പഞ്ചഗുസ്‌തിയിൽ അഭിമാനമായി വിഷ്‌ണു

പാലാ: ദേശീയ പൊലീസ് മീ​റ്റിൽ കൈക്കരുത്തിന്റെ മികവിൽ കോട്ടയത്തിന്റെ അഭിമാനമായി പാലാ പയപ്പാർ സ്വദേശി വിഷ്ണു മോഹൻ. ലക്‌നൗവിൽ നടന്നു വരുന്ന ദേശീയ പൊലീസ് മീ​റ്റിൽ പഞ്ചഗുസ്തിയിൽ 70 കിലോ വിഭാഗത്തിൽ മൂന്നാം സ്ഥാനം നേടിയാണ് വിഷ്ണു മിന്നിത്തിളങ്ങിയത്. ആസാം പൊലീസിനാണ് ഒന്നാം സ്ഥാനം. കേന്ദ്രസേനയ്ക്ക് രണ്ടാം സ്ഥാനവും. കേരളാ ടീമിൽ പഞ്ചഗുസ്തിയിൽ കോട്ടയം ജില്ലയിൽ നിന്നുള്ള ഏക അംഗമാണ് ഈ മുപ്പത്തൊന്നുകാരൻ. എറണാകുളം കെ.എ.പി. ഒന്നാം ബ​റ്റാലിയനിൽ ഇപ്പോൾ ജോലി ചെയ്യുന്ന വിഷ്ണു 7 വർഷം മുമ്പാണ് സംസ്ഥാന പൊലീസിൽ ചേർന്നത്.

പയപ്പാർ താഴത്ത് മൈലാങ്കൽ മോഹൻ ​ സൈനു ദമ്പതികളുടെ മകനാണ്. രേഷ്മയാണ് ഭാര്യ. ഋതിക മകളും. കേരളത്തിനും കോട്ടയത്തിനും അഭിമാനമായി മാറിയ വിഷ്ണു മോഹനെ പയപ്പാർ ഗ്രാമസൗഹൃദ സമിതി അഭിനന്ദിച്ചു.

പഞ്ചായത്ത് മെമ്പർ ലിന്റൺ ജോസഫിന്റെ അദ്ധ്യക്ഷതയിൽ ചേർന്ന യോഗത്തിൽ ബാബു കെ.എസ്, പി.​റ്റി. രാജേഷ്, ഹരിപ്റസാദ് വി.എസ്, സ്‌പെഷ്യൽ ബ്രാഞ്ച് എസ്.ഐ. ബിനോയ് തോമസ്, ആകാശ് പാമ്പയ്ക്കൽ, പ്രദീപ് നന്ദകുമാർ സുദർശന തുടങ്ങിയവർ അഭിനന്ദിച്ചു. ലക്നൗവിൽ നിന്ന് വിഷ്ണു മോഹൻ നാട്ടിൽ തിരിച്ചെത്തുമ്പോൾ ഗ്രാമസൗഹൃദ സമിതി സ്വീകരണം നൽകും.