ആളുമി​ല്ല, വാഹനവുമി​ല്ല... ചലി​ക്കാനൊരു വഴി​ തേടി​ ചാത്തന്നൂർ എക്സൈസ്!

ചാത്തന്നൂർ: ഓടി​യെത്താൻ വാഹനവും ആവശ്യത്തി​ന് ആളെണ്ണവും ഇല്ലാത്തതി​നാൽ ചാത്തന്നൂരി​ലെ എക്സൈസ് ഉദ്യോഗസ്ഥർ വലയുന്നു.

ഇവി​ടെ ആകെയുണ്ടായി​രുന്ന ബൊലേറോ ജീപ്പ് കട്ടപ്പുറത്തായി​ട്ട് നാലു മാസം പി​ന്നി​ടുന്നു. ലഹരിവസ്തുക്കളുടെ കടത്തും കച്ചവടവും മുഖ്യതൊഴിലാക്കിയവർ ധാരാളമുള്ള ചാത്തന്നൂർ എക്‌സൈസ് മേഖലയിൽ അവരെ കൈകാര്യം ചെയ്യുന്നതിന് ചുക്കാൻ പി​ടി​ക്കേണ്ട എക്സൈസുകാർക്ക് ഒന്നനങ്ങാൻ പോലുമാവാത്ത അവസ്ഥയാണ്. യാതൊരുവിധ പരിശോധനകളും എക്സൈസി​ന്റെ ഭാാഗത്ത ു നി​ന്നുണ്ടാവുന്നി​ല്ല. എക്‌സൈസ് വകുപ്പ് പ്രഖ്യാപി​ച്ച 'ഓപ്പറേഷൻ തണ്ടർ' പോലും ഇവിടെ മെല്ലെപോക്കിലാണ്.

ചാത്തന്നൂർ എക്‌സൈസ് റേഞ്ച് പരിധിയിൽ 10 പഞ്ചായത്തും ഒരു നഗരസഭയും ഉൾപ്പെടുന്നുണ്ട്. ദേശീയപാതയിൽ പാരിപ്പള്ളി മുതൽ പള്ളിമുക്ക് വരെയും തീരദേശ മേഖലയിൽ തിരുവനന്തപുരത്തിന്റെ തീരദേശ അതിർത്തി പങ്കിടുന്ന കാപ്പിൽ മുതൽ ഇരവിപുരം വരെയും കൂടാതെ തൃക്കോവിൽ വട്ടം പഞ്ചായത്തും ഉൾപ്പടെയുള്ള സ്ഥലങ്ങളാണ് ഈ റേഞ്ചിന്റെ പരിധിയിലുള്ളത്. പൂതക്കുളം, പരവൂർ തീരമേഖല കേന്ദ്രീകരിച്ചാണ് വാറ്റുകേന്ദ്രങ്ങൾ വ്യാപകമായി പ്രവർത്തിക്കുന്നത്. ഇവിടെയെല്ലാം ഓടിയെത്താൻ രണ്ട് ജീപ്പ് അനിവാര്യമാണെന്നാണ് ഉദ്യോഗസ്ഥർ പറയുന്നത്.

ആകെ ജീവനക്കാർ 24

എക്‌സൈസ് ഇൻസ്‌​പെക്ടർ ഒന്ന്, അസിസ്റ്റന്റ് എക്‌സൈസ് ഇൻസ്‌​പെക്ടർ ഒന്ന്, പ്രിവന്റീവ് ഓഫീസർ നാല്, സിവിൽ എക്‌സൈസ് ഓഫീസർ പതിനാല്, വനിത സിവിൽ എക്‌സൈസ് ഓഫീസർ നാല് എന്നിങ്ങനെയാണ് സ്റ്റാഫ് പാറ്റേൺ. ഇത്രയേറെ ദൂരപരിധിയുള്ള റേഞ്ച് ഓഫീസിൽ ഇത്രയും ജീവനക്കാർ അപര്യാപ്തമാണ്. ഇവർക്ക് തന്നെ വിവിധ ഡ്യൂട്ടികൾ ഉണ്ട്. ഒരാൾ സ്‌പെഷ്യൽ ഡ്യൂട്ടിയി​ൽ കൊല്ലം ഓഫീസിലും മൂന്ന് പേർ കോടതി ഡ്യൂട്ടിക്കായി​ കൊല്ലം, പരവൂർ, കൊട്ടാരക്കര കോടതികളിലും പോകും. രണ്ടു പേർ ഷി​ഫ്റ്റ് അടി​സ്ഥാനത്തി​ൽ പാറാവ്​ ഡ്യൂട്ടി ചെയ്യുന്നു, ഒരാൾ റൈറ്ററാണ്. ഒരാൾ തിരുവനന്തപുരം ലാബിലേക്ക് കെമിക്കൽ ഡ്യൂട്ടിക്കു പോവും. ഇതോടെ ഓഫീസി​ൽ സിവിൽ എക്‌സൈസ് ഓഫീസർമാർ ഇല്ലാത്ത അവസ്ഥയാണ്.

കുറഞ്ഞത് വേണം 50 പേർ!

ചാത്തന്നൂർ എക്സൈസ് റേഞ്ച് ഓഫീസി​ൽ അൻപതിലധികം ഉദ്യോഗസ്ഥർ ഉണ്ടെങ്കി​ൽ മാത്രമേ സേവനം കൃത്യമായി​ നടത്താനാവൂ എന്നതാണ് അവസ്ഥ. കൂടുതൽ തസ്തികകൾ സൃഷ്ടിച്ച് വകുപ്പിന്റെ പ്രവർത്തനം ശാക്തീകരിക്കാൻ എക്‌​സൈസ് ജീവനക്കാരുടെ സംഘടന നിരന്തരം സമ്മർദ്ദം ചെലുത്തിയിട്ടും ഫലമുണ്ടാവുന്നി​ല്ല. ക്രിമിനൽ കേസ് പ്രതികൾ അടക്കമുള്ളവർ മയക്കുമരുന്ന് വിപണന രംഗത്തേക്ക് ചേക്കേറി​യതി​ന്റെ പശ്ചാത്തലത്തിൽ വാഹനങ്ങളുടെയും ജീവനക്കാരുടെയും എണ്ണം വർദ്ധി​പ്പി​ക്കണമെന്നാണ് ആവശ്യം.