ഓണക്കാലത്ത് ടിക്കറ്റ് നിരക്ക് വർദ്ധിപ്പിച്ച് കെ എസ് ആർ ടി സി; എ സി സർവീസുകൾക്ക് 20 ശതമാനം വർദ്ധന

തിരുവനന്തപുരം: ഓണക്കാലത്ത് നിരക്ക് കൂട്ടി കെഎസ്ആർടിസി. അന്തർസംസ്ഥാന യാത്രയ്ക്ക് ഫ്ലെക്സി റേറ്റ് കൊണ്ടുവരാനാണ് നീക്കം. ഓഗസ്റ്റ്, സെപ്‌തംബർ മാസങ്ങളിലാണ് നിരക്ക് വർദ്ധന ഉണ്ടാവുക. എ സി സർവീസുകൾക്ക് 20ശതമാനം വർദ്ധനയുണ്ടാവും. എക്‌സ്‌പ്രസ്, ഡീലക്‌സ് സർവീസുകൾക്ക് 15ശതമാനം നിരക്കാണ് കൂട്ടിയത്.

സ്വിഫ്റ്റിന്റെ വരവോടെ അന്തർസംസ്ഥാന യാത്രകൾക്ക് മലയാളികൾ ഏറ്റവും കൂടുതൽ ആശ്രയിക്കുന്നത് കെഎസ്ആർടിസിയെ ആണ്. ഓണക്കാലത്ത് വിവിധ സംസ്ഥാനങ്ങളിൽ നിന്ന് നാട്ടിലേയക്ക് മടങ്ങുന്നവർ ധാരാളമാണ്. ഈ സാഹചര്യം കണക്കിലെടുത്താണ് ഓണക്കാലത്ത് ഏറ്റവും ഉയർന്ന തുക ഈടാക്കാനുള്ള ശ്രമം കെഎസ്ആർടിസി നടത്തുന്നത്. ഏറ്റവും തിരക്കുള്ള ദിവസം ഏറ്റവും ഉയർന്ന നിരക്ക് ഈടാക്കി ലാഭം കൊയ്യാനാണ് കെഎസ്ആർടിസി ലക്ഷ്യംവയ്ക്കുന്നത്.