സിക്സടിയിൽ റെക്കാഡിട്ട് വൈഭവ് സൂര്യവംശി

ന്യൂഡൽഹി : ഐ.പി.എല്ലിൽ ഒരു സീസണിൽ കൂടുതൽ സിക്സുകൾ അടിക്കുന്ന ഇന്ത്യൻ താരമെന്ന റെക്കാഡ് സ്വന്തമാക്കി രാജസ്ഥാൻ റോയൽസിന്റെ യുവതാരം വൈഭവ് സൂര്യവംശി. കഴിഞ്ഞ രാത്രി ഡൽഹി ക്യാപ്പിറ്റൽസിനെതിരെ മൂന്ന് സിക്സടിച്ചതോടെ വൈഭവിന് 12 മത്സരങ്ങളിൽനിന്ന് 43 സിക്സുകളായി. 2024 ൽ 42 സിക്സുകളടിച്ച അഭിഷേക് ശർമയുടെ റെക്കോർഡാണ് വൈഭവ് പഴങ്കഥയാക്കിയത്.

ഇന്ത്യൻ കളിക്കാർക്ക് അപ്പുറത്തേക്കും പരിഗണിക്കുമ്പോൾ ഒരു സീസണിൽ കൂടുതൽ സിക്സുകൾ അടിച്ചത് ക്രിസ് ഗെയ്‌ലാണ്. 2012ൽ ആർ.സി.ബിക്ക് വേണ്ടി 59 സിക്സുകൾ. 17 സിക്സുകൾ കൂടി നേടിയാൽ ഈ റെക്കാഡും വൈഭവിന് മറികടക്കാം.

ലോകോത്തര ബൗളർമാരെ സിക്സടിച്ചു സ്വീകരിക്കുന്ന ശീലം വൈഭവ് ഡൽഹിക്കെതിരെയും ആവർത്തിച്ചു. പേസർമാരായ മിച്ചൽ സ്റ്റാർക്ക്, ലുങ്കി എൻഗിഡി എന്നിവരെ ആദ്യ പന്തിൽ സിക്സർ തൂക്കിയാണു വൈഭവ് സ്വീകരിച്ചത്.