ഇന്ത്യൻ കരസേനയ്ക്ക് 'വിജയ്' വെറുമൊരു വാക്കല്ല; വരുന്നത് അടിമുടി മാറ്റം

ന്യൂഡൽഹി: ഇന്ത്യൻ കരസേനയുടെ ആധുനികവൽക്കരണത്തിനാണ് പ്രഥമ പരിഗണനയെന്ന് കരസേന മേധാവി ജനറൽ ധീരജ് സേത്ത്. ഇതിനായി 'വിജയ് (VIJAY) കർമ്മ പദ്ധതി പ്രഖ്യാപിക്കുകയും ചെയ്തു. പുതിയ യുദ്ധമുഖങ്ങൾക്ക് പ്രാപ്തമാകുന്ന രീതിയിൽ സേനയിൽ മാറ്റം കൊണ്ടുവരികയാണ് ലക്ഷ്യമെന്നും അദ്ദേഹം കൂട്ടിച്ചേർത്തു. കരസേനയുടെ 31-ാം മേധാവിയായി ചുമതലയേറ്റതിന് പിന്നാലെയാണ് അദ്ദേഹം ഇക്കാര്യം വ്യക്തമാക്കിയത്.

V - (Vigilance and Preparedness)

ജാഗ്രതയോടെ തയ്യാറെടുക്കുന്നതാണ് 'വി' കൊണ്ട് അദ്ദേഹം അർത്ഥമാക്കിയത്. അതിർത്തികളിലും മറ്റും നിരന്തരമായ ജാഗ്രത തുടരുമെന്നും ധീരജ് സേത്ത് പറഞ്ഞു. നമ്മുടെ സുരക്ഷയ്‌ക്കെതിരെ നേരിടുന്ന ഏത് വെല്ലുവിളിയെയും നേരിടുന്നതിന് സൈന്യത്തെ തയ്യാറെടുപ്പിക്കും.

I - ( Innovation and transformation)

സിദ്ധാന്തത്തിലും സാങ്കേതികവിദ്യയിലും നവീകരണത്തിന് വലിയ പ്രധാന്യം നൽകിക്കൊണ്ട് സെെന്യത്തിന്റെ ചിന്തയും കഴിവും വികസിപ്പിക്കും. മാറിക്കൊണ്ടിരിക്കുന്ന യുദ്ധ സാഹചര്യങ്ങളുമായി പൊരുത്തപ്പെടാൻ സൈന്യത്തിന് പരിവർത്തനം ആവശ്യമാണെന്നും അദ്ദേഹം കൂട്ടിച്ചേർത്തു.

J - (Jointness and integration)

ആധുനിക സൈനിക പ്രവർത്തനങ്ങൾക്ക് കൂട്ടായ്മ ആവശ്യമാണ്. ഇന്ത്യൻ വ്യോമസേനയും നാവികസേനയുമായി കൂടുതൽ ഏകോപനത്തിന് പ്രധാന്യം നൽകുമെന്നും ധീരജ് സേത്ത് വ്യക്തമാക്കി. കൂട്ടായ്മ മാത്രമല്ല ഏകീകരണവും ഇതിൽ അദ്ദേഹം ഉൾപ്പെടുത്തുന്നു.

A - (Atmanirbharata)

സൈന്യം സ്വയം പര്യാപ്തത നേടണം. തദ്ദേശീയ പ്രതിരോധ സാങ്കേതികവിദ്യകളും വ്യവസായവും കൂടുതൽ ഉപയോഗിക്കണമെന്നും അദ്ദേഹം പറഞ്ഞു. നമ്മുടെ രാജ്യത്ത് തന്നെ ഉണ്ടാക്കുന്ന ഉപകരണങ്ങൾ ഉപയോഗിച്ച് യുദ്ധം വിജയിക്കുക എന്നതാണ് തങ്ങളുടെ ലക്ഷ്യമെന്നും ധീരജ് സേത്ത് വ്യക്തമാക്കി.

Y - (Yodha First)

ഓരോ സൈനികനും ഒരു യോദ്ധവാണ്. ഓരോ യോദ്ധവിനും സാങ്കേതിക വെെദഗ്ദ്ധ്യം, പരിശീലനം എന്നിവ ഉറപ്പാക്കുമെന്നും അദ്ദേഹം വ്യക്തമാക്കി.