വ​യോ​ജ​ന​ ​ക​മ്മീ​ഷ​ൻ യാ​ഥാ​ർ​ത്ഥ്യ​ത്തിലേക്ക്

യൂത്ത്, വനിതാ, മനുഷ്യാവകാശ കമ്മീഷനുകൾക്ക് പിന്നാലെ ഒടുവിൽ മുതിർന്ന പൗരന്മാരുടെ കമ്മീഷനും യാഥാർത്ഥ്യമാകുന്നു. ഒട്ടേറെ നിബന്ധനകളും ശുപാർശകളും ഉൾക്കൊള്ളിച്ചിട്ടുള്ള
കേരള സീനിയർ സിറ്റിസൺസ് ബിൽ 2023, മുതിർന്ന പൗരന്മാരെ പരിഗണിക്കാത്ത മക്കൾക്കും ബന്ധുക്കൾക്കും ആറുമാസം തടവും ഒരു ലക്ഷം പിഴയും ശുപാർശ ചെയ്യുന്നതാണ്.
ഒരു മുതിർന്ന പൗരന്റെ കുടുംബാംഗമോ ബന്ധുവോ നിയമപരമായ അവകാശിയോ മുതിർന്ന പൗരനെ ക്രൂരതയ്ക്ക് വിധേയനാക്കുകയോ പരിചരണ കേന്ദ്രത്തിലോ മറ്റേതെങ്കിലും സ്ഥലത്തോ അയാളുടെ സമ്മതത്തിന് വിരുദ്ധമായി പാർപ്പിക്കുകയോ ചെയ്താൽ മൂന്നുവർഷം വരെ നീട്ടിയേക്കാവുന്ന ഒരു കാലയളവിലേക്ക് തടവ് ശിക്ഷയും പിഴയും ലഭിക്കാം.
മുതിർന്ന പൗരന്റെ പരാതി: സെക്ഷൻ 4 പ്രകാരം ഒരു മുതിർന്ന പൗരന്റെ സംരക്ഷണത്തിനും ക്ഷേമത്തിനുമായി ചുമതലയുള്ള ഒരു കുടുംബാംഗമോ ബന്ധുവോ നിയമപരമായ അവകാശിയോ അത് ചെയ്യുന്നതിൽ പരാജയപ്പെട്ടാൽ മുതിർന്ന പൗരന് തന്റെ പരിചരണത്തിനും ക്ഷേമത്തിനുമായി കമ്മീഷനിൽ പരാതി നൽകാം. കമ്മീഷന് അത് അന്വേഷിക്കുകയും ചുമതലയുള്ള ബന്ധുക്കളുമായി അനുരഞ്ജനം നടത്തുകയും ചെയ്യും. ഉപവകുപ്പ് (2) പ്രകാരം അനുരഞ്ജനം നടത്താൻ കഴിയാത്ത സാഹചര്യത്തിൽ, കമ്മീഷൻ, ഇരുകക്ഷികളുടെയും വാദം കേട്ട ശേഷം, മെയിന്റനൻസ് ആൻഡ് വെൽഫെയർ ഓഫ് സീനിയർ സിറ്റിസൺസ് ആക്ട് സെക്ഷൻ 7 പ്രകാരം രൂപീകരിച്ച ട്രിബ്യൂണൽ പാസാക്കേണ്ട മെയിന്റനൻസ് ഓർഡർ ഒഴികെ ഉചിതമായ ഉത്തരവുകൾ പുറപ്പെടുവിക്കാവുന്നതാണ്.

വയോജനങ്ങൾക്ക്

കൈത്താങ്ങായിമുതിർന്ന പൗരന്മാരെ ബഹുമാനിക്കുക എന്നത് എല്ലാ പൗരന്മാരുടെയും കടമയാണ് എന്ന് ബില്ലിൽ പ്രത്യേക പരാമർശമുണ്ട്. സംസ്ഥാനമൊട്ടാകെ പ്രാബല്യത്തിൽ വരും വിധമാണ് ഇതിന്റെ കരടുരേഖ നിയമപരിഷ്‌കരണ കമ്മീഷൻ സർക്കാരിന് സമർപ്പിച്ചിരിക്കുന്നത്. കൂട്ടുകുടുംബം സമ്പ്രദായം എന്ന പരമ്പരാഗത ഇന്ത്യൻ സങ്കൽപ്പം പ്രായമായവരുടെ സുരക്ഷയും ക്ഷേമവും ഉറപ്പാക്കുന്ന ശക്തമായ ഒരു സ്തംഭമായിരുന്നു. എന്നാൽ ആധുനികവത്ക്കരണവും ആഗോളവത്ക്കരണവും അണുകുടുംബങ്ങളുടെ പിറവിക്ക് വഴിയൊരുക്കിയതോടെ സ്വതന്ത്രമായി ജീവിക്കാൻ പ്രോത്സാഹിപ്പിക്കുന്ന
ചെറുപ്പക്കാരുടെ ചിന്തകൾ പ്രായമായവരുടെ ജീവിത സാഹചര്യങ്ങളെ പ്രതികൂലമായി ബാധിക്കുകയും അവരെ അനാഥയങ്ങളിലെത്തിക്കുകയോ, പെരുവഴിയിലിറക്കി വിടുകയോ ചെയ്യുന്ന സ്ഥിതിവിശേഷത്തിലെത്തി. കേരളത്തിൽ, കുടുംബരീതിയിലെ മാറ്റങ്ങൾ, ഉയർന്ന ആയുർദൈർഘ്യം, മൂല്യങ്ങളുടെയും മാനദണ്ഡങ്ങളുടെയും വിശ്വാസങ്ങളുടെയും അപചയം എല്ലാം വയോജന ജീവിതം ദുസഹമാക്കി. ഈ സാഹചര്യത്തിലാണ് പുതിയ ബില്ലിന്റെ പ്രാമുഖ്യം വർദ്ധിക്കുന്നത്.

ലക്ഷ്യം വയോജന

ക്ഷേമവും പിന്തുണയും

മുതിർന്ന പൗരന്മാരുമായി ബന്ധപ്പെട്ട കാര്യങ്ങളിൽ പ്രത്യേക അറിവും അനുഭവപരിചയവുമുള്ള ഒരു അദ്ധ്യക്ഷനും രണ്ട് അംഗങ്ങളുമടങ്ങുന്നതാണ് സീനിയർ സിറ്റിസൺ കമ്മീഷൻ. കമ്മീഷനിൽ അധികാരമേറ്റ തീയതി മുതൽ മൂന്നു വർഷത്തേക്കാണ് ചെയർപേഴ്സന്റെയും അംഗങ്ങളുടെയും കാലാവധി. ചെയർപേഴ്സൺ അല്ലെങ്കിൽ അംഗങ്ങൾ രണ്ട് ടേമുകളിൽ കൂടുതൽ പദവി വഹിക്കാൻ യോഗ്യരല്ല. ഗവൺമെന്റിന്റെ ഒരു അഡീഷണൽ സെക്രട്ടറിയുടെ റാങ്കിൽ കുറയാത്ത ഒരു പദവിയിലുള്ളതോ, വഹിക്കുന്നതോ ആയ ഒരാളെ കമ്മീഷന്റെ സെക്രട്ടറിയായി സർക്കാർ നിയമിക്കും.
തിരുവനന്തപുരമായിരിക്കും കമ്മീഷൻ ആസ്ഥാനം. പ്രായമായവരുടെ ജനസംഖ്യ വർദ്ധിച്ചുകൊണ്ടിരിക്കുന്ന സാഹചര്യമാണ്. അവരെ ചെറുപ്പക്കാർ (60-69),വൃദ്ധർ (70-79), ഏറ്റവും പ്രായം കൂടിയവർ (80-89), അങ്ങേയറ്റം വൃദ്ധർ (90+)എന്നിങ്ങനെ തരം തിരിച്ചിരിക്കുന്നു. നമ്മുടെ സമൂഹത്തിലെ ഏറ്റവും ദുർബല വിഭാഗമായാണ് അവരെ കണക്കാക്കുന്നത്. വിവിധ സ്രോതസുകളിൽ നിന്ന് ശേഖരിച്ച വിവരങ്ങൾ വെളിപ്പെടുത്തുന്നത് മുതിർന്ന പൗരന്മാർക്ക് അടിസ്ഥാന വൈദ്യസഹായം, അവരുടെ ഉപജീവനമാർഗം നിലനിറുത്താനുള്ള ചെലവുകൾ, മതിയായ സാമ്പത്തിക സഹായം, അതുവഴി വലിയ വിവേചനം, മോശമായ പെരുമാറ്റം, സുരക്ഷയുടെ അഭാവം എന്നിവയും അവരെ ഇപ്പോൾ ഒറ്റപ്പെട്ടതും ഉപേക്ഷിക്കപ്പെട്ടതുമായ അവസ്ഥയിൽ എത്തിച്ചിരിക്കുന്നു. ഹൃദ്രോഗം, ക്യാൻസർ, സന്ധിവാതം,ഹൈപ്പർ ടെൻഷൻ, പ്രമേഹരോഗം,വൃക്കസംബന്ധമായ പ്രശ്നങ്ങൾ, കാഴ്ചക്കുറവ്, ഓർമക്കുറവ് തുടങ്ങിയ വിട്ടുമാറാത്ത രോഗങ്ങളാണ് പ്രായമായവർ പ്രധാനമായും നേരിടുന്ന പ്രശ്നങ്ങൾ. ഇവരെ മിക്കബന്ധുക്കളും ഒരു ബാദ്ധ്യതയും ഭാരവുമായിട്ടാണ് കണക്കാക്കുന്നത്. അതിനാൽ, പ്രായമായവർക്ക് പരിചരണവും സംരക്ഷണവും സാമൂഹിക സുരക്ഷയും പിന്തുണയും നൽകുന്നതിന് ഭരണകൂടത്തിന് ബാദ്ധ്യതയുണ്ട്. നിയമപരിഷ്‌കരണ കമ്മീഷൻ മുതിർന്ന പൗരന്മാരുടെ പ്രശ്നങ്ങൾ വിശദമായി വിലയിരുത്തുകയും പരിഗണിക്കുകയും സാമൂഹ്യനീതി വകുപ്പ്, മുതിർന്ന പൗരന്മാരുടെ കമ്മിറ്റികൾ, വെൽഫെയർ അസോസിയേഷനുകൾ/ഫെഡറേഷനുകൾ, അതിന്റെ അധികാരികൾ,വൈദഗ്ധ്യമുള്ള വ്യക്തികൾ എന്നിവരുമായി ചർച്ചകൾ നടത്തുകയും അവരുടെ വിലയേറിയ വിവരങ്ങൾ നേടുകയും ചെയ്ത ശേഷമാണ് ബിൽ സർക്കാരിന് സമർപ്പിച്ചിട്ടുള്ളത്. ഈ സാഹചര്യത്തിൽ കെയർ സെന്ററുകൾ, ഡേ സർവീസ് സെന്ററുകൾ, സീനിയർ സിറ്റിസൺ ക്ലബ്, സീനിയർ സിറ്റിസൺസ് പാർക്ക് എന്നിവയുടെ സ്ഥാപനവും പ്രവർത്തനവും ഉൾപ്പെടെയുള്ള ലക്ഷ്യങ്ങൾക്കായി 'കേരള സീനിയർ സിറ്റിസൺസ് ബിൽ, 2023' എന്ന പേരിൽ ഒരു ബിൽ തയ്യാറാക്കാൻ കമ്മീഷൻ തീരുമാനിച്ചു.

കമ്മീഷന് ഒട്ടേറെ

അധികാരങ്ങൾ

മുതിർന്ന പൗരന്മാരുടെ പരിചരണത്തിനും ക്ഷേമത്തിനുമായി പ്രവർത്തിക്കുന്ന കെയർ സെന്റർ, ഫീസ് ഈടാക്കിയോ അല്ലാതെയോ പകൽ സമയത്ത് പ്രവർത്തിക്കുന്ന ഡേ സർവീസ് സെന്റർ, വിനോദത്തിനുള്ള സീനിയർ സിറ്റിസൺ ക്ലബ്, പൊതു ഇടങ്ങളായ സീനിയർ സിറ്റിസൺ പാർക്ക് ഉൾപ്പെടെ നിരവധിയായ സേവനോപാധികൾ ബില്ലിൽ പ്രതിപാദിച്ചിട്ടുണ്ട്. ഒരു കെയർ സെന്ററിൽ താമസിക്കുന്ന ഏതൊരു മുതിർന്ന പൗരനും, കെയർ സെന്ററിന്റെയോ ഡേ സർവീസ് സെന്ററിന്റെയോ പ്രവർത്തനത്തിലെ ലംഘനങ്ങൾ സംബന്ധിച്ച് പരാതി നൽകാം. ഒട്ടേറെ അധികാരങ്ങളാണ് കമ്മീഷനിൽ നിക്ഷിപ്തമായിരിക്കുക. സെക്ഷൻ 16 പ്രകാരം അതിന്റെ പ്രവർത്തനം നിർവഹിക്കുമ്പോൾ, താഴെപ്പറയുന്ന കാര്യങ്ങളിൽ, 1908ലെ സിവിൽ പ്രൊസീജ്യർ കോഡ് (1908ലെ സെൻട്രൽ ആക്ട് 5) പ്രകാരം ഒരു കേസ് വിചാരണ ചെയ്യുന്ന ഒരു സിവിൽ കോടതിയുടെ എല്ലാ അധികാരങ്ങളും കമ്മീഷന് ഉണ്ടായിരിക്കും.
കമ്മീഷൻ, അന്വേഷണം നടത്തുമ്പോൾ, എല്ലാ കക്ഷികൾക്കും അവരുടെ കാഴ്ചപ്പാടുകൾ സ്വയം അല്ലെങ്കിൽ അവരുടെ അംഗീകൃത പ്രതിനിധികൾക്ക് അവതരിപ്പിക്കാൻ അവസരം നൽകും.
ഈ നിയമത്തിന് കീഴിൽ നടത്തുന്ന ഏതെങ്കിലും അന്വേഷണത്തെക്കുറിച്ചുള്ള കമ്മീഷൻ കണ്ടെത്തലുകൾ ഉചിതമായ നടപടിക്കുള്ള ശുപാർശയുമായി സർക്കാരിനെ അറിയിക്കേണ്ടതാണ്.
കമ്മറ്റിക്ക് പരാതികളിൽ യുക്തമെന്ന് തോന്നുന്ന രീതിയിൽ അന്വേഷണം നടത്തുകയും അത്തരം പരാതി ലഭിച്ച് മുപ്പത് ദിവസത്തിനകം പരാതിയും രേഖകളും സഹിതം കമ്മീഷനെ തുടർനടപടികൾക്കായി ഒരു റിപ്പോർട്ട് സമർപ്പിക്കുകയും ചെയ്യേണ്ടതുണ്ട്. ഗവൺമെന്റിന്, ഔദ്യോഗിക ഗസറ്റിലെ വിജ്ഞാപനത്തിലൂടെ, ഓരോ ജില്ലയിലും ഒരു ജില്ലാ സീനിയർ സിറ്റിസൺ വെൽഫെയർ കമ്മിറ്റി രൂപീകരിക്കാനും ബിൽ വ്യവസ്ഥ ചെയ്യുന്നു. ജില്ലയിൽ രജിസ്റ്റർ ചെയ്യാത്തതോ അനധികൃതമായതോ ആയ ഏതെങ്കിലും കെയർ സെന്റർ, ഡേ സർവീസ് സെന്റർ അല്ലെങ്കിൽ സീനിയർ സിറ്റിസൺ ക്ലബ്ബ് എന്നിവ പ്രവർത്തിക്കുന്നുണ്ടെന്ന് അന്വേഷിച്ച് കണ്ടെത്തിയാൽ, കമ്മറ്റി കേൾക്കാനുള്ള അവസരം നൽകിയ ശേഷം, പിഴ ചുമത്തും. ഒരു ലക്ഷം രൂപ വരെ നീട്ടുകയും ഈ ആക്ടിലെ വ്യവസ്ഥകൾക്കനുസൃതമായി കമ്മിറ്റി അനുശാസിക്കുന്ന ഒരു നിശ്ചിത കാലയളവിനുള്ളിൽ അത്തരം കേന്ദ്രങ്ങൾ ക്രമപ്പെടുത്തുന്നതിന് ഉചിതമായ നിർദ്ദേശം നൽകുകയും ചെയ്യും.

ഒരു കെയർ സെന്റർ അല്ലെങ്കിൽ ഡേ സർവീസ് സെന്റർ രജിസ്‌ട്രേഷനായി രേഖകൾ സഹിതം രജിസ്ട്രാർക്ക് അപേക്ഷ നൽകണം. മുതിർന്ന പൗരന്മാരുടെ സംരക്ഷണത്തിനും ക്ഷേമത്തിനും സാമൂഹിക സുരക്ഷയ്ക്കും വേണ്ടി കമ്മീഷൻ ക്ഷേമനിധി രൂപീകരിക്കും. സീനിയർ സിറ്റിസൺസ് വെൽഫെയർ സ്‌കീം ഉൾപ്പെടെ നിർദ്ദേശങ്ങളാണ് ബിൽ മുന്നോട്ട് വെയ്ക്കുന്നത്.