാക്സ്‌വെല്ലിന്റെ പേരിലാണ്. അഞ്ച് സെഞ്ച്വറികളാണ് മാക്സ്‌വെല്ലിനുള്ളത്.

70 ട്വന്റി-20 രാജ്യാന്തര മത്സരങ്ങളിൽനിന്ന് 69 ഇന്നിംഗ്സുകളിലായി 2,240 റൺസാണ് അഭിഷേക് നേടിയിട്ടുള്ളത്. 33.43 ആണ് ബാറ്റിംഗ് ശരാശരി. സ്‌ട്രൈക്ക് റേറ്റ് 196.83. നാലു സെഞ്ച്വറികൾക്കൊപ്പം 14 അർദ്ധസെഞ്ച്വറികളും താരത്തിന്റെ പേരിലുണ്ട്. 135 റൺസാണ് ഉയർന്ന സ്‌കോർ.

ഈ വർഷം മാത്രം 37 ട്വന്റി-20 രാജ്യാന്തര മത്സരങ്ങളിൽനിന്ന് അഭിഷേക് 1,125 റൺസ് നേടിയിട്ടുണ്ട്. രണ്ടു സെഞ്ച്വറികളും എട്ട് അർദ്ധസെഞ്ച്വറികളും ഇതിൽ ഉൾപ്പെടുന്നു. ഒരു കലണ്ടർ വർഷത്തിൽ ഏറ്റവും കൂടുതൽ ട്വന്റി-20 രാജ്യാന്തര റൺസ് നേടിയ ഇന്ത്യൻ താരമെന്ന സൂര്യകുമാർ യാദവിന്റെ റെക്കാഡ് മറികടക്കാൻ അഭിഷേകിന് ഇനി 40 റൺസ് കൂടി മതി. 2022ൽ സൂര്യകുമാർ നേടിയ 1,164 റൺസാണ് നിലവിലെ റെക്കാഡ്.

ട്വന്റി-20യിൽ പത്ത് സിക്‌സോ അതിലധികമോ നേടുന്നത് അഭിഷേകിന്റെ കരിയറിൽ ഇത് ഏഴാം തവണയാണ്. 18 തവണ ഈ നേട്ടം കൈവരിച്ച ക്രിസ് ഗെയ്ൽ മാത്രമാണ് ഇക്കാര്യത്തിൽ അഭിഷേകിന് മുന്നിലുള്ളത്. ഈ നേട്ടം അഭിഷേക് മൂന്ന് തവണ സ്വന്തമാക്കിയപ്പോൾ ഗെയ്‌ലിന് രണ്ട് തവണ മാത്രമാണുള്ളത്. ഓസ്ട്രിയയുടെ കരൺബീർ സിംഗ് അഞ്ച് തവണ ഈ നേട്ടം കൈവരിച്ചിട്ടുണ്ട്. ട്വന്റി-20യിൽ 150 സിക്സുകൾ പിന്നിടുന്ന മൂന്നാമത്തെ ഇന്ത്യൻ താരവുമായി അഭിഷേക്. താരത്തിന്റെ ആകെ സിക്സുകളുടെ എണ്ണം 158 ആയി. സൂര്യകുമാർ യാദവ് (179), രോഹിത് ശർമ്മ (205) എന്നിവരാണ് അഭിഷേകിന് മുന്നിലുള്ളത്.