ശ്രീലങ്കയിൽ ട്രെയിനിടിച്ച് 6 ആനകൾക്ക് ദാരുണാന്ത്യം

കൊളംബോ: ശ്രീലങ്കയിൽ ട്രെയിൻ ഇടിച്ച് ആറ് ആനകൾക്ക് ദാരുണാന്ത്യം. വ്യാഴാഴ്ച രാവിലെ കൊളംബോയ്ക്ക് കിഴക്കുള്ള ഹബരാനയിൽ ഒരു വൈൽഡ്‌ലൈഫ് റിസേർവിന് സമീപമായിരുന്നു സംഭവം. ആനക്കൂട്ടത്തെ ഇടിച്ച ട്രെയിൻ പാളം തെറ്റിയെങ്കിലും യാത്രക്കാരിൽ ആർക്കും പരിക്കില്ല. പരിക്കേറ്റ രണ്ട് ആനകൾ ചികിത്സയിലാണെന്ന് അധികൃതർ അറിയിച്ചു. ലോകത്ത് ആനയും മനുഷ്യനും തമ്മിലെ സംഘർഷം ഏറ്റവും കൂടിയ ഇടങ്ങളിലൊന്നാണ് ശ്രീലങ്ക. കഴിഞ്ഞ വർഷം 170ലേറെ മനുഷ്യർക്കും 500ഓളം ആനകൾക്കും ഇത്തരം സംഭവങ്ങളിൽ ജീവൻ നഷ്ടമായി. പ്രതിവർഷം 20 ആനകൾ രാജ്യത്ത് ട്രെയിൻ ഇടിച്ച് ചരിയുന്നുണ്ടെന്നാണ് കണക്ക്. വനനശീകരണവും ആവാസവ്യവസ്ഥയുടെ നാശവും മൂലം ആനകൾ ജനവാസ മേഖലകളിൽ ഇറങ്ങുന്നത് പതിവാണ്. ഏകദേശം 7,000 കാട്ടാനകൾ ശ്രീലങ്കയിലുണ്ടെന്ന് കരുതുന്നു.