പള്ളിപ്പുറത്ത് റോഡിൽ ചെളി, ബൈക്ക് അപകടങ്ങൾ പതിവ്

​കഴക്കൂട്ടം: ദേശീയപാത വികസനവുമായി ബന്ധപ്പെട്ട് പള്ളിപ്പുറം വില്ലേജ് ഓഫീസിന് സമീപത്തെ റോഡിൽ വെട്ടിയിട്ട മണ്ണ് മാറ്റാത്തത് അപകടക്കെണിയാകുന്നു. ഇതുകാരണം പള്ളിപ്പുറം പെട്രോൾ പമ്പ് മുതൽ അണ്ടർപാസിലേക്ക് തിരിയുന്ന ജംഗ്ഷൻ വരെയുള്ള അരക്കിലോമീറ്ററിലധികം ദൂരത്ത് ചെളിയാണ്. ​

മഴ പെയ്‌താൽ ഇതുവഴി പോകുന്ന ഇരുചക്ര വാഹനങ്ങൾ കൂട്ടത്തോടെ തെന്നിവീഴുന്ന അവസ്ഥയാണ്. കഴിഞ്ഞ ദിവസം രാത്രിയും അപകടമുണ്ടായി. ​ദേശീയപാത അതോറിട്ടിയുടെ ഭാഗത്തുനിന്നുള്ള ഗുരുതരമായ അനാസ്ഥയാണ് ഈ ദുരിതത്തിന് കാരണമെന്നാണ് ആരോപണം. അപകടം വർദ്ധിച്ചതോടെ നാട്ടുകാർ ഹൈവേ അധികൃതരെ സ്ഥലത്തേക്ക് വിളിച്ചുവരുത്തി. അടിയന്തരമായി ചെളി നീക്കം ചെയ്യണമെന്നാണ് നാട്ടുകാരുടെ ആവശ്യം.