അമ്പലമുറ്റം അമ്പാടിയാക്കാൻ ബാലന്മാർ, ആറ്റുകാലിൽ കുത്തിയോട്ടവ്രതം ആരംഭിച്ചു

തിരുവനന്തപുരം: പുലർച്ചെയും വൈകിട്ടുമൊക്കെയായി അമ്പലക്കുളത്തിൽ കുളി, ഒരുമിച്ചുള്ള താമസം,ഇതുവരെ പരിചയിച്ചിട്ടില്ലാത്ത ദിനചര്യ...ഇനിയുള്ള ഏഴുനാളുകൾ ആറ്റുകാൽ ഭഗവതി ക്ഷേത്രത്തിലെ കുത്തിയോട്ട വ്രതമെടുക്കുന്ന ബാലന്മാർക്ക് പുത്തൻ അനുഭവമായിരിക്കും. ഒത്തൊരുമയുടേയും ആത്മനിയന്ത്രണത്തിന്റേയും വിശ്വാസ സമർപ്പണത്തിന്റേയും നാളുകൾ. ഇന്നലെ വ്രതാരംഭ ചടങ്ങുകൾക്കുശേഷം ആറ്റുകാൽ ക്ഷേത്രത്തിനകത്ത് പ്രത്യേകം തയാറാക്കിയ എ.സി ഹാളിലെത്തിയ ബാലന്മാർ കളിയും ചിരിയുമായി ഒത്തുകൂടി.

പണ്ടാര കുത്തിയോട്ട ബാലൻ ഉൾപ്പെടെ ഇക്കുറി 587 പേരാണ് കുത്തിയോട്ടവ്രതം ആരംഭിച്ചത്. 593 പേരാണ് രജിസ്റ്റർ ചെയ്തിരുന്നത്. ആറു കുട്ടികൾക്ക് വിവിധ കാരണങ്ങളാൽ ഒഴിവാകുകയായിരുന്നു. കഴിഞ്ഞതവണ കുത്തിയോട്ടത്തിന് 606 പേരുണ്ടായിരുന്നു. സാധാരണ 6 മുതൽ 12 വയസുവരെയാണ് കുത്തിയോട്ട വ്രതമെടുക്കുന്നതിനുള്ള പ്രായമെങ്കിലും ഇപ്പോഴത് 10 മുതൽ 12 വയസ് വരെയായി നിജപ്പെടുത്തി.

വ്രതമെടുക്കുന്ന കുട്ടികളിൽ മിക്കവർക്കും കുളത്തിലെ കുളി ആദ്യ അനുഭവമാണ്. ഇനി അമ്പലമുറ്രം അവർക്ക് അമ്പാടി പോലെയാണ്. പൊങ്കാല നാളിൽ രാത്രി ഘോഷയാത്രയ്ക്ക് പീലി ചൂടിയ ഉണ്ണിക്കണ്ണന്റെ വേഷത്തിലാണ് ബാലന്മാർ അണിഞ്ഞൊരുങ്ങുന്നത്. ഇന്നലെ രാവിലെ ദേവിയെ ഭക്തിപൂർവം വണങ്ങി വ്രതം ആരംഭിച്ചു. രക്ഷിതാക്കൾ ഉൾപ്പെടെ നിരവധി ഭക്തർ വ്രതാരംഭച്ചടങ്ങിന് സാക്ഷികളായി.

രാവിലെ 8ന് പന്തീരടിപൂജകൾക്കു ശേഷം രാവിലെ 9.15ന് വ്രതത്തിന്റെ ചടങ്ങുകൾ ആരംഭിച്ചു. ക്ഷേത്രക്കുളത്തിൽ കുളിച്ച് ഈറനുടുത്ത് വന്ന കുട്ടികൾ ക്ഷേത്രത്തിന് മുന്നിൽ തയാറാക്കിയ ആവണപ്പലകയിൽ ഏഴ് വെള്ളിനാണയങ്ങൾ വച്ചു. മേൽശാന്തിക്ക് ദക്ഷിണ നൽകി വണങ്ങി. മേൽശാന്തി വി.മുരളീധരൻ നമ്പൂതിരി ചടങ്ങുകൾക്ക് നേതൃത്വം നൽകി. ഏഴുദിവസമാണ് ഇവർ വ്രതം നോൽക്കുന്നത്. പൊങ്കാല ദിവസം വരെ ക്ഷേത്രവളപ്പിൽ താമസിച്ച് വ്രതമെടുക്കുന്ന കുട്ടികൾ ദേവിക്ക് മുന്നിൽ നേർച്ചയുടെ ഭാഗമായി 1008 നമസ്‌കാരം നടത്തും. മാലപ്പുറം പാട്ടാണ് ഇന്നലെ പാടിയത്.

മഹിഷാസുര മർദ്ദിനിയുടെ ഭടന്മാർ

മഹിഷാസുരനുമായുള്ള യുദ്ധത്തിൽ മഹിഷാസുര മർദ്ദിനിയുടെ (ദുർഗാദേവി) മുറിവേറ്റ ഭടന്മാരെയാണ് കുട്ടികൾ പ്രതിനിധീകരിക്കുന്നത്.

13ന് പൊങ്കാലയ്ക്കുശേഷം രാത്രി 7.30നാണ് കുത്തിയോട്ടത്തിന് ചൂരൽക്കുത്ത്. അരയിൽ ചെറിയ വെള്ളിസൂചി ഉപയോഗിച്ചാണ് ചൂരൽ കുത്തുന്നത്. തുടർന്ന് പുറത്തെഴുന്നള്ളത്തിന് ഇവർ ദേവീദാസന്മാരായി അകമ്പടി പോകും. മണക്കാട് ശാസ്‌താക്ഷേത്രത്തിലേക്കുള്ള എഴുന്നള്ളത്ത് പിറ്റേന്ന് രാവിലെ മടങ്ങിയെത്തിയ ശേഷം ചൂരലഴിച്ച് വ്രതം അവസാനിപ്പിക്കും.

ഒറ്രത്തോർത്തുടുത്ത് ലളിതജീവിതം

ക്ഷേത്രത്തിൽ കഴിയുന്ന ഏഴുനാളുകളിൽ ലളിത ജീവിതക്രമം കൂടി കുട്ടികൾ പഠിക്കും. ഈ ദിവസങ്ങളിൽ ഒരു തോ‌ർത്ത് മാത്രമാണ് ഇവരുടെ വേഷം. പുലർച്ചെ രണ്ടരയോടെ ഉറക്കമെണീറ്റ് കുളി കഴിഞ്ഞ് നമസ്‌കാരത്തിന് തയാറാകും. പ്രഭാത ഭക്ഷണം കഴിഞ്ഞ് 11ഓടെ ഹാളിൽ തിരിച്ചെത്തുന്ന കുട്ടികൾക്ക് പുരാണകഥയുടെ ചൊല്ലലുണ്ടാകും. കാർട്ടൂണുകൾ കാണാനും ചെറു വിനോദങ്ങൾക്കും സൗകര്യമുണ്ട്. രക്ഷിതാക്കൾക്ക് കുട്ടികളെ സന്ദർശിക്കാനും അവസരമുണ്ടാകും.