കൊട്ടാരക്കര ഗണപതി ക്ഷേത്ര വികസനം : 15 ഇന നിർദ്ദേശങ്ങൾക്ക് അംഗീകാരം

കൊല്ലം: കൊട്ടാരക്കര മഹാഗണപതി ക്ഷേത്രത്തിന്റെ സമഗ്ര വികസനത്തിന് വഴിതുറക്കുന്നു. തിരുവിതാംകൂർ ദേവസ്വംബോർഡ് മെമ്പർ കെ.രാജു മുന്നോട്ടുവച്ച 15 ഇന വികസന നിർദ്ദേശങ്ങൾക്ക് ദേവസ്വംബോർഡിന്റെ അംഗീകാരം ലഭിച്ചു. തിരുവനന്തപുരത്ത് ദേവസ്വം ബോർഡ് ആസ്ഥാനത്ത് ചേർന്ന യോഗത്തിലാണ് തീരുമാനമുണ്ടായത്. ക്ഷേത്രത്തിലെ അടിസ്ഥാന സൗകര്യങ്ങൾ വികസിപ്പിക്കുന്നതിനും ഭക്തജനങ്ങൾക്കുള്ള സൗകര്യങ്ങൾ മെച്ചപ്പെടുത്തുന്നതിനും ബോർഡിന്റെ തീരുമാനം വഴിയൊരുക്കും. ക്ഷേത്രം സന്ദർശിച്ച് ബോദ്ധ്യപ്പെട്ട വിവരങ്ങളുടെ അടിസ്ഥാനത്തിലാണ് കെ.രാജു വികസനരേഖ തയ്യാറാക്കിയത്.

 പ്രധാന വികസന പദ്ധതികൾ

•  നാലമ്പലത്തിന്റെ ചോർച്ച പരിഹരിക്കൽ, കാലപ്പഴം ചെന്ന കെട്ടിടങ്ങളുടെ നവീകരണം, പ്രവേശന ഗോപുരം നിർമ്മിക്കൽ, പ്രവേശന പാത നവീകരിക്കൽ.
• നിലവിലുള്ള പാർക്കിംഗ് ഗ്രൗണ്ട് വികസിപ്പിക്കും. ദേവസ്വംബോർഡ് വാങ്ങിയ 93 സെന്റ് ഭൂമി വികസന ആവശ്യങ്ങൾക്ക് ഉപയോഗിക്കും.
• ക്ഷേത്രക്കുളം നവീകരണം, ശീവേലിപ്പാതയിലും തിരുമുറ്റത്തും ശില പാകൽ, ആധുനിക ടൊയ്ലറ്റ് ബ്ളോക്കുകൾ, ശാസ്ത്രീയ മാലിന്യ സംസ്കരണം, കുറ്റമറ്റ ഡ്രെയിനേജ് സംവിധാനം.
• സി.സി.ടി.വി സംവിധാനം ശക്തമാക്കും. ഗസ്റ്റ് ഹൗസും അഡ്മിനിസ്ട്രേറ്റീവ് ഓഫീസും നവീകരിക്കും. മണികണ്ഠേശ്വരം ദേവസ്വത്തിന്റെ മൂലസ്ഥാനമായ പനയ്ക്കൽ കാവ് ക്ഷേത്രത്തിന് മുൻവശം ഇന്റർലോക്ക് പാകും.
• അസി.കമ്മീഷണർ ഓഫീസ്, അസിസ്റ്റന്റ് എൻജിനീയർ ഓഫീസ്, വിശാലമായ പാർക്കിംഗ് എന്നിവ ഉൾപ്പെടുന്ന ആധുനിക ഷോപ്പിംഗ് മാൾ സമുച്ചയം നിർമ്മിക്കും. ഇതുവഴി ദേവസ്വത്തിന് സ്ഥിരമായ വരുമാനം ലഭിക്കും.

ക്ഷേത്രത്തിന്റെ പൈതൃകവും പ്രൗഢിയും നിലനിർത്തിക്കൊണ്ടുതന്നെ ഭക്തജനങ്ങൾക്ക് മികച്ച സൗകര്യങ്ങൾ ഒരുക്കാനുള്ള പദ്ധതികൾക്കാണ് അംഗീകാരം ലഭിച്ചത്. വികസന പദ്ധതികൾ സമയബന്ധിതമായി പൂർത്തിയാക്കും.

കെ.രാജു, ദേവസ്വംബോർഡ് മെമ്പർ, മുൻ മന്ത്രി