'ഗഗൻയാന്റെ ആദ്യ ദൗത്യം ഈ വർഷം തന്നെയുണ്ടാകും', വിക്ഷേപിച്ചത് ചാര ഉപഗ്രഹമല്ലെന്ന് ഐഎസ്‌‌ആർഒ ചെയർമാൻ

ശ്രീഹരിക്കോട്ട: മനുഷ്യനെ ബഹിരാകാശത്തെത്തിക്കാനുള്ള ഇന്ത്യൻ പദ്ധതിയായ ഗഗൻയാന്റെ ഭാഗമായുള്ള ആദ്യ ആളില്ലാ ദൗത്യത്തിന്റെ വിക്ഷേപണം ഈ വർഷം തന്നെയുണ്ടാകുമെന്ന് ഐഎസ്‌ആർഒ ചെയ‌ർമാൻ വി നാരായണൻ. ദൗത്യവുമായി ബന്ധപ്പെട്ട ജോലികൾ അതിവേഗം പുരോഗമിക്കുകയാണെന്ന് അദ്ദേഹം വ്യക്തമാക്കി. ജിഎസ്‌എൽവി - എഫ് 17 റോക്കറ്റ് ഉപയോഗിച്ച് ഇഒഎസ് - 05 ഭൗമനിരീക്ഷണ ഉപഗ്രഹം വിജയകരമായി വിക്ഷേപിച്ച ശേഷം സംസാരിക്കുകയായിരുന്നു അദ്ദേഹം.

നടപ്പ് സാമ്പത്തിക വർഷത്തിൽ ഐഎസ്‌ആർഒ നേടുന്ന ആദ്യ വിജയമാണിത്. ഈ സാമ്പത്തിക വർഷം തന്നെ നാവിഗേഷൻ ഉപഗ്രഹമായ എൻവിഎസ് -03 ഉൾപ്പെടെ ആറ് വിക്ഷേപണങ്ങൾ കൂടി ഐഎസ്‌ആർഒ ലക്ഷ്യമിടുന്നുണ്ടെന്ന് അദ്ദേഹം വ്യക്തമാക്കി. ഇപ്പോൾ വിക്ഷേപിച്ച ഇഒഎസ് - 05 ചാര ഉപഗ്രഹമാണെന്ന തരത്തിലുള്ള പ്രചാരണങ്ങളെ അദ്ദേഹം തള്ളി. ഒമ്പത് വർഷമാണ് ഇഒഎസ് - 05ന്റെ പ്രവർത്തന കാലാവധിയെന്നും വി നാരായണൻ പറഞ്ഞു.

വിക്ഷേപണ വാഹനം പ്രതീക്ഷിച്ചതിനെക്കാൾ മികച്ച പ്രകടനമാണ് കാഴ്‌ചവച്ചത്. 29,000 കിലോമീറ്റർ ദൂരത്തിലുള്ള ഭ്രമണപഥത്തിൽ ഉപഗ്രഹം എത്തിക്കാനാണ് പ്രതീക്ഷിച്ചതെങ്കിലും 171 കിലോമീറ്റർ x 31,026 കിലോമീറ്റർ ഓർബിറ്റിലാണ് ഉപഗ്രഹത്തെ എത്തിക്കാനായതെന്നും വി നാരായണൻ പറഞ്ഞു.

ഭൗമനിരീക്ഷണത്തിനായി ഇഒഎസ് -05

ഇന്ന് പുലർച്ചെ 2.55നായിരുന്നു ഇഒഎസ് -05 ഉപഗ്രഹത്തിന്റെ വിക്ഷേപണം. ആന്ധ്രാപ്രദേശിലെ ശ്രീഹരിക്കോട്ടയിലെ സതീഷ് ധവാൻ സ്‌പെയിസ് സെന്ററിലെ രണ്ടാമത് ലോഞ്ച് പാടിൽ നിന്നാണ് ഐഎസ്‌ആഒയുടെ വിജയദൗത്യം ഉണ്ടായത്. സാധാരണ റിമോട്ട് സെൻസിംഗ് ഉപഗ്രഹങ്ങൾ ഭൂമിക്കുമുകളിൽ 100 കിലോമീറ്റർ മാത്രം ഉയരത്തിൽ ഭ്രമണം ചെയ്യുകയാണ് പതിവ്. എന്നാൽ ഇഒഎസ് - 05ന്റെ ഭ്രമണപഥം 36000കിലോമീറ്റർ ഉയരത്തിലാണ്.

കൂടുതൽ ഉയരത്തിൽ ഭ്രമണപഥത്തിൽ എത്തുന്നതോടെ ഭൂമിയുടെ ഭ്രമണവേഗത്തിനൊപ്പം നീങ്ങാൻ ഈ ഉപഗ്രഹത്തിനാകും. സദാസമയവും ഇന്ത്യയ്ക്ക് മുകളിൽ ഈ ഉപഗ്രഹമുണ്ടാകും. അരമണിക്കൂറിലൊരിക്കൽ ഇന്ത്യയെ നിരീക്ഷിച്ച് ചിത്രങ്ങളും വിവരങ്ങളും അയക്കും.

കാട്ടുതീ, ചുഴലിക്കാറ്റ്, ശീതകാറ്റ്, മേഘവ്യതിയാനങ്ങൾ ഇവയെല്ലാം കൃത്യമായി മുൻകൂട്ടി കാണാനും ഇഒഎസ് - 05 സഹായിക്കും. കാലാവസ്ഥ, ദുരന്തനിവാരണ കാര്യങ്ങളിൽ വലിയ നേട്ടമാകും ഇത്. മറ്റ് ഉപഗ്രഹങ്ങൾ ഒരേസ്ഥലം നിരീക്ഷിക്കുമ്പോൾ പുതിയ ഉപഗ്രഹത്തിന് ഇന്ത്യയുടെ ഏത് ഭാഗത്തേക്കും നോട്ടം മാറ്റാം. ഇതും ഇന്ത്യയ്‌ക്ക് വലിയ ഗുണമാണ്.