വ്യോമസേന ബേസിനു സമീപം അജ്ഞാത വിമാനം; യുഎസിന്റെ അത്യാധുനിക 'ബി-21 റൈഡർ' എന്ന് അഭ്യൂഹം

വാഷിംഗ്ടൺ: യുഎസ് വ്യോമസേനാ താവളത്തിന് സമീപം അജ്ഞാത വിമാനം കണ്ടതിനെ തുടർന്ന് ദരൂഹത. കൻസാസിലെ മക്കോണൽ വ്യോമസേനാ താവളത്തിന് സമീപമാണ് വിമാനം കണ്ടെത്തിയത്. അമേരിക്കയുടെ അത്യാധുനിക സ്റ്റെൽത്ത് ബോംബർ വിമാനമായ ബി-21 റൈഡറാണിതെന്ന അഭ്യൂഹം സമൂഹമാദ്ധ്യമങ്ങളിൽ ശക്തമാണ്. കഴിഞ്ഞ ചൊവ്വാഴ്ച വ്യോമസേനാ താവളത്തിന് സമീപത്തുനിന്ന് പകർത്തിയ ദൃശ്യങ്ങളിൽ, യുഎസ് സ്റ്റെൽത്ത് ബോംബർ വിമാനങ്ങളോട് സാമ്യമുള്ള ചാരനിറത്തിലുള്ള വിമാനം കാണാം. എന്നാൽ വിമാനം ഏതാണെന്ന് ഔദ്യോഗികമായി സ്ഥിരീകരിച്ചിട്ടില്ല. ഇത് ബി-21 റൈഡറാണെന്ന് തെളിയിക്കുന്ന വ്യക്തമായ തെളിവുകളും ഇതുവരെ ലഭിച്ചിട്ടില്ലെന്നാണ് അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്യുന്നത്.

ഇവ അമേരിക്കയുടെ പുതിയ സ്റ്റെൽത്ത് ബോംബർ വിമാനമായ B-21 റൈഡാർ ആയിരിക്കാനാണ് കൂടുതൽ സാദ്ധ്യതയെന്ന് ഔട്ട്കിക്ക് റിപ്പോർട്ടർ ഡേവിഡ് ഹുക്ക്സ്റ്റെഡ് സൂചിപ്പിക്കുന്നു. എന്നാൽ ആർ‌ക്യു-170 അല്ലെങ്കിൽ ആർ‌ക്യു-180 ഡ്രോണായിരിക്കാനുള്ള സാദ്ധ്യതയും തള്ളിക്കളയാനാകില്ല. ഇവയിൽ പ്രത്യേകിച്ച് ആർക്യു-180ന്റെ സാന്നിദ്ധ്യം യുഎസ് ഭരണകൂടം ഇതുവരെ ഔദ്യോഗികമായി സ്ഥിരീകരിച്ചിട്ടില്ലെന്നും അദ്ദേഹം കൂട്ടിച്ചേർത്തു.

എന്നാൽ, ചിലർ ഈ വാദത്തോട് യോജിക്കുന്നില്ല. മക്കോണൽ വ്യോമസേനാ താവളം ഇന്ധനം നിറയ്ക്കാൻ ഉപയോഗിക്കുന്ന പഴയ തലമുറയിലെ സ്റ്റെൽത്ത് ബോംബർ വിമാനമായ ബി-2 സ്പിരിറ്റായിരിക്കാമിതെന്നാണ് അവകാശവാദം. നോർത്രോപ്പ് ഗ്രുമ്മാനാണ് വിമാനം നിർമ്മിച്ചത്. ആണവായുധങ്ങൾ വഹിക്കാൻ ശേഷിയുള്ള, ദീർഘദൂര ആക്രമണങ്ങൾ നടത്താൻ കഴിയുന്ന അത്യാധുനിക സ്റ്റെൽത്ത് ബോംബറാണ് ബി-2 സ്പിരിറ്റ്. ശത്രുക്കളുടെ റഡാറുകളിൽപ്പെടാതെ ആക്രമണം നടത്താൻ ഇവയ്ക്ക് കഴിയും.

ഒരു B-21 വിമാനത്തിന് ശരാശരി 692 മില്യൺ ഡോളർ ചെലവാകുമെന്നാണ് യുഎസ് വ്യോമസേനയുടെ കണക്ക്. 2022ൽ പൊതുജനങ്ങൾക്ക് പരിചയപ്പെടുത്തിയ B-21, B-2 സ്പിരിറ്റിന് ശേഷം അമേരിക്ക വികസിപ്പിച്ച ആദ്യത്തെ ദീർഘദൂര ബോംബർ വിമാനമാണ്. 1942ൽ ജപ്പാനിൽ നടത്തിയ ചരിത്രപ്രസിദ്ധമായ ആക്രമണത്തിന് നേതൃത്വം നൽകിയ യുഎസ് സൈനിക സംഘമായ ഡൂലിറ്റിൽ റൈഡേഴ്‌സിന്റെ പേരിലാണ് വിമാനത്തിന് B-21 റൈഡർ എന്ന് പേര് നൽകിയത്.

വിമാനത്തിന്റെ ഭൂരിഭാഗം വിവരങ്ങളും ഇപ്പോഴും രഹസ്യമാക്കി വച്ചിരിക്കുകയാണ്. വരും വർഷങ്ങളിൽ വിമാനം സേവനസജ്ജമാകുമെന്ന് വ്യോമസേന പ്രതീക്ഷിക്കുന്നു. കുറഞ്ഞത് 100 വിമാനങ്ങളെങ്കിലും സ്വന്തമാക്കാൻ യുഎസ് വ്യോമസേന പദ്ധതിയിടുന്നുണ്ട്.