കുടിനീരിന് നെട്ടോട്ടം; ഇഴഞ്ഞ് ജൽ ജീവൻ മിഷൻ

മലപ്പുറം: വേനലിന്റെ ആരംഭത്തിൽ തന്നെ നാട് കുടിവെള്ളത്തിനായി നെട്ടോട്ടമോടുമ്പോഴും ഇതിന് പരിഹാരമാവേണ്ട ജൽ ജീവൻ മിഷൽ പദ്ധതി ജില്ലയിൽ ഇഴഞ്ഞു നീങ്ങുന്നു. ആറ് മാസത്തിനിടെ അയ്യായിരത്തോളം കുടിവെള്ള കണക്ഷ‌ണുകൾ മാത്രമാണ് നൽകാനായത്. 2020 - 21 സാമ്പത്തിക വർഷം തുടക്കമിട്ട പദ്ധതിയിൽ ഇതുവരെ 2,18,839 വീടുകളിലാണ് കുടിവെള്ള കണക്ഷൻ നൽകിയത്. ജില്ലയിൽ 6,52,951 ടാപ്പ് കണക്ഷ‌നുകൾക്ക് ഭരണാനുമതി ലഭിച്ചിട്ടുണ്ട്. ഇത് പൂർത്തിയാക്കാൻ 4,34,112 കണക്ഷനുകൾ കൂടി നൽകേണ്ടതുണ്ട്. നിലവിൽ 33.52 ശതമാനം പദ്ധതി പ്രവൃത്തിയാണ് പൂർത്തീകരിച്ചിത്. 2024-25 സാമ്പത്തിക വർഷത്തിൽ പദ്ധതി പൂർത്തീകരിക്കും എന്നായിരുന്നു നേരത്തെ പ്രഖ്യാപിച്ചിരുന്നത്. കാലാവധി 2028 ഡിസംബർ വരെ നീട്ടിയിട്ടുണ്ട്.

മുന്നിൽ കൊല്ലം

കൊല്ലം ജില്ലയിലാണ് പദ്ധതി കൂടുതൽ വേഗം കൈവരിച്ചിട്ടുള്ളത്. 66.97 ശതമാനം ടാപ്പ് കണക്ഷനുകൾ നൽകിയിട്ടുണ്ട്. 4,​46,​930 അപേക്ഷകളിൽ 2,​99,​291 വീടുകളിൽ ടാപ്പ് സ്ഥാപിച്ചിട്ടുണ്ട്. അഞ്ച് ജില്ലകളിൽ 40 ശതമാനത്തിന് മുകളിൽ കണക്ഷനുകൾ നൽകാനായിട്ടുണ്ട്. ഗ്രാമീണ മേഖലയിലെ എല്ലാ വീടുകളിലും ടാപ്പുകളിലൂടെ കുടിവെള്ളം ലഭ്യമാക്കാൻ ലക്ഷ്യമിട്ട് കേന്ദ്ര സംസ്ഥാന സർക്കാരുകൾ സംയുക്തമായി നടപ്പിലാക്കുന്ന പദ്ധതിയാണിത്.

ഫണ്ടാണ് തടസ്സം

• കേന്ദ്ര- സംസ്ഥാന സർക്കാരുകൾ 50:50 എന്ന അനുപാതത്തിൽ തുക അനുവദിച്ച് നടപ്പിലാക്കുന്ന പദ്ധതിയാണിത്.
• 34,000 കോടി രൂപ ഇനിയും പദ്ധതിക്കായി ആവശ്യമുണ്ട്. ഇതിൽ 17,000 കോടി രൂപ സംസ്ഥാന വിഹിതമാണ്.
• 2025-26 സംസ്ഥാന ബഡ്ജറ്റിൽ പദ്ധതിക്കായി ആകെ 560 കോടി രൂപയാണ് വകയിരുത്തിയിട്ടുള്ളത്. കഴിഞ്ഞ സാമ്പത്തിക വർഷവും വകയിരുത്തിയ തുകയും കുറവായിരുന്നു.
• ഫണ്ടിന്റെ അപര്യാപ്തത പ്രവൃത്തികളുടെ പുരോഗതിയെ പ്രതികൂലമായി ബാധിച്ചിട്ടുണ്ട്. മലപ്പുറം പ്രൊജക്ട് ഡിവിഷന് കീഴിൽ മാത്രം 459.11 കോടി രൂപ കരാറുകാർക്ക് കുടിശ്ശികയായി നൽകാനുണ്ട്.
• കുടിശ്ശിക തുക ആവശ്യപ്പെട്ടുള്ള കരാറുകാരുടെ സമരവും പദ്ധതി പുരോഗതിയെ പ്രതികൂലമായി ബാധിച്ചിട്ടുണ്ട്.