ജീവിതകാലം മുഴുവൻ വെള്ളം കുടിക്കാതെ കഴിയുന്ന ഒരേയൊരു മൃഗം,​ ലോകത്തെ അതിശയിപ്പിക്കുന്ന അപൂർവ എലി

മിക്കവാറും എല്ലാ ജീവജാലങ്ങളുടെയും നിലനിൽപ്പിന് വെള്ളം അത്യാവശ്യമാണ്. ജീവൻ നിലനിർത്താൻ മനുഷ്യരടക്കമുള്ള മിക്ക മൃഗങ്ങളും പതിവായി വെള്ളം കുടിക്കേണ്ടതുണ്ട്. എന്നാൽ പ്രകൃതിയിലെ ചില ജീവികൾക്ക് വെള്ളം കുടിക്കാതെയും ജീവൻ നിലനിർത്താം. അത്തരത്തിലൊരു അത്ഭുത ജീവിയാണ് 'കങ്കാരു എലി' വടക്കേ അമേരിക്കയിലെ വരണ്ട പ്രദേശങ്ങളിലാണ് ഇവ കാണപ്പെടുന്നത്.

വെള്ളം വളരെ കുറവുള്ള സാഹചര്യങ്ങളിൽ ജീവിക്കാൻ സഹായിക്കുന്ന തരത്തിൽ ശരീരം പരിണമിച്ചിട്ടുള്ളതാണ് ഇതിന്റെ പ്രത്യേകത. കങ്കാരുവിനെപ്പോലെ വലിയ പിൻകാലുകളും നീളമുള്ള വാലുമുള്ളതിനാൽ ഇവയ്ക്ക് 'കങ്കാരു എലി' എന്ന് പേര് ലഭിച്ചു.

വായയുടെ ഇരുവശത്തുമുള്ള പ്രത്യേകതരം കവിൾ സഞ്ചികളും ഇവയ്ക്കുണ്ട്. വിത്തുകളും മറ്റ് ഭക്ഷണസാധനങ്ങളും ശേഖരിച്ച് ഈ സഞ്ചികളിൽ സൂക്ഷിച്ചാണ് ഇവ മാളങ്ങളിലേക്ക് കൊണ്ടുപോകുന്നത്. പിന്നീട് ഭക്ഷിക്കാനായി മാളങ്ങളിൽ വിത്തുകൾ സംഭരിക്കുകയും ചെയ്യും. നടക്കുന്നതിനേക്കാൾ ചാടിയാണ് കങ്കാരു എലി കൂടുതലായും സഞ്ചരിക്കുന്നത്. നീളമുള്ള പിൻകാലുകളുടെ സഹായത്തോടെ ശക്തിയായി ചാടാനും ഇവയ്ക്ക് കഴിയും.

മണൽ നിറഞ്ഞ പ്രദേശങ്ങളിലൂടെ വേഗത്തിൽ സഞ്ചരിക്കാനും മരുഭൂമിയിലെ ചെടികൾക്ക് മുകളിലൂടെ ചാടിക്കടക്കാനും ഇവയ്ക്ക് പറ്റാറുണ്ട്. മിന്നൽ വേഗതയും ഇവയുടെ കഴിവാണ്. വേട്ടക്കാരിൽ നിന്ന് രക്ഷപ്പെടാൻ നിമിഷനേരം കൊണ്ട് ചാടിമാറാൻ കങ്കാരു എലികൾക്ക് സാധിക്കും. ചാടുന്നതിനിടെ ശരീരത്തിന്റെ ബാലൻസ് നിലനിർത്താനും പെട്ടെന്ന് ദിശ മാറ്റാനും നീളമുള്ള വാൽ സഹായിക്കുന്നു.

വാലുൾപ്പെടെ ഏകദേശം 38 സെന്റീമീറ്റർ വരെയാണ് കങ്കാരു എലിയുടെ നീളം. ശരീരത്തിന്റെ വലുപ്പവുമായി താരതമ്യം ചെയ്യുമ്പോൾ പിൻകാലുകൾക്ക് വലുപ്പം കൂടുതലാണ്. മുൻകാലുകൾ ചെറുതായിരിക്കും. താരതമ്യേന വലിയ തലയും ചെറിയ കണ്ണുകളുമാണ് മറ്റൊരു പ്രത്യേകത. ശരീരത്തിന്റെ മുകൾഭാഗത്തെ രോമങ്ങൾക്ക് മഞ്ഞ കലർന്ന തവിട്ടുനിറവും അടിഭാഗത്ത് ഇളംനിറവുമാണ് കാണപ്പെടുന്നത്.

വെള്ളം കുടിക്കാതെ എങ്ങനെ ജീവിക്കുന്നു?

കങ്കാരു എലിയുടെ ഏറ്റവും വലിയ പ്രത്യേകത നേരിട്ട് വെള്ളം കുടിക്കാതെ ജീവിക്കാൻ കഴിയുന്നു എന്നതാണ്. ഭക്ഷണത്തിലൂടെയാണ് ശരീരത്തിന് ആവശ്യമായ ജലാംശത്തിന്റെ ഭൂരിഭാഗവും ലഭിക്കുന്നത്. പ്രധാന ഭക്ഷണമായ ഉണങ്ങിയ വിത്തുകളിൽ നിന്ന് പോലും ആവശ്യമായ ഈർപ്പം ശരീരത്തിന് ലഭിക്കും. വെള്ളം സംരക്ഷിക്കുന്നതിൽ ഇവയുടെ വൃക്കകൾക്കും പ്രധാന പങ്കുണ്ട്. ശരീരത്തിൽ ലഭിക്കുന്ന ജലം പരമാവധി നിലനിർത്തുകയും ജലനഷ്ടം കുറയ്ക്കുകയും ചെയ്യുന്ന തരത്തിലാണ് ഇവയുടെ വൃക്കകളുടെ പ്രവർത്തനം.

ഭക്ഷണശീലങ്ങളും ആവാസവ്യവസ്ഥയും തമ്മിലുള്ള ബന്ധമാണ് കങ്കാരു എലിയുടെ അതിജീവനത്തിന്റെ രഹസ്യം. വിത്തുകൾ മാളങ്ങളിൽ ശേഖരിച്ചുവയ്ക്കുകയും ഭക്ഷണത്തിൽനിന്ന് ലഭിക്കുന്ന ജലാംശം പരമാവധി പ്രയോജനപ്പെടുത്തുകയും ചെയ്യുന്നതിലൂടെ കൊടുംവരണ്ട മരുഭൂമിയിലും ഇവ ജീവിതം മുന്നോട്ടുകൊണ്ടുപോകുന്നു.