മെഡിക്കൽ കോളേജ് ആശുപത്രിയിൽ ദുരിതം....... തൊണ്ട നനയ്ക്കാൻ തുള്ളി വെള്ളമില്ല

കോട്ടയം : ദിനംപ്രതി ആയിരക്കണക്കിന് സാധാരണക്കാർ ആശ്രയിക്കുന്ന പ്രധാന ആശുപത്രിയാണ്. പക്ഷേ,​ പറഞ്ഞിട്ടെന്ത് പ്രയോജനം. കനത്തചൂടിൽ തൊണ്ട വരണ്ടാൽ തുള്ളി വെള്ളം കിട്ടില്ല. വാർഡിൽ രോഗികളുടെ കൂട്ടിരിപ്പുകാർ അനുഭവിക്കുന്ന ദുരിതം ചില്ലറയല്ല. വാർഡുകളിൽ ശുദ്ധമായ കുടിവെള്ള സംവിധാനം ഏർപ്പെടുത്താൻ അധികൃതർ തയ്യാറാകുന്നില്ല. ബാത്ത് റൂമിൽ ഉപയോഗിക്കുന്നതിനും,​ പാത്രം കഴുകുന്നതിനും പൈപ്പ് ലൈനിലൂടെ വെള്ളമെത്തും. ഇത് ക്ലോറിൻ കലർന്നതിനാൽ കുടിയ്ക്കാനാകില്ല. ആശുപത്രിയ്ക്ക് സമീപത്തെ ഹോട്ടലുകളേയും തട്ടുകടകളേയുമാണ് ചൂടുള്ള കുടിവെള്ളത്തിനായി സമീപിക്കേണ്ട ഗതികേടാണ്. പാചകവാതക ക്ഷാമം നേരിടുന്നതിനാൽ ചൂടുവെള്ള വിതരണത്തിന് ഭക്ഷണശാലകൾ മടിക്കുകയാണെന്ന് രോഗികളുടെ ബന്ധുക്കൾ പറയുന്നു.

വിലയ്ക്ക് വാങ്ങണം,​ പണമില്ല

പണം കൊടുത്തു വാങ്ങാൻ കഴിയാത്ത നിരവധി രോഗികളാണ് ആശുപത്രിയിൽ ചികിത്സയിൽ കഴിയുന്നത്. ബഹുഭൂരിപക്ഷം പേർക്കും സന്നദ്ധ സംഘടനകൾ നൽകുന്ന ഭക്ഷണമാണ് ആശ്രയം. മെഡിക്കൽ കോളേജിൽ നിരവധി വികസന പ്രവർത്തനങ്ങൾ നടപ്പാക്കിയെങ്കിലും അടിസ്ഥാന സൗകര്യങ്ങൾ അപര്യാപ്തമാണ്.



''രോഗികൾക്ക് ശുദ്ധജലവും ചൂടുവെള്ളവും ലഭ്യമാക്കുന്നതിനുള്ള സംവിധാനം ഇവിടെയില്ല. വാർഡുകളിൽ കുടിവെള്ളം ഏർപ്പെടുത്താൻ അടിയന്തര നടപടി സ്വീകരിക്കണം.

-കൂട്ടിരിപ്പുകാർ