സഞ്ജുവിന്റെ സ്ഥാനം വീണ്ടും ഭീഷണിയിൽ? വരാനിരിക്കുന്ന മത്സരത്തിൽ അവസരം മറ്റൊരു താരത്തിനോ; നി‌ർദേശവുമായി മുൻതാരം

ന്യൂഡൽഹി: വെസ്റ്റ് ഇൻഡീസിനെതിരായ ട്വന്റി20 പരമ്പരയിൽ ശേഷിക്കുന്ന മത്സരങ്ങളിൽ കൗമാര താരം വൈഭവ് സൂര്യവംശിക്ക് അവസരം നൽകണമെന്ന ആവശ്യവുമായി മുൻ ഇന്ത്യൻ ക്രിക്കറ്റ് താരം അഭിഷേക് നായർ. പരമ്പരയിലെ അവസാന മത്സരത്തിലെങ്കിലും വൈഭവിനെ അന്തിമ ഇലവനിൽ ഉൾപ്പെടുത്തണമെന്നാണ് ഇന്ത്യയുടെ മുൻ സഹപരിശീലകനും കൂടിയായ അഭിഷേക് അഭിപ്രായപ്പെട്ടിരിക്കുന്നത്. ഇന്ത്യയുടെ പരിശീലകൻ ഗൗതം ഗംഭീറിനോടും ക്യാപ്റ്റൻ ശ്രേയസ് അയ്യരോടുമാണ് മുൻ താരം അഭ്യർത്ഥനയുമായെത്തിയത്.

പരമ്പരയിൽ ഇതുവരെ കഴിഞ്ഞ മൂന്ന് മത്സരങ്ങളിൽ ഇന്ത്യ രണ്ട് മത്സരങ്ങൾ വിജയിച്ച് മുന്നിലാണ്. നാളെ നടക്കാനിരിക്കുന്ന നാലാമത്തെ മത്സരത്തിൽ വിജയിച്ചാൽ ഇന്ത്യയ്ക്ക് പരമ്പര സ്വന്തമാക്കാൻ സാധിക്കും. 17-ാം തീയതി നടക്കാനിരിക്കുന്ന അഞ്ചാമത്തെ മത്സരത്തിൽ വൈഭവിന് അവസരം നൽകണം എന്നാണ് അഭിഷേക് നായർ പറയുന്നത്. പരമ്പര സ്വന്തമാക്കി കഴിഞ്ഞാൽ അവസാന മത്സരത്തിൽ ടീമിൽ മാറ്റങ്ങൾ വരുത്താൻ മാനേജ്‌മെന്റിന് കൂടുതൽ സ്വാതന്ത്ര്യമുണ്ടാകുമെന്ന് അദ്ദേഹം ചൂണ്ടിക്കാട്ടി.

വെസ്റ്റ് ഇൻഡീസിനെതിരായ ട്വന്റി20യിൽ ഇതുവരെ വൈഭവിന് കളത്തിലിറങ്ങാൻ അവസരം ലഭിച്ചിരുന്നില്ല. ഓപ്പണിംഗ് ബാറ്റ്സ്മാൻമാരായി അഭിഷേക് ശർമയ്ക്കും സഞ്ജു സാസണും ആണ് ഇതുവരെ അവസരം ലഭിച്ചത്. ബാറ്റിംഗിൽ സ്ഥിരത നിലനിർത്താൻ കഴിയാത്തതിനെത്തുടർന്ന് സഞ്ജു സാംസണിനെ നിരവധി മത്സരങ്ങളിൽ നിന്ന് മാറ്റി നിർത്തിയിരുന്നു. ഒരിടവേളയ്ക്ക് ശേഷമാണ് വെസ്റ്റ് ഇൻഡീസിനെതിരെ താരത്തിന് അവസരം ലഭിച്ചത്. ഇന്ത്യൻ ടോപ് ഓർഡറിൽ അഭിഷേക് ശർമയെയും സഞ്ജു സാംസണെയുമാണ് ടീം മാനേജ്‌മെന്റ് പ്രധാനമായും പരിഗണിക്കുന്നത്.

അവസാന മത്സരത്തിൽ വൈഭവിനെ പരിഗണിക്കുന്നത് യുവതാരമെന്ന നിലയിൽ അദ്ദേഹത്തിന്റെ കഴിവ് വിലയിരുത്താനും അന്താരാഷ്ട്ര ക്രിക്കറ്റിൽ അനുഭവസമ്പത്ത് നേടാനും സഹായിക്കുമെന്നാണ് അഭിഷേക് നായർ ചൂണ്ടിക്കാണിക്കുന്നത്. വൈഭവിന്റെ ആക്രമണോത്സുകമായ ബാറ്റിംഗ് ഇതിനകം ലോക ശ്രദ്ധ നേടിയിട്ടുണ്ടെന്നും അദ്ദേഹം വ്യക്തമാക്കി.