കാട്ടാനയെ ചരിഞ്ഞ നിലയിൽ കണ്ടെത്തി

കോന്നി: നടുവത്തുമൂഴി റേഞ്ചിലെ തേക്കുതോട് മുണ്ടോമൂഴി വനമേഖലയിലെ തേക്കു പ്ലാന്റേഷനിൽ 30 വയസുള്ള കാട്ടാനയെ ചരിഞ്ഞ നിലയിൽ കണ്ടെത്തി. കഴിഞ്ഞദിവസം തണ്ണിത്തോട് റോഡിലെ തണ്ണിത്തോട് ഫോറസ്റ്റ് സ്റ്റേഷനും തണ്ണിത്തോട് മൂഴിക്കും ഇടയിൽ റോഡരികിൽ അവശനിലയിൽ കണ്ട പി​ടി​യാനയാണ് ഇതെന്ന് വനപാലകർ പറഞ്ഞു. കഴിഞ്ഞ രണ്ടു ദിവസമായി അടവി കുട്ടവഞ്ചി സവാരി കേന്ദ്രത്തിന് സമീപത്ത് തണ്ണിത്തോട് ഫോറസ്റ്റ് സ്റ്റേഷന് സമീപം കാട്ടാന മണിക്കൂറുകളോളം കല്ലാറ്റിൽ നിലയുറപ്പിച്ചിരുന്നു. തുടർന്ന് ഒരു കുട്ടിയാനയും ഈ പിടിയാനയുടെ സമീപത്ത് എത്തിയിരുന്നു. ചരിഞ്ഞ പിടിയാന ഗർഭിണിയായിരുന്നുവെന്ന് പോസ്റ്റ്മോർട്ടം നടത്തിയ ഡോക്ടർമാർ പറഞ്ഞു. ഗർഭാശയ സംബന്ധമായ രോഗമാണ് ആന ചരി​യാൻ കാരണമെന്നാണ് പ്രാഥമിക നിഗമനം.