അസിം മുനീറിന് സൗദി അറേബ്യയുടെ പരമോന്നത ബഹുമതി

റിയാദ്: പാകിസ്ഥാൻ സൈനിക മേധാവി ഫീൽഡ് മാർഷൽ അസിം മുനീറിന് സൗദി അറേബ്യയുടെ പരമോന്നത ബഹുമതികളിലൊന്നായ 'ഫസ്റ്റ് ക്ലാസ് കിംഗ് അബ്ദുൽ അസീസ് മെഡൽ' സമ്മാനിച്ചു.തിങ്കളാഴ്ച്ച റിയാദിലെ പ്രതിരോധ മന്ത്രാലയ ഓഫീസിൽ നടന്ന ചടങ്ങിൽ സൗദി പ്രതിരോധ മന്ത്രി ഖാലിദ് ബിൻ സൽമാൻ രാജകുമാരനാണ് മെഡൽ സമ്മാനിച്ചത്.സൈനിക മേധാവി ഇപ്പോൾ സൗദി അറേബ്യയിൽ ഔദ്യോഗിക സന്ദർശനത്തിലാണ്.

സൽമാൻ രാജാവിന്റെ പ്രത്യേക ഉത്തരവ് പ്രകാരമാണ് പാക് സൈനിക മേധാവിക്ക് മെഡൽ സമ്മാനിച്ചത്. സൗദി-പാകിസ്ഥാൻ സൗഹൃദം ശക്തിപ്പെടുത്തുന്നതിനും ഇരുരാജ്യങ്ങളും തമ്മിലുള്ള സംയുക്ത സഹകരണം വികസിപ്പിക്കുന്നതിനും ഫീൽഡ് മാർഷൽ അസിം മുനീർ നൽകിയ മികച്ച സേവനങ്ങൾ പരിഗണിച്ചാണ് ഈ ആദരം. സൈനിക മേധാവിയായി നിയമിതനായ അസിം മുനീറിനെ ഖാലിദ് രാജകുമാരൻ അഭിനന്ദിച്ചു. യോഗത്തിൽ, പ്രാദേശിക സുരക്ഷാ ചലനാത്മകത, പ്രതിരോധ, സൈനിക സഹകരണം, തന്ത്രപരമായ സഹകരണം, വികസിച്ചുകൊണ്ടിരിക്കുന്ന ഭൗമരാഷ്ട്രീയ വെല്ലുവിളികൾ എന്നിവയുൾപ്പെടെ പരസ്പര താൽപ്പര്യമുള്ള വിഷയങ്ങളെക്കുറിച്ച് ഇരുപക്ഷവും ചർച്ചകൾ നടത്തി.

സൗദി ഡെപ്യൂട്ടി പ്രതിരോധ മന്ത്രി അബ്ദുറഹ്മാൻ ബിൻ മുഹമ്മദ് ബിൻ അയ്യഫ് രാജകുമാരൻ, ചീഫ് ഓഫ് ജനറൽ സ്റ്റാഫ് ലഫ്റ്റനന്റ് ജനറൽ ഫയ്യാദ് ബിൻ ഹമീദ് അൽ റുവൈലി, മറ്റ് മുതിർന്ന പ്രതിരോധ ഉദ്യോഗസ്ഥർ എന്നിവർ ചടങ്ങിൽ പങ്കെടുത്തു. പാകിസ്ഥാനെ പ്രതിനിധീകരിച്ച് അംബാസഡർ അഹമ്മദ് ഫാറൂഖ്, മേജർ ജനറൽ മുഹമ്മദ് ജവാദ് താരിഖ്, ബ്രിഗേഡിയർ ജനറൽ മൊഹ്സിൻ ജാവേദ് തുടങ്ങിയ ഉന്നത സൈനിക ഉദ്യോഗസ്ഥരും ചടങ്ങിൽ സംബന്ധിച്ചു.