പഹൽഗാം : കടുത്ത ശിക്ഷ ഉറപ്പാക്കണമെന്ന് വെള്ളാപ്പള്ളി

നെടുങ്കണ്ടം (ഇടുക്കി): പഹൽഗാം ആക്രമണത്തിന് പിന്നിലുള്ളവർക്ക് കടുത്ത ശിക്ഷ ഉറപ്പാക്കണമെന്ന് എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ മാദ്ധ്യമങ്ങളോട് പറഞ്ഞു. ആർക്കും സഹിക്കാനാവാത്ത സംഭവമാണിത്. പിണറായി സർക്കാരിന്റെ നാലാം വാർഷികാഘോഷങ്ങൾക്കെതിരായ വിമർശനങ്ങളെ,​ ഇഷ്ടമില്ലാത്ത അച്ചി തൊട്ടതെല്ലാം കുറ്റം എന്നുമാത്രമേ കാണാൻ കഴിയൂ. മലപ്പുറം പ്രസംഗം മുസ്ലീങ്ങൾക്കെതിരെയല്ല, മുസ്ലീംലീഗിന്റെ സ്വാർത്ഥതയ്‌ക്കെതിരായിട്ടായിരുന്നു. മതേതര ചിന്തയുള്ളവരെന്ന് പറയുമെങ്കിലും മതേതര ചിന്ത ലീഗിനില്ല. ആ മതത്തിൽപ്പെട്ട സമ്പന്നർക്ക് മാത്രം ഗുണം ചെയ്യുന്ന നിലപാടാണ് ലീഗ് സ്വീകരിക്കുന്നതെന്നും അദ്ദേഹം കുറ്റപ്പെടുത്തി.