പ്രധാന വഴിപാട് ഉറിയും വെണ്ണയും: വിചാരിച്ച കാര്യം നടക്കാൻ ഈ ക്ഷേത്രത്തിലെത്തി പ്രാർത്ഥിച്ചാൽ മതി

വ്യത്യസ്തമായ ആചാരങ്ങളും വഴിപാടുകളുമുള്ള ധാരാളം ക്ഷേത്രങ്ങൾ കേരളത്തിലുണ്ട്. ഇത്തരത്തിലൊരു ക്ഷേത്രമാണ് പത്തനംതിട്ടയിലെ കുളനടയിൽ സ്ഥിതിചെയ്യുന്ന ഉളനാട് ശ്രീകൃഷ്ണസ്വാമി ക്ഷേത്രം. ഇവിടത്തെ വഴിപാട് തന്നെയാണ് ഈ ക്ഷേത്രത്തെ വ്യത്യസ്തമാക്കുന്നത്.

ഉറിയും വെണ്ണയും വഴിപാടായി സ്വീകരിക്കുന്ന കേരളത്തിലെ ഏക ക്ഷേത്രമാണിത്. ബാലഗോപാലൻ (ഉണ്ണിക്കണ്ണൻ)​ ആണ് ഇവിടത്തെ പ്രധാന പ്രതിഷ്ഠ. ഉണ്ണിക്കണ്ണന് ഏറ്റവും പ്രിയപ്പെട്ട വെണ്ണയും ഉറിയും സമർപ്പിച്ച് പ്രാർത്ഥിക്കാൻ ദിവസവും നിരവധി ഭക്തരാണ് ഇവിടേയ്ക്ക് എത്തിച്ചേരുന്നത്. വിചാരിച്ച കാര്യം നടക്കാനും സന്താനലബ്ധിക്കായും ഭക്തർ ഇവിടെ വഴിപാടുകൾ നടത്താറുണ്ട്.

വെണ്ണ,​ കദളിപ്പഴം,​ ഉണ്ണിയപ്പം,​ ലഡു,​ അവൽ,​ പഞ്ചസാര,​ കൽക്കണ്ടം,​ ശർക്കര എന്നിവയാണ് ഉറിയിൽ നിറയ്ക്കുന്നത്. വഴിപാട് ഭഗവാന് നിവേദിച്ച് അവിടെയുള്ള ഒരു കുട്ടിക്ക് നൽകുന്നു. ശേഷം ബാക്കിയുള്ളത് ഭക്തർക്കും വിതരണം ചെയ്യുന്നു. എല്ലാ മലയാള മാസവും രോഹിണി നാളിൽ ഇവിടെ പ്രത്യേക പൂജകൾ നടക്കും. വിവാഹതടസം,​ തൊഴിലില്ലായ്മ തുടങ്ങിയവ മാറാനും സർവ്വകാര്യവിജയത്തിനുമായി നിരവധി ഭക്തർ ഈ പൂജയിൽ പങ്കെടുക്കാറുണ്ട്.

ഉപദേവതകളായ രക്ഷസ്സിന് പാൽപ്പായസം,​ ദുർഗയ്ക്ക് കുംഭത്തിലെ കാർത്തിക ഉത്സവം, പൊങ്കാല, ഭാഗവതിസേവ , വിദ്യാരംഭവും. നാഗരാജാവ് നാഗയക്ഷിക്ക് തുലാ മാസത്തിലെ ആയില്യത്തിന് നൂറും പാലും,​ ഗണപതി ഭഗവാന് ചിങ്ങത്തിലെ വിനായക ചതുർത്ഥിക്ക് അപ്പം മൂടൽ എന്നിവയും ഈ ക്ഷേത്രത്തിലുണ്ട്. വിശേഷാവസരങ്ങളിൽ മഴ പെയ്യാതിരിക്കാനായി ഇവിടെ തേങ്ങ ഉടച്ച് പ്രാർത്ഥിച്ചാൽ ചടങ്ങുകൾ കഴിയുന്നതുവരെ മഴ മാറി നിൽക്കാറുണ്ടെന്നും വിശ്വാസികൾ പറയുന്നു.