പശ്ചിമേഷ്യയിലെ  ഓപ്പറേഷൻ സിന്ദൂർ

പഹൽഗാം ആക്രമത്തെ തുടർന്ന് പാകി​സ്ഥാനെതി​രെ ഇന്ത്യ നടത്തി​യ ഓപ്പറേഷൻ സി​ന്ദൂർ സൈനി​ക നടപടി​യെയും അതി​ന്റെ പരി​സമാപ്‌തി​യെയും അനുസ്മരി​പ്പി​ക്കുന്നതാണ് പശ്ചി​മേഷ്യയി​ലെ ഇസ്രയേൽ - ഇറാൻ സംഘർഷവും, അമേരി​ക്കയുടെ ഇറാൻ ആക്രമണവും, ട്രംപി​ന്റെ വെടി​നി​റുത്തൽ വെളി​പ്പെടുത്തലും. പാകി​സ്ഥാനി​ലെ ഭീകരകേന്ദ്രങ്ങളും സൈനി​ക താവളങ്ങളുമാണ് അതി​ർത്തി​ ഭേദി​ക്കാതെ ഇന്ത്യ ആക്രമി​ച്ചത്. ഇന്ത്യൻ മിസൈലുകൾ അവി​ടെയുണ്ടാക്കിയ നാശം ലോകമറി​ഞ്ഞു.

പാക് പ്രത്യാക്രമണങ്ങളെ തുരത്തി​ ഇന്ത്യൻ വ്യോമപ്രതി​രോധം അജയ്യമായി​ നി​ലകൊണ്ടു. പാക് ഷെല്ലാക്രമണങ്ങളി​ലാണ് അതി​ർത്തി​ ഗ്രാമങ്ങളി​ൽ ജീവനാശമുണ്ടായത്. ഇന്ത്യയോ പാകി​സ്ഥാനോ പറയും മുമ്പ് അമേരി​ക്കൻ പ്രസി​ഡന്റ് ഡൊണാൾഡ് ട്രംപാണ് വെടി​നി​റുത്തൽ കാര്യം പുറത്തുവി​ട്ടത്. താനാണ് അതി​ന് പി​ന്നി​ലെന്നായിരുന്നു അവകാശവാദം. ഇന്ത്യ ഇക്കാര്യം നിഷേധി​ച്ചു. പിന്നീടും പാകി​സ്ഥാൻ ചി​ല സാഹസങ്ങൾ കാണിച്ചെങ്കിലും ഇന്ത്യ പ്രതി​കരി​ച്ചി​ല്ല. സംഘർഷവുമടങ്ങി​.

പശ്ചി​മേഷ്യൻ സംഘർഷവും സമാന ശൈലി​യി​ലാണ്. ഇസ്രയേലി​നെതി​രെ ഭീകരാക്രമണം നടത്തുന്ന ഹമാസ്, ഹി​സ്ബുള്ള, ഹൂതി​ സംഘടനകളുടെ തലതൊട്ടപ്പനായ ഇറാന്റെ സൈനി​ക താവളങ്ങളെയും ആണവകേന്ദ്രങ്ങളെയും അപ്രതീക്ഷി​തമായി​ ഇസ്രയേൽ ആക്രമി​ച്ചു. സൈനി​ക നേതൃത്വത്തെയും ആണവവി​ദഗ്ദ്ധരെയും കൊന്നു​. ഇറാന്റെ മി​സൈൽ പ്രത്യാക്രമണം ഇസ്രയേലി​ലെ ജനവാസ മേഖലകളിലുൾപ്പെടെ ചെറി​യ നാശങ്ങളുമുണ്ടാക്കി​. ഇതിനിടയിലാണ് കഴി​ഞ്ഞദി​വസം അമേരി​ക്കൽ സ്റ്റെൽത്ത് പോർവി​മാനങ്ങൾ ഇറാനി​ലെ മൂന്ന് ആണവകേന്ദ്രങ്ങളെ ആക്രമിച്ചത്. സംഘർഷം ഇറാനും മേഖലയ്‌ക്കും ആഗോള സാമ്പത്തി​ക വ്യവസ്ഥയ്‌ക്കും ഗുണകരമല്ലാത്തതിനാൽ അതവസാനി​പ്പി​ക്കേണ്ടത് അത്യാവശ്യമായി​രുന്നു. അതി​ന്റെ ഭാഗമാകാം അമേരി​ക്കയുടെ ഇടപെടൽ.

ഖത്തറിലെ അമേരിക്കൻ താവളത്തിലേക്കും ട്രംപി​ന്റെ പ്രഖ്യാപനത്തി​ന് ശേഷം ഇസ്രയേലിലേക്കും ഇറാൻ മിസൈലുകൾ തൊടുത്തെങ്കിലും കാര്യമായ നാശമുണ്ടായിട്ടില്ല. അതുകൊണ്ട് കടുത്ത പ്രത്യാക്രമണത്തിനും സാദ്ധ്യതയില്ല. ഇനി സംഘർഷം തണുക്കാനുള്ള സമയമാണ്. മൂന്നു രാജ്യങ്ങൾക്കും അതിനെക്കുറിച്ച് ബോദ്ധ്യമുണ്ടാകും.

 ഇറാനുണ്ടായത് വലിയ നാശം

സംഘർഷത്തിൽ അമേരിക്കയ്ക്ക് പ്രത്യേകിച്ച് നഷ്ടമൊന്നുമില്ല. ആ ഇടപെടലി​ലൂടെ ഇസ്രയേലിനൊപ്പം നിൽക്കാനും ഇറാന്റെ ആണവ ഭീഷണി വച്ചുപൊറുപ്പിക്കില്ലെന്ന് ബോദ്ധ്യപ്പെടുത്താനും അവർക്കായി. ഇസ്രയേലിന്റെ വ്യോമപ്രതിരോധ സംവിധാനം അജയ്യമാണെന്ന വിശ്വാസത്തിനും കോട്ടമുണ്ടായി. നാശനഷ്ടങ്ങളും ആൾനാശവും അവർക്കുണ്ടായി. പക്ഷേ ഇറാന്റെ ആണവ കേന്ദ്രങ്ങൾക്കും സൈന്യത്തിനുമുണ്ടായത് വലിയ നാശമാണ്. വിലപ്പെട്ട നേതൃനിരയ്‌ക്കും ജീവനാശമുണ്ടായി. അതിലേറെ ഇറാനെ ബുദ്ധിമുട്ടിലാക്കുക ദുർബലമായ മതാധിഷ്ഠിത ഭരണ നേതൃത്വത്തിനെതിരെ ഉയരാവുന്ന ആസന്നമായ വിമത പ്രക്ഷോഭമാണ്. അവരെ അടിച്ചമർത്തുക പഴയതുപോലെ എളുപ്പമാകില്ല, ഹമാസിനെയും ഹിസ്ബുള്ളയെയും ഉന്മൂലനം ചെയ്‌ത ശേഷമാണ് ഇസ്രയേലും അമേരിക്കയും ഇറാനെതിരെ തിരിഞ്ഞത്. യെമനിലെ ഹൂതികളിലേക്ക് ഇനി ശ്രദ്ധയൂന്നാനാകും ഇസ്രയേലിന്റെ നീക്കം. പശ്ചിമേഷ്യയിൽ സമാധാനം അകലെ തന്നെയാണ്. അടുത്ത സംഘർഷമേഖല ഇനി യെമനാകാനാണ് സാദ്ധ്യത.