കെ-സ്മാർട്ട് ഇനി പഞ്ചായത്തുകളിലേക്ക് കരകുളത്ത് പൈലറ്റ് റൺ

നെടുമങ്ങാട്: പൊതുജനങ്ങൾക്ക് എളുപ്പത്തിൽ സേവനം ലഭ്യമാക്കാനും ജീവനക്കാരുടെ ജോലിഭാരം കുറയ്ക്കാനും ലക്ഷ്യമിട്ട് നഗരസഭകളിൽ നടപ്പാക്കിയ കെ-സ്മാർട്ട് ഇനി ത്രിതല പഞ്ചായത്തുകളിലും.

തിരുവനന്തപുരം ജില്ലാ പഞ്ചായത്ത്, നെടുമങ്ങാട് ബ്ലോക്ക് പഞ്ചായത്ത്, കരകുളം ഗ്രാമപഞ്ചായത്ത്, എന്നിവിടങ്ങളിലാണ് കെ-സ്മാർട്ടിന്റെ പൈലറ്റ് റൺ നടപ്പിലാക്കുന്നത്. ഏപ്രിൽ മുതൽ കെ-സ്മാർട്ട് മറ്റ് ത്രിതല പഞ്ചായത്തുകളിലേക്കും വ്യാപിപ്പിക്കും. കേരളത്തിലെ തദ്ദേശസ്വയംഭരണസ്ഥാപനങ്ങളുടെ സേവനങ്ങൾ പൂർണമായും ഡിജിറ്റൽവത്കരിക്കുന്നതിന്റെ ഭാഗമായി ഇൻഫർമേഷൻ കേരള മിഷനുമായി സഹകരിച്ചാണ് കെ-സ്മാർട്ട് സോഫ്ട് വെയർ വികസിപ്പിച്ചത്.

സേവനങ്ങൾ

നഗരസഭകളിൽ കഴിഞ്ഞ വർഷം മുതൽ കെ-സ്മാർട്ട് നടപ്പിലാക്കിയത് വിജയമായിരുന്നു. സിവിൽ രജിസ്‌ട്രേഷൻ, പ്രോപ്പർട്ടി ടാക്‌സ്, പബ്ലിക് ഗ്രീവൻസ്, മീറ്റിംഗ് മാനേജ്മെന്റ്, ബിസിനസ് ഫെസിലിറ്റേഷൻ, വാടക/പാട്ടം, പ്രൊഫഷണൽ ടാക്‌സ്, പാരാമെഡിക്കൽ ട്യൂട്ടോറിയൽ രജിസ്‌ട്രേഷൻ, പെറ്റ് ലൈസൻസ്, പ്ലാൻ ഡെവലപ്മെന്റ്, സേവന പെൻഷൻ, ഡിജിറ്റൽ ഫയൽ മാനേജ്‌മെന്റ്‌, കോൺഫിഗറേഷൻ മൊഡ്യൂൾ, നോ യുവർലാൻഡ്, മൊബൈൽ ആപ്പ് എന്നീ സേവനങ്ങളോടെയാണ് കെ-സ്മാർട്ട് ഗ്രാമപഞ്ചായത്തുകളിൽ നടപ്പിലാക്കുന്നത്.

മാറ്റം എളുപ്പമാവും

ഗ്രാമപഞ്ചായത്തുകളിൽ നിലവിൽ ഐ.എൽ.ജി.എം.എസ് സംവിധാനമുള്ളതിനാൽ കെ-സ്മാർട്ടിലേക്കുള്ള മാറ്റം എളുപ്പമാകുമെന്നും ഇ-ഗവേണൻസിൽ സമാനതകളില്ലാത്ത മുന്നേറ്റത്തിനാണ് തദ്ദേശസ്വയംഭരണ വകുപ്പ് തുടക്കമിട്ടിരിക്കുന്നതെന്നും ഇൻഫർമേഷൻ കേരള അധികൃതർ പറഞ്ഞു.കരകുളം ​ഗ്രാമപഞ്ചായത്തിൽ കെ-സ്മാർട്ട് സോഫ്ട് വെയർ ആപ്ലിക്കേഷന്റെ ഉദ്ഘാടനം പ്രസിഡന്റ് യു.ലേഖറാണി നിർവഹിച്ചു.ഗ്രാമപഞ്ചായത്ത് വൈസ് പ്രസിഡന്റ് സുനിൽകുമാർ ടി.എ.അദ്ധ്യക്ഷത വഹിച്ചു. സെക്രട്ടറി സജികുമാർ ബി, ഇൻഫർമേഷൻ കേരളമിഷൻ ഡയറക്ടർ ഡോ.സന്തോഷ് ബാബു, ജോയിന്റ് ഡയറക്ടർ ടിമ്പിൾ മാ​ഗി, ഡെപ്യൂട്ടി ഡയറക്ടർ (ടെക്നിക്കൽ) ഡോ.നൗഫൽ, സ്റ്റാൻഡിം​ഗ് കമ്മിറ്റി ചെയർമാൻ കരകുളം വി.രാജീവ്, മറ്റു ജനപ്രതിനിധികൾ എന്നിവർ പങ്കെടുത്തു.