വഴിയടച്ച് കാട്; ദുരിതത്തിലായി കാൽ നട യാത്രക്കാർ

എഴുകോൺ : കാൽനട യാത്രക്കാരെ ദുരിതത്തിലാക്കി പാതയോരങ്ങളിൽ കുറ്റിക്കാടുകൾ വളരുന്നു. തിരക്കേറിയ പാതകളിലടക്കം സമാന സ്ഥിതിയാണ്. എഴുകോൺ നെടുമൺകാവ് റോഡിലെ പോച്ചംകോണം വളവിൽ കുറ്റിച്ചെടികളും വള്ളികളും റോഡിലേക്ക് പടർന്ന നിലയിലാണ്. കാൽനട യാത്രികർ പലപ്പോഴും അപകടത്തിൽ പെടാതെ രക്ഷപെടുന്നത് തലനാരിഴയ്ക്കാണ്. പ്രഭാത സായാഹ്ന സവാരിക്കാരെയാണ് ഇത് ഏറെ ബുദ്ധിമുട്ടിക്കുന്നത്. ഇഴ ജന്തുക്കളെ ഭയന്ന് റോഡിലേക്ക് കയറി നടക്കുന്നത് അപകടകരവുമാണ്. എഴുകോൺ, കരീപ്ര ഗ്രാമ പഞ്ചായത്തുകളിൽ ഒട്ടുമിക്ക ഗ്രാമീണ റോഡുകളുടെയും സ്ഥിതി ഇതാണ്. പാതയോരങ്ങളിലെ കാട് തെളിക്കാൻ സത്വര നടപടി വേണമെന്ന ആവശ്യത്തിലാണ് പ്രദേശ വാസികൾ.