പൂവമ്പാറയിൽ സംരക്ഷണവേലി പൂർത്തിയായി

ആറ്റിങ്ങൽ: ദേശീയപാതയിൽ ആറ്റിങ്ങൽ പൂവമ്പാറ പാലത്തിന്റെ കൈവരികളിലെ സംരക്ഷണവേലിയുടെ നിർമ്മാണം പൂർത്തിയായി. ഒ.എസ്.അംബിക എം.എൽ.എയുടെ പ്രാദേശിക വികസന ഫണ്ടിൽ നിന്ന് 15.80ലക്ഷം രൂപ ചെലവഴിച്ചാണ് സംരക്ഷണ വേലി നിർമ്മിച്ചത്. ദേശീയപാത പൊതുമരാമത്ത് വിഭാഗത്തിനായിരുന്നു നിർമ്മാണച്ചുമതല. പാലത്തിന്റെ കൈവരികളിൽ പത്തടി ഉയരത്തിൽ ഇരുമ്പ് പൈപ്പ് സ്ഥാപിച്ച് അതിൽ ഇരുമ്പിന്റെ തന്നെ വല സ്ഥാപിച്ചാണ് സംരക്ഷണ വേലി നിർമ്മിച്ചത്. പാലത്തിലെ സംരക്ഷണവേലി യാഥാർത്ഥ്യമാകുന്നതോടെ നാട്ടുകാരുടെ ദീർഘകാല ആവശ്യത്തിന് പരിഹാരമാകും.

പാലം നിർമ്മിച്ചത് 1974ൽ

അനുവദിച്ച തുക 15.80 ലക്ഷം

ഫയർഫോഴ്സിന് ആശ്വാസം

പാലത്തിന്റെ കൈവരിയുടെ ഉയരക്കുറവുകാരണം നിരവധി പ്രശ്നങ്ങളാണ് ഫയർഫോഴ്സ് നേരിട്ടിരുന്നത്. രാത്രികാലങ്ങളിൽ നദിയിലേക്ക് മാലിന്യം നിക്ഷേപിക്കുന്നതും പാലത്തിൽ നിന്ന് നദിയിലേക്ക് ആത്മഹത്യയ്ക്ക് ശ്രമിക്കുന്നവരും നിരവധിയാണ്. തൊട്ടടുത്തുള്ള ഫയർഫോഴ്സിന് ഈ ആത്മഹത്യകൾ പ്രധാന പ്രശ്നമായി മാറിയിട്ട് കാലങ്ങളായി. നിരവധി ജീവനുകളെ സേന രക്ഷിച്ചിട്ടുണ്ട്. പാലത്തിന് സമീപം ആളുകൾ അലസമായി ചുറ്റിത്തിരിയുന്നത് കണ്ടാൽ നാട്ടുകാർ ഫയർസ്റ്റേഷനിൽ വിളിച്ചറിയിക്കുന്നു. പാലത്തിൽ സംരക്ഷണവേലി കെട്ടിയതോടെ ഈ പ്രശ്നത്തിന് പരിഹാരമായി.

സുരക്ഷാ ക്യാമറ

വാഹനാപകടങ്ങൾക്കേറെ സാദ്ധ്യതയുള്ള ഈ മേഖലയിലും പാലത്തിന് ഇരുവശവും സുരക്ഷാ ക്യാമറകൾ സ്ഥാപിക്കണമെന്ന ആവശ്യം ശക്തമാണ്. നാട്ടുകാരോ യാത്രക്കാരോ പറഞ്ഞാണ് മിക്കവാറും പാലത്തിന് സമീപത്തുള്ള ഫയർഫോഴ്സ് അപകടങ്ങളറിയുന്നത്. എന്നാൽ,​ യഥാസമയം അറിയാൻ കഴിഞ്ഞില്ലെങ്കിൽ അപകടത്തിൽപ്പെട്ടവരെ രക്ഷിക്കാൻ കഴിഞ്ഞെന്നുവരില്ല. സുരക്ഷാ ക്യാമറ സ്ഥാപിച്ച് പൊലീസിനും ഫയർഫോഴ്സിനും നിരീക്ഷിക്കാനുള്ള സംവിധാനമൊരുക്കിയാൽ പെട്ടെന്നു തന്നെ ഇടപെടാനാവും.