ഇലന്തൂർ ഗവ.കോളേജ് കെട്ടി​ട നി​ർമ്മാണം നീളുന്നു, വേണം നല്ലവഴി ​

പത്തനംതിട്ട : ഇലന്തൂർ ഗവ.കോളേജിന് കെട്ടിടം പണിയാൻ സ്ഥലം ലഭ്യമായെങ്കി​ലും വഴി​ക്ക് വീതിയില്ലാത്തതിനാൽ നിർമ്മാണം അനന്തമായി നീളുന്നു. പഞ്ചായത്ത് നിയമപ്രകാരം റോഡിന് ഏഴ് മീറ്റർ വീതി ആവശ്യമാണ്. നിലവിൽ നാല് മീറ്ററോളം മാത്രമാണുള്ളത്. റോഡിന് വീതികൂട്ടാൻ സമീപത്തെ സ്ഥലം ഏറ്റെടുക്കേണ്ടി വരും. 5.12 ഏക്കർ സ്ഥലമാണ് കെട്ടിടം നിർമ്മിക്കാനായി ഏറ്റെടുത്തത്. 2014 ൽ ആണ് ഇലന്തൂരിൽ ഗവ.കോളേജ് ആരംഭിക്കുന്നത്. സ്വന്തം കെട്ടിടമില്ലാത്തതിനാൽ ഇലന്തൂർ വൊക്കേഷണൽ ഹയർസെക്കൻഡറി സ്‌കൂളിന്റെ ഒരുഭാഗം കോളേജി​നായി ഉപയോഗിക്കുകയായി​രുന്നു. പത്ത് വർഷങ്ങൾക്കിപ്പുറവും സാഹചര്യങ്ങൾക്ക് ഒരു മാറ്റവുമുണ്ടായി​ല്ല. കോളേജ് ആരംഭിക്കുമ്പോൾ രണ്ട് വർഷത്തിനുള്ളിൽ കെട്ടിടം നിർമ്മിച്ച് നൽകുമെന്നായിരുന്നു ഉറപ്പ്. 2017 ൽ ഖാദി ബോർഡ് ഇലന്തൂരി​ലുള്ള സ്ഥലം വിട്ടു നൽകുകയായിരുന്നു. എന്നാൽ പുറമ്പോക്കാണെന്നാരോപിച്ച് മൂന്ന് കുടുംബങ്ങൾ ഇവിടെ വന്ന് താമസിച്ചു. അതോടെ രജിസ്‌ട്രേഷൻ ഏഴ് വർഷം നീണ്ടു . പിന്നീട് മന്ത്രി വീണാ ജോർജ് കിഫ്ബി വഴി പദ്ധതി തയ്യാറാക്കി. സ്ഥലം ഏറ്റെടുത്തു രജിസ്‌ട്രേഷൻ നടത്തുകയായിരുന്നു.

ആകെ നാല് കോഴ്‌സുകൾ

മൂന്ന് കോഴ്‌സുകളായിരുന്നു തുടക്കത്തിൽ ഉണ്ടായിരുന്നത്. ബി.എസ് സി സുവോളജി, ബി.കോം, ബി.എ മലയാളം എന്നിവ. പി​ന്നീട് എം.കോം കൂടി ലഭിച്ചതോടെ കോഴ്‌സുകളുടെ എണ്ണം നാലായി. 156 വിദ്യാർത്ഥികൾ ഇവിടെ പഠിയ്ക്കുന്നു. പ്രിൻസിപ്പാൾ അടക്കം 22 അദ്ധ്യാപകർ ജോലി ചെയ്യുന്നുണ്ട്. 10 സ്ഥിരം പോസ്റ്റും 11 ഗസ്റ്റ് അദ്ധ്യാപകരുമാണുള്ളത്.

കോളേജിന് ഏറ്റെടുത്തത് : 5.12 ഏക്കർ.

ഇലന്തൂർ ഗവ.കോളേജിന് കണ്ടെത്തിയ സ്ഥലത്തിന്റെ റോഡിനായുള്ള സർവേ പൂർത്തിയായിട്ടുണ്ട്. റോഡിന് വീതി കൂട്ടും. ഉടൻ നടപടികൾ പൂർത്തിയാകും. സാങ്കേതിക അനുമതി ലഭ്യമായി​ട്ടുണ്ട്.

മന്ത്രി വീണാജോർജ്