രക്ഷപ്പെടുമെന്ന പേടി, ബെഡ്റൂമിലേക്കും പൊലീസ് ഇരച്ചെത്തി; അവസാനം ഭാര്യയെ ചുംബിച്ച് അല്ലു സ്റ്റേഷനിലേക്ക്

ഹൈദരാബാദ്: പുഷ്പ 2 ചിത്രത്തിന്റെ തിക്കിലും തിരക്കിലും അകപ്പെട്ട് സ്ത്രീ മരിച്ച സംഭവത്തിൽ ഇന്ന് രാവിലെയാണ് നടൻ അല്ലു അർജുനെ പൊലീസ് അറസ്​റ്റ് ചെയ്തത്. ഹൈദരാബാദ് പൊലീസിന്റെ ടാസ്‌ക് ഫോഴ്സ് സംഘമാണ് താരത്തിന്റെ വസതിയായ ജൂബിലി ഹിൽസിൽ എത്തി അറസ്​റ്റ് ചെയ്തത്. ഇപ്പോഴിതാ നടനെ അറസ്​റ്റ് ചെയ്ത് കൊണ്ടുപോകുന്ന വീഡിയോയാണ് സോഷ്യൽമീഡിയയിൽ വൈറലാകുന്നത്.

പൊലീസിനോടൊപ്പം വാഹനത്തിൽ കയറാൻ വരുന്ന അല്ലു അർജുന്റെ വീഡിയോയും വസതിയിലെ വാഹനങ്ങൾ പാർക്ക് ചെയ്യുന്ന സ്ഥലത്ത് ഭാര്യയോടൊപ്പം നിൽക്കുന്ന വീഡിയോയുമാണ് വൈറലാകുന്നത്. അറസ്​റ്റ് നടക്കുന്ന സമയത്ത് അല്ലുവിന്റെ പിതാവും സിനിമാനിർമാതവുമായ അല്ലു അരവിന്ദും കുടുംബവും ഉണ്ടായിരുന്നു. കോഫി കുടിക്കുന്ന അല്ലു ഭാര്യയായ സ്‌നേഹ റെഡിക്ക് ചുംബനം നൽകുന്നതും പുറത്തുവന്ന വീഡിയോയിൽ ഉണ്ട്.

വസതിയിൽ അറസ്​റ്റ് ചെയ്യാൻ പൊലീസെത്തിയപ്പോഴുണ്ടായ അനുഭവത്തെക്കുറിച്ച് അല്ലു പറയുന്നതും വീഡിയോയിൽ കേൾക്കാം. വസ്ത്രം മാറണമെന്ന് പൊലീസിനോട് പറഞ്ഞു. താൻ രക്ഷപ്പെടുമെന്ന് വിചാരിച്ച് ബെഡ്റൂമിലേക്കും പൊലീസുകാർ വന്നു. ബെഡ്റൂമിന് പുറത്ത് പൊലീസുകാർ നിന്നതിൽ ബുദ്ധിമുട്ടുണ്ടായെന്നും അല്ലു പറയുന്നു. അല്ലുവിനോടൊപ്പം പിതാവും വാഹനത്തിൽ കയറാൻ ശ്രമിച്ചപ്പോൾ പൊലീസ് തടഞ്ഞതും വീഡിയോയിലുണ്ട്.നടനെതിരെ സെക്ഷൻ 118(1),സെക്ഷൻ 3(5) എന്നീ വകുപ്പുകളാണ് ചുമത്തിയിരിക്കുന്നത്.