ഭക്ഷ്യാവശിഷ്‌ടങ്ങളിൽനിന്ന് ചോക്ലേറ്റ്, ഉറുമ്പിൽനിന്ന് കോക്‌ടെയിലും; കൗതുകമായി പുത്തൻ പരീക്ഷണം

കോപ്പൻഹേഗ്: ചോക്ലേറ്റ് എന്ന് കേൾക്കുമ്പോൾ ആദ്യം മനസിലേക്കെത്തുന്നത് കൊക്കോയുടെ സമ്പന്നമായ രുചിയും മണവുമാണ്. എന്നാൽ, കൊക്കോ ചേർക്കാതെതന്നെ ചോക്ലേറ്റിന് സമാനമായ രുചിയിൽ ഡെസേർട്ടുകൾ കഴിച്ചാലോ? കോപ്പൻ ഹേഗിലെ സ്‌പോറ എന്ന ഫുഡ് ഇന്നോവേഷൻ ലാബിലാണ് അതിനായുള്ള പരീക്ഷണങ്ങൾനടക്കുന്നത്. ഭക്ഷണാവശിഷ്‌ടങ്ങളിൽനിന്നാണ് ഇവ തയ്യാറാക്കുന്നതെന്നതാണ് ഏറ്റവും വലിയ പ്രത്യേകത.അടുത്തിടെ ഇവിടം സന്ദർശിച്ച കണ്ടന്റ് ക്രിയേറ്റർമാരായ ആൻഡേഴ്‌സ് ഹൂസയും കൈറ്റ്‌ലിൻ ഓറുമാണ് ലാബിലെ വിചിത്രവും കൗതുകകരവുമായ ഭക്ഷണപരീക്ഷണങ്ങളുടെ ചിത്രങ്ങൾ സോഷ്യൽമീഡിയയിൽ പങ്കുവച്ചത്.

ശാസ്‌ത്രജ്ഞരുടെയും പാചകവിദഗ്‌ദ്ധരുടെയും ഒന്നിച്ചുള്ള പ്രവർത്തനത്തിലൂടെയാണ് ഭക്ഷണത്തിന്റെ ഭാവിയെക്കുറിച്ച് പരീക്ഷണങ്ങൾ നടത്തുന്ന ഇടമാണ് സ്‌പോറ. മാംസത്തിന് പകരമുള്ള പ്രോട്ടീൻ സ്രോതസുകൾ കണ്ടെത്തുന്നതുമുതൽ ഉപേക്ഷിക്കപ്പെടുന്ന ഭക്ഷ്യവിഭവങ്ങളെ പുതിയ രൂപത്തിൽ എങ്ങനെ ഉപയോഗിക്കാമെന്നതുവരെയുള്ള നിരവധി ആശയങ്ങളാണ് ഇവിടെ പരീക്ഷിക്കുന്നത്.