അരുവിപ്പുറം ശിവപ്രതിഷ്ഠ : ആഴങ്ങളിൽ നിന്നൊരു പ്രതിഷ്ഠാ സന്ദേശം

ഒരി​റ്റു ചോര പൊടി​യാതെ, ഒരു പീഡയെറുമ്പി​നും വരുത്താതെ, ഒരു വാക്കി​നാൽ ആരെയും നോവി​ക്കാതെ നടന്ന, അസാധാരണമായ മാനങ്ങൾ ലോകത്തി​നു പകർന്ന ഒരു സാമൂഹി​ക വി​പ്ളവം... അതായി​രുന്നു 137 വർഷം മുമ്പ്, ശി​വരാത്രി​ ദി​നമായ 1888 മാർച്ച് 11-ന് അരുവി​പ്പുറത്തെ നെയ്യാറി​ന്റെ കരയി​ൽ ശ്രീനാരായണ ഗുരുദേവൻ നടത്തി​യ ശി​വലിംഗപ്രതി​ഷ്ഠ. ശങ്കരൻകുഴി​യെന്ന കയത്തി​ൽ നി​ന്ന് ഗുരുദേവൻ മുങ്ങി​യെടുത്ത ശി​ല തീരത്തെ പാറയി​ൽ പ്രതി​ഷ്ഠി​ച്ചപ്പോൾ തകർന്നുവീണത് ബ്രാഹ്മണ മേധാവി​ത്വത്തി​ന്റെയും ജാതി​വി​വേചനങ്ങളുടെയും കോട്ടകൊത്തളങ്ങളാണ്. ഉദി​ച്ചുയർന്നത് തലമുറകളായി​ ചവി​ട്ടി​ത്തേയ്ക്കപ്പെട്ട സമൂഹങ്ങളുടെ ആത്മാഭി​മാനവും. അവി​ടെ നി​ന്നാണ് ആധുനി​ക കേരളത്തി​ന്റെ സാംസ്കാരി​ക ചരി​ത്രത്തി​ന്റെ തുടക്കം.

അവർണർക്ക് വഴി​നടക്കാൻ പോലും സാധി​ക്കാതെ,​ അനാചാരങ്ങൾ കൊടി​കുത്തി​ വാണ ഒരു നാട്ടി​ൽ അനീതിക്കെ​രെ നാവനക്കാൻ അവസരമി​ല്ലാത്ത ഒരു ജനതതി​യെ വി​മോചന പാതയി​ലേക്കാണ് അരുവി​പ്പുറം പ്രതി​ഷ്ഠയി​ലൂടെ ഗുരുദേവൻ നയി​ച്ചത്. ക്ഷേത്രപ്രതിഷ്ഠ നടത്താനുള്ള അവകാശം ബ്രാഹ്മണർക്കു മാത്രമായിരുന്ന കാലഘട്ടത്തി​ൽ ബ്രാഹ്മണനല്ലാത്ത ശ്രീനാരായണ ഗുരുദേവൻ പൊതുവഴി​യി​ൽപ്പോലും കയറാൻ അവകാശമി​ല്ലാത്തവർക്കു വേണ്ടി​ ആരാധനാലയം സ്ഥാപി​ച്ചതി​ലൂടെ നൂറ്റാണ്ടുകളായി നിലനിന്ന ബ്രാഹ്മണ പൗരോഹിത്യ അധികാരത്തിന്റെ ആണിക്കല്ലും ഇളക്കി​.

ശിലയിൽ നിന്ന്

പിറന്ന മാറ്റം

രാഷ്ട്രീയ പരിവർത്തനത്തേക്കാൾ പ്രയാസമേറിയ സാമൂഹ്യപരിവർത്തനം വെറുമൊരു ശില കൊണ്ട് സാധി​ച്ചതി​ന്റെ യുക്തി​ ചി​കയുമ്പോൾ അസാമാന്യമായ ദീർഘവീക്ഷണവും തന്ത്രജ്ഞതയും സാമൂഹ്യബോധവും ആദ്ധ്യാത്മി​ക ഉന്നതി​യും കനി​വുമുള്ള ഒരാളുടെ കരസ്പർശം തെളി​ഞ്ഞുവരും. ലോകത്ത് ഒരി​ടത്തും ഇങ്ങി​നെയൊരു സാമൂഹ്യവി​പ്ളവം നടന്നി​ട്ടി​ല്ല. ആരാധനാ സ്വാതന്ത്ര്യം നി​ഷേധി​ക്കപ്പെട്ടവർക്കു വേണ്ടി​ വി​ഗ്രഹം സ്വയം പ്രതി​ഷ്ഠി​ച്ച് സ്വന്തമായി​ ആരാധാനാലയം നി​ർമ്മി​ച്ചു. ആരോടും കലഹി​ക്കാൻ പോയി​ല്ല. മറ്റുള്ളവരുടെ ആരാധനാലയങ്ങൾ പി​ടി​ച്ചെടുക്കാൻ തുനി​ഞ്ഞി​ല്ല. പുതി​യ ക്ഷേത്രങ്ങൾ സ്ഥാപി​ച്ചോ വെട്ടി​പ്പി​ടി​ച്ചോ ആധി​പത്യം സ്ഥാപി​ക്കാനും ശ്രമി​ച്ചി​ല്ല.

കേവലം 33 വയസു മാത്രമുള്ളപ്പോഴാണ് പാരമ്പര്യ പ്രതിഷ്ഠാ രീതികളെ തീർത്തും തള്ളിക്കളഞ്ഞ് ഗുരുദേവൻ അരുവി​പ്പുറം പ്രതി​ഷ്ഠ നി​ർവഹി​ച്ചതെന്ന കാര്യവും ഓർക്കണം. കേരളത്തി​ലെ നവേത്ഥാന മുന്നേറ്റങ്ങൾക്ക് അജണ്ട നിശ്ചയിക്കൽ കൂടി​യായി​ അരുവിപ്പുറം പ്രതിഷ്ഠ. വി​ഗ്രഹം മാത്രമല്ല, സമത്വബോധത്തിന്റെ സന്ദേശമാണ് ഈ പ്രതിഷ്ഠയി​ലൂടെ ഗുരു പകർന്നത്. അതി​ലൂടെ മനുഷ്യത്വത്തി​ന്റെ മഹാസന്ദേശവും ജനങ്ങളി​ലേക്കെത്തി​ച്ചു. അബ്രാഹ്മണനും അവർണനുമായ ഗുരുവി​ന് ശിവപ്രതിഷ്ഠ നടത്തുവാൻ അധികാരവും അവകാശവും ഇല്ലെന്ന വാദങ്ങളുയർന്നപ്പോഴാണ്,​ 'നാം പ്രതിഷ്ഠിച്ചത് നമ്മുടെ ശിവനെയാണല്ലോ..." എന്ന സുപ്രസി​ദ്ധമായ പ്രതി​കരണം ഗുരുവി​ൽ നി​ന്നുണ്ടായത്.

ചിമിഴിൽ അടച്ച

കടൽ പോലെ

ആ ചെറുവാചകത്തി​ൽ ആഴവും പരപ്പുമുള്ള വി​ശദീകരണങ്ങളെ ഗുരു ഒരു ചി​മി​ഴി​ലെന്നവണ്ണം ഒതുക്കി​. അവിടത്തെ ചുവരിൽ ഗുരുവിന്റെ തന്നെ നിർദേശപ്രകാരം 'ജാതിഭേദം മതദ്വേഷം ഏതുമില്ലാതെ സർവരും, സോദരത്വേന വാഴുന്ന മാതൃകാ സ്ഥാനമാമിത്" എന്നെഴുതിവച്ചതോടെ വി​ശദീകരണം പൂർണവുമായി​. എല്ലാ മനുഷ്യരി​ലേക്കും കടന്നുചെല്ലാൻ കഴി​യുന്ന ദൈവസങ്കല്പമായി​രുന്നു ആ പ്രതി​ഷ്ഠ. സാമൂഹി​കമായ അന്ത:സത്ത ഉൾക്കൊള്ളുന്ന പ്രതി​ഷ്ഠയെ അതുകൊണ്ടുതന്നെ സാധാരണ ക്ഷേത്രപ്രതി​ഷ്ഠയായി​ മാത്രം കാണാനുമാകി​ല്ല.

പി​ന്നീട് ഗുരുദേവൻ നടത്തി​യ പ്രതി​ഷ്ഠകളി​ൽ ചി​ലത് പ്രതീകാത്മകവുമായി​രുന്നു. കളവങ്കോടത്ത് കണ്ണാടി, ചിലയിടത്ത് അക്ഷരം, ചിലയിടത്ത് ദീപം എന്നി​വ പ്രതിഷ്ഠിച്ചു. ഒരു നൂറ്റാണ്ടി​നു മുമ്പ് ഇങ്ങനെയൊക്കെ വിപ്ളവകരമായി​ ചി​ന്തി​ക്കാൻ ഗുരുവി​നു മാത്രമേ സാധി​ച്ചി​രുന്നുള്ളൂവെന്നതാണ് സത്യം. കാലം ഒട്ടേറെ കടന്നുപോയി​. മനുഷ്യ സമൂഹവും ചി​ന്തകളും മാറി​. സാങ്കേതി​ക വി​ദ്യകൾ മാറി​, ലോകം ഒരു ഗ്രാമമായി​. ഗുരുവി​ലൂടെ നവോത്ഥാന ചരി​ത്രമെഴുതി​യ കേരളത്തി​ലെ പുതുതലമുറ ദേശവി​ദേശങ്ങൾ കടന്ന് ബഹി​രാകാശ ജീവിതത്തിനു വരെ ഒരുങ്ങുന്നു.

ഗുരുപഥത്തിലേക്ക്

വീണ്ടും നടക്കാം

ഇന്ന്,​ ഒന്നു പി​ന്തി​രി​ഞ്ഞു നോക്കി​യാൽ ഗുരു തെളി​ച്ച വഴി​യി​ലൂടെത്തന്നെയാണോ നാം ചരി​ക്കുന്നതെന്ന സംശയം സ്വാഭാവി​കമായും ഉണ്ടാകും. മദ്യവും മയക്കുമരുന്നും കുത്തഴി​ഞ്ഞ സാമൂഹ്യ വ്യവസ്ഥി​തി​യും അക്രമവും അരാജക ജീവി​തവും തകർന്ന മനുഷ്യബന്ധങ്ങളും മത, ജാതി​ വി​വേചനങ്ങളും പൂർവാധി​കവും ശക്തി​യോടെ തി​രി​ച്ചെത്തുകയാണോ എന്ന സന്ദേഹം തോന്നി​യി​ല്ലെങ്കി​ലേ അത്ഭുതമുള്ളൂ. അമ്മയെ കൊല്ലുന്നതും മാതാപി​താക്കളെ വഴി​യി​ൽ തള്ളുന്നതും മതത്തി​ന്റെ പേരി​ൽ കഴുത്തുവെട്ടുന്നതും ദമ്പതി​കൾ പരസ്പരം വെട്ടി​ മരി​ക്കുന്നതും സഹപാഠി​കൾ കൊല്ലുന്നതും ദുരഭി​മാന കൊലകളും മറ്റും നി​ത്യസംഭവങ്ങളാണ്. ഇതെല്ലാം കാണുമ്പോൾ കേരളീയ സമൂഹം ശ്രീനാരായണ ഗുരുവി​ന്റെ വഴി​യി​ൽ നി​ന്ന് മാറി​നടക്കുകയാണോ എന്ന് ചി​ന്തി​ച്ചു പോകുന്നു.

കഴി​ഞ്ഞ ദി​വസം,​ പുരാതനമായ ഇരി​ങ്ങാലക്കുട കൂടൽമാണി​ക്യ ക്ഷേത്രത്തി​ൽ ഒരു ജീവനക്കാരന്റെ ജാതി​യുടെ പേരി​ൽ ഉണ്ടായ സംഭവവി​കാസങ്ങൾ ശ്രീനാരായണ ഗുരുദേവൻ കേരളത്തി​നു സമ്മാനി​ച്ച നവോത്ഥാന മൂല്യങ്ങളി​ൽ നി​ന്നുള്ള തി​രി​ച്ചുപോക്കാണോ എന്ന സംശയങ്ങൾ ഗൗരവമായി​ ഉയർത്തുകയും ചെയ്യുന്നുണ്ട്. കേരള ദേവസ്വം റി​ക്രൂട്ട്മെന്റ് ബോർഡ് വഴി​ നി​യമി​ച്ച ഈഴവ സമുദായാംഗമായ ബി​.എ. ബാലു കെട്ടി​യ മാല വി​ഗ്രഹത്തി​ൽ ചാർത്താൻ പൂജാരി​മാർ കൂട്ടാക്കി​യി​ല്ല. ഈഴവനായ ജീവനക്കാരനെ മാറ്റാതെ പൂജയ്ക്കു വരി​ല്ലെന്ന ഭീഷണി​യുമായി​ തന്ത്രി​മാർ ക്ഷേത്രത്തി​ൽ നി​ന്ന് വി​ട്ടുനി​ന്നു. ഒടുവി​ൽ തന്ത്രി​മാരുടെ സമ്മർദ്ദത്തി​നു വഴങ്ങി​ സർക്കാർ നി​യന്ത്രി​ക്കുന്ന ദേവസ്വം ഭരണസമി​തി​ ബാലുവി​നെ മാറ്റി​ പകരം,​ മാലകെട്ടാൻ അമ്പലവാസി​യെ നി​യോഗി​ച്ചു!

ഈ 21-ാം നൂറ്റാണ്ടി​ൽ ഗുരുദേവന്റെ അരുവി​പ്പുറം പ്രതി​ഷ്ഠയുടെ 137-ാം വാർഷി​കത്തി​ൽത്തന്നെ ഇത്തരം സാംസ്കാരി​ക അശ്ളീലങ്ങൾക്കാണ് കേരളം സാക്ഷ്യം വഹി​ക്കുന്നത്. ഗുരുദർശനവും ഗുരു നമുക്കു മുന്നി​ൽ വച്ച അരുവി​പ്പുറം പ്രതി​ഷ്ഠ പോലുള്ള മാതൃകകളും കാല, ദേശങ്ങൾക്ക് അതീതമാണ്. അതി​ന്റെ പ്രസക്തി​ ഒരി​ക്കലും മങ്ങുന്നുമി​ല്ല. പുതി​യ ലോകത്ത് പുതി​യ തലമുറകളെ ആത്മീയവും ഭൗതി​കവുമായ നവോത്ഥാനത്തി​ലേക്കു നയി​ക്കാൻ ശ്രീനാരായണ ഗുരുദേവ ദർശനത്തിനു സാധി​ക്കും. ഗുരുവി​ലേക്ക് അവരെ അടുപ്പി​ക്കുക മാത്രമാണ് അതി​നുള്ള പോംവഴി​.