ഫോൺ മാറ്റുമ്പോൾ വാട്‌സാപ്പ് ചാറ്റുകൾ നഷ്ടപ്പെടുമെന്ന് ഇനി പേടിക്കേണ്ട; പഴയ സന്ദേശങ്ങൾ എളുപ്പത്തിൽ തിരിച്ചെടുക്കാം

സ്‌മാർട് ഫോൺ ഉപയോഗിക്കുന്നവരുടെ എണ്ണം ദിനംപ്രതി വർദ്ധിച്ചുവരികയാണ്. ഇവരിൽ 99 ശതമാനവും വാട്‌സാപ്പാണ് ഉപയോഗിക്കുന്നത്. ഇതിനിടെ ഫോൺ മാറ്റുകയോ ആപ്പ് വീണ്ടും ഇൻസ്റ്റാൾ ചെയ്യുകയോ ചെയ്താൽ പഴയ ചാറ്റുകൾ നഷ്ടപ്പെടുന്നത് ആശങ്കയുണ്ടാക്കാം. പ്രധാനപ്പെട്ട സന്ദേശങ്ങൾ, ചിത്രങ്ങൾ, മറ്റ് സ്വകാര്യ വിവരങ്ങൾ നഷ്ടപ്പെടാതിരിക്കാൻ വാട്‌സാപ്പിലെ ബാക്കപ്പ് സംവിധാനം ഉപയോഗിക്കാമെന്നാണ് കമ്പനി നിർദ്ദേശിക്കുന്നത്.

ആൻഡ്രോയ്‌ഡ് ഫോണുകളിൽ ഗൂഗിൾ അക്കൗണ്ട് ബാക്കപ്പും ഐഫോണുകളിൽ ഐക്ലൗഡ് ബാക്കപ്പുമാണ് ഇതിനായി ഉപയോഗിക്കുന്നത്. ചാറ്റുകൾ തിരിച്ചെടുക്കുന്നതിന് മുമ്പ് ബാക്കപ്പ് ലഭ്യമാണെന്നും അതുമായി ബന്ധപ്പെട്ട ഗൂഗിൾ അക്കൗണ്ടോ ആപ്പിൾ ഐഡിയോ ഫോണിൽ ഉപയോഗിക്കുന്നുണ്ടെന്നും ഉറപ്പുവരുത്തണം.

ആൻഡ്രോയ്ഡ് ഫോണിൽ ചാറ്റുകൾ എങ്ങനെ തിരിച്ചെടുക്കാം

ഗൂഗിൾ അക്കൗണ്ടിൽ ചാറ്റ് ബാക്കപ്പ് നിലവിലുണ്ടെങ്കിൽ പഴയ വാട്‌സാപ്പ് സന്ദേശങ്ങൾ വീണ്ടെടുക്കാം. ഇതിനായി ആദ്യം ഗൂഗിൾ വൺ ആപ്പ് തുറന്ന് ഗൂഗിൾ അക്കൗണ്ടിൽ സൈൻ ഇൻ ചെയ്യുക. തുടർന്ന് Storage > Other എന്ന വിഭാഗത്തിലേക്ക് പോകുക. ചാറ്റുകൾ ബാക്കപ്പ് ചെയ്തിട്ടുണ്ടെങ്കിൽ അവിടെ വിവരങ്ങൾ ലഭ്യമാകും.

ബാക്കപ്പ് ഉണ്ടെന്ന് ഉറപ്പാക്കിയ ശേഷം വാട്‌സാപ്പ് അൺഇൻസ്റ്റാൾ ചെയ്ത് വീണ്ടും ഇൻസ്റ്റാൾ ചെയ്യുക. ഫോൺ നമ്പർ സ്ഥിരീകരിച്ച ശേഷം ബാക്കപ്പ് കണ്ടെത്തുമ്പോൾ Restore തിരഞ്ഞെടുക്കണം. ബാക്കപ്പ് പുനഃസ്ഥാപിക്കാതെ ആപ്പ് ഉപയോഗിക്കണമെങ്കിൽ SKIP തിരഞ്ഞെടുക്കാം. എന്നാൽ ബാക്കപ്പ് പുനഃസ്ഥാപിക്കാതെ SKIP തിരഞ്ഞെടുക്കുന്ന സാഹചര്യത്തിൽ പിന്നീട് പുതിയ ബാക്കപ്പ് ഉണ്ടാകുകയാണെങ്കിൽ പഴയ ബാക്കപ്പിന് പകരം അതിന് ശേഷം ലഭിച്ച ചാറ്റുകൾ മാത്രമുള്ള പുതിയ ബാക്കപ്പ് ആയിരിക്കും ലഭിക്കുക. ഗൂഗിൾ അക്കൗണ്ടിൽ നിന്നും ബാക്കപ്പ് ലഭ്യമല്ലെങ്കിലും പഴയ ഫോണിൽ നിന്ന് പുതിയ ഫോണിലേക്ക് നേരിട്ട് ചാറ്റുകൾ മാറ്റാനുള്ള സംവിധാനവും വാട്‌സാപ്പിലുണ്ട്.

ഐഫോണിൽ നിന്നും എങ്ങനെ ചാറ്റുകൾ വീണ്ടെടുക്കാം

ഐക്ലൗഡിൽ ചാറ്റ് ബാക്കപ്പ് ഉണ്ടെങ്കിൽ ഐഫോണിലും പഴയ ചാറ്റുകൾ നിങ്ങൾക്ക് പുനഃസ്ഥാപിക്കാം. ബാക്കപ്പ് പരിശോധിക്കാൻ Settings > Chats >Chat Backup എന്ന വിഭാഗത്തിലേക്ക് പോകുക. ഇവിടെ അവസാനമായി എടുത്ത ബാക്കപ്പിന്റെ സമയവും വലുപ്പവും കാണാനാകും. ചാറ്റുകൾ തിരിച്ചെടുക്കാൻ ആദ്യം വാട്‌സാപ്പ് അൺഇൻസ്റ്റാൾ ചെയ്ത് വീണ്ടും ഇൻസ്റ്റാൾ ചെയ്യുക. തുടർന്ന് ഫോൺ നമ്പറും ആപ്പിൾ ഐഡിയും സ്ഥിരീകരിച്ച ശേഷം ബാക്കപ്പ് കണ്ടെത്തിയാൽ Restore Chat History എന്ന ഓപ്ഷൻ തിരഞ്ഞെടുത്താൽ മതിയാകും.

ചാറ്റുകൾ വീണ്ടെടുക്കുന്നതിനിടെ അധിക സുരക്ഷയ്ക്കായി വ്യക്തിത്വം സ്ഥിരീകരിക്കാനും ആവശ്യപ്പെട്ടേക്കാം. ടു-സ്റ്റെപ്പ് വെരിഫിക്കേഷനോ എൻഡ്-ടു-എൻഡ് എൻക്രിപ്റ്റ‌ഡ് ബാക്കപ്പോ സജ്ജീകരിച്ചിട്ടില്ലെങ്കിൽ ടെക്സ്റ്റ് മെസേജ് വഴിയോ ഫോൺ കോൾ വഴിയോ ലഭിക്കുന്ന കോഡ് ഉപയോഗിച്ച് സ്ഥിരീകരണം പൂർത്തിയാക്കാൻ കഴിയും. പഴയ ചാറ്റുകൾ നഷ്ടപ്പെടാതിരിക്കാൻ ഫോൺ മാറ്റുന്നതിന് മുമ്പ് വാട്‌സാപ്പ് ബാക്കപ്പ് കൃത്യമായി എടുത്തിട്ടുണ്ടെന്ന് ഉറപ്പാക്കുന്നതാണ് ഏറ്റവും സുരക്ഷിതമായ മാർഗം.