മഞ്ഞിൽ പൂത്തുലഞ്ഞ് മാവുകൾ

കല്ലറ: മഞ്ഞിൽ പൂത്തുലഞ്ഞ് മാവുകൾ.കാലാവസ്ഥാ വ്യതിയാനമില്ലാത്തതിനാൽ നാടൻ മാമ്പഴങ്ങൾ സുലഭമാവുമെന്നാണ് പ്രതീക്ഷ.സാധാരണ നിലയിൽ മാവും പ്ലാവും പൂക്കണമെങ്കിൽ തണുപ്പും മഞ്ഞുവീഴ്ചയും ആവശ്യമാണ്.ഈ വർഷം ആഴ്ചകളായി കൂടിയ തണുപ്പാണ് മലയോരത്ത് അനുഭവപ്പെട്ടത്.ഇത് മേഖലയിലെ റബർ,മാവ് എന്നിവയ്ക്ക് നല്ലകാലമാണ്.ഇതര സംസ്ഥാനങ്ങളിൽ നിന്നുള്ള മാമ്പഴങ്ങളേക്കാൾ രുചിയും ഗുണമേന്മയുമുള്ളതാണ് നാടൻ മാമ്പഴങ്ങൾ.പൂവുകൾ വിരിഞ്ഞ് കായ് പിടിക്കുന്നത് വരെ മഴ പെയ്യരുതേ എന്ന പ്രാർത്ഥനയിലാണ് മാമ്പഴ സ്‌നേഹികൾ.റബറും മാവും പൂവിടുമ്പോൾ തേനുത്‌പാദനവും കൂടും. ഇത് മുൻകൂട്ടി കണ്ട് തേൻ കർഷകർ തോട്ടങ്ങളിൽ ഏറെ മുന്നൊരുക്കവും നടത്തിയിട്ടുണ്ട്.

പ്രതീക്ഷയിൽ റബർ കർഷകരും

മഞ്ഞ് വീഴ്ച കുറഞ്ഞെങ്കിലും രാവിലത്തെ തണുപ്പ് റബർ കർഷകർക്ക് പ്രതീക്ഷ നൽകുന്നു. തണുപ്പ് കൂടുന്തോറും റബർ പാലിന്റെ അളവ് വർദ്ധിക്കും. ഇത് റബർ ഉത്പാദനം കൂട്ടും. തണുപ്പു നില നിൽക്കുമ്പോൾ തന്നെ അപ്രതീക്ഷിതമായി മഴ പെയ്താൽ മാമ്പൂവ് കൊഴിഞ്ഞു പോകാനും കരിഞ്ഞു പോകാനും ഇടയാക്കും.

ഫോട്ടോ: വയ്യാറ്റിൻകര റോഡരികിൽ പൂത്തു നിൽക്കുന്ന മാവ്.