മിന്നൽച്ചുഴലിയിൽ കനത്ത നഷ്ടം

ഒല്ലൂർ: ചൊവ്വാഴ്ച രാവിലെ മണ്ണുത്തി മേഖലയിലുണ്ടായ മിന്നൽ ചുഴലിയിൽ വ്യാപക നാശനഷ്ടം. വെള്ളാനിക്കരയിലെ വെള്ളാനിശ്ശേരിയിൽ നാട്ടക്കൽ പത്മനാഭന്റെ ഓടിട്ട വീടിന്റെ മേൽക്കൂര കാറ്റിൽ പറന്നു പോയി. പ്രദേശത്തെ വീടുകളിലെ മേൽക്കൂര ഷീറ്റുകൾ പറന്നതോടൊപ്പം പറമ്പുകളിലെ നിരവധി മരങ്ങളും കടപുഴകി വീണു. 3 വൈദ്യുതി തൂണുകൾ ഒടിഞ്ഞു വീണു.

നടത്തറ മേഖലയിലെ മുളയം, കൊഴുക്കുള്ളി, പൂച്ചട്ടി എന്നിവിടങ്ങളിലും കാറ്റ് സംഹാര താണ്ഡവമാടി. കൊഴുക്കുള്ളിയിലും നിരവധി ഷീറ്റുകൾ പറന്നുപോയപ്പോൾ റോഡിന് കുറുകെ നിരവധി മരങ്ങളും പത്തോളം വൈദ്യുതിത്തൂണുകളും ഒടിഞ്ഞ് വീണു.