തെരുവിൽ ടൈപ്പ് റൈറ്റർ നൊസ്റ്റാൾജിയ; ഉന്നതപഠനത്തിനൊരു വഴി

കൊച്ചി: ഫോർട്ടുകൊച്ചി​ പരേഡ് ഗ്രൗണ്ടി​നരി​കി​ലെ ഫുട്‌പാത്തി​ൽ സൽമാന്റെ ടൈപ്പ് റൈറ്ററുകൾക്ക് മുന്നി​ൽ ഇരുന്ന് ടൈപ്പ് ചെയ്യാനും പോസ് ചെയ്യാനും കാത്തുനി​ൽക്കുന്നവരിൽ മലയാളികൾ മാത്രമല്ല, വി​ദേശ സഞ്ചാരി​കളുമുണ്ട്.

ടൈപ്പ് ചെയ്യാൻ അറിയാത്തവരെ സൽമാൻ പഠിപ്പിക്കും. പോസ്റ്റ്‌കാർഡിൽ സന്ദേശം ടൈപ്പ് ചെയ്ത് തെർമൽ ഫോട്ടോയും സ്വന്തമാക്കാം. ആറുമാസത്തിനിടെ 50,000ലേറെ പോസ്റ്റ്‌കാർഡുകൾ നൽകി. ഒരു പോസ്റ്റ്‌കാർഡിന് 100 രൂപയാണ് നിരക്ക്. മട്ടാഞ്ചേരി​ക്കാരൻ സൽമാൻ ഫാരിസിന്, ജർമ്മനിയിൽ കലാപഠനത്തി​ന് പണം കണ്ടെത്താനുള്ള വഴിയാണിത്.

ബിനാലെയിൽ കലാപരീക്ഷണമായി തുടങ്ങിയതാണ് ഈ ‘ടെലിപോർട്ട് ടൈപ്പ്‌റൈറ്റേഴ്‌സ്’ രീതി.

ഡോക്യുമെന്ററി ഫോട്ടോഗ്രഫറും ഇൻസ്റ്റലേഷൻ ആർട്ടിസ്റ്റുമാണ് സൽമാൻ (29). ടൈപ്പ്‌റൈറ്ററുകളോടുള്ള താത്പര്യമാണ് ഈ പരീക്ഷണത്തി​ലെത്തി​ച്ചത്. സ്ക്രാപ്പ് കടയിൽനിന്ന് സ്വന്തമാക്കിയതാണ് ആദ്യ ടൈപ്പ് റൈറ്റർ. ഇപ്പോൾ നാലെണ്ണമുണ്ട്. മലയാളം ടൈപ്പ്‌റൈറ്ററും ഉടനെത്തും. 2022-23ലെ കൊച്ചി-മുസിരിസ് ബിനാലെയി​ലാണ് ശ്രദ്ധി​ക്കപ്പെട്ടത്.

 കൊറിയറിൽ നിന്ന് ഫോട്ടോഗ്രാഫി​യി​ലേക്ക്

2021ൽ കൊറിയർ ജോലിക്കി​ടെയാണ് നഗരജീവിതം ക്യാമറയിലാക്കിയത്. തുടർന്ന് ബിനാലെയിൽ ‘കം വാട്ട് മെയ്’ പ്രദർശനം ഒരുക്കി. ജർമ്മൻ സഞ്ചാരി​യുടെ പ്രോത്സാഹനത്തെ തുടർന്ന് ഡോക്യുമെന്ററി ഫോട്ടോഗ്രഫിയിലേക്കും ഇൻസ്റ്റലേഷൻ കലയിലേക്കും തിരിഞ്ഞു. ജർമ്മനിയിൽ അഞ്ചുവർഷത്തെ ഫൈൻ ആർട്ട്സ് കോഴ്സ് പഠനമാണ് ലക്ഷ്യം. പിതാവ് അഷ്റഫ് കെ.കെ., മാതാവ് ഫാത്തിമ, സഹോദരൻ അഫ്നാസ്, മുത്തശ്ശി സുഹറ.

പുതുതലമുറയ്ക്കാണ് ടൈപ്പ് റൈറ്റർ കൗതുകവസ്തു. ജീവി​തത്തി​ൽ ആദ്യമായി​ ടൈപ്പ് റൈറ്റർ കാണുന്നവരും ടൈപ്പ് ചെയ്യുന്നവരും ആസ്വദി​ക്കുന്നുണ്ട്.

-സൽമാൻ ഫാരിസ്