'ട്രെയിനിൽ ഓടിക്കയറി ബാഗ് വച്ച് ഇരുന്നപ്പോൾ അടുത്തുള്ളയാൾ ചോദിക്കുകയാണ്'; നാട്ടിലേക്കുള്ള യാത്രയിൽ സംഭവിച്ച കാര്യത്തെ കുറിച്ച് മഞ്ജു

തിരുവനന്തപുരം: ബോഡിഷെയ്‌മിംഗ് നേരിട്ട സംഭവത്തെക്കുറിച്ച് വിവരിച്ച് നടി മഞ്ജു പത്രോസ്. മാതൃഭൂമി അക്ഷരോത്സവത്തിൽ സംസാരിക്കുകയായിരുന്നു നടി. കഴിഞ്ഞ ദിവസം മാഹിയിൽ വെച്ച് നടന്ന പരിപാടി കഴിഞ്ഞ് തിരിച്ച് വരുമ്പോഴാണ് സംഭവം. ട്രെയിനിൽ വച്ച് ഒരാൾ ബോഡിഷെയ്‌മിംഗ് ചെയ്തെന്നും താരം വ്യക്തമാക്കി.

' ട്രെയിനിൽ ഓടിക്കയറി ബാഗുകൾ എടുത്തുകൊണ്ട് നിന്നപ്പോൾ എന്റെ അടുത്ത സീറ്റിൽ ഇരുന്ന ഒരാൾ എന്നെ നോക്കുന്നുണ്ടായിരുന്നു. അയാൾ മഞ്ജു അല്ലേയെന്ന് ചോദിച്ചു. ശേഷം എവിടെ പോകുന്നു ഇങ്ങനെ വണ്ണം വച്ച് എന്നായിരുന്നു ചോദ്യം. അത് കഴിഞ്ഞിട്ട് ടിവിയിൽ കാണുമ്പോൾ ഇത്രയും നിറം ഇല്ലല്ലോയെന്നും അയാൾ ചോദിച്ചു. ഇത് കേട്ട് ശരിക്കും ഞെട്ടിപോയി. അവസാനം ഞാൻ ആ ചേട്ടനോട് ഒരാളെ കാണുമ്പോൾ ആദ്യം സുഖമാണോയെന്ന് ചോദിച്ച് നോക്കൂയെന്ന് പറഞ്ഞാണ് സംഭാഷണം നിർത്തിയത്'.- മഞ്ജു വ്യക്തമാക്കി.

എന്നോട് ഒരുപാട് പേർ ചോദിക്കും കുറച്ച് നിറം വയ്ക്കാൻ എന്ത് ചെയ്യണമെന്ന്. പണ്ട് പലരും ജനിച്ച കുഞ്ഞിനെ കാണാൻ പോകുമ്പോൾ ചെവിയാണ് നോക്കുന്നത്. ചെവി കറുത്താണ് ഇരിക്കുന്നതെങ്കിൽ കുഞ്ഞ് കറുത്തിരിക്കുമെന്നാണ് അവർ വിചാരിച്ചിരുന്നതെന്നും മഞ്ജു വ്യക്തമാക്കി.